ភ្នំពេញ៖បើទោះជាទើបតែមានឈ្មោះបោះសម្លេងជាង១ឆ្នាំមែន តែពេលនេះតារាចម្រៀងថុល សុភិទិ ដែលជាអ្នកចូលចិត្តជិះម៉ូតូធំៗ ហើយមានរថយន្ដផ្ទាល់ខ្លួនម៉ាកFord នោះកាលពីថ្ងៃទី១៩ សីហា បានឡើងកូដមួយក្រឺតទៀតគឺទិញរថយន្ដទំនើបម៉ាកLamborghini តម្លៃរាប់សែនដុល្លារ ជិះយ៉ាងហ៊ឺហា ។ប្រភពបានឲ្យដឹងថាលោកភិទិ ចូលលុយគ្នាជាមួយគូស្នេហ៍នាងឡុង ម៉ានីន ដែលជាមេម៉ាយកូន១រូបស្រស់ អ្នកលក់Online នោះទិញរថយន្ដលំដាប់សេដ្ឋីនេះជិះដើម្បីឲ្យមុខជំនួញរបស់ពួកគេកាន់តែទទួលបានការចាប់អារម្មណ៍ថែមទៀត មុនពេលពួកគេដឹកដៃគ្នារៀបការ ខណៈដែលមុននេះអ្នកទាំងពីរក៍បានថតPre-Wedding ផងដែរ ។
សូមបញ្ជាក់ថាថុល សុភិទិ បរាជ័យលើកពាន Cambodian Idol រដូវកាលទី៤ កាលពីថ្ងៃទី២៨ ខែ៨ ឆ្នាំ២០២២ ដោយមិនអាចយកឈ្នះលោកលីម តិចម៉េង បានឡើយ ប៉ុន្ដែភិទិ នៅតែមានទីផ្សារចម្រៀង ហើយថែមទាំងឆក់បានបេះដូងអ្នកមេម៉ាយសាច់សខ្ចីម៉ានីន ទៀតផងដែលបច្ចុប្បន្នពួកគេរស់នៅផ្ទះវីឡារយ៉ាងស្កឹមស្កៃនិងជិះរថយន្ដទំនើបៗមិនចាញ់អ្នកលក់Online ផ្សេងៗទៀតឡើយ។ភិទិ ស្ថិតក្នុងចំណោមតារាទាំង៤ដែលជិះLamborghini នៅឆ្នាំ២០២៤ មានដូចជាលោកងួន ចាន់ដេវីត ,អ្នកនាងផន សុផារី និងលោកខេមរៈ សិរីមន្ដ ។
ប្រភពបានឲ្យដឹងថាចំណងស្នេហាកូនមន្រ្ដីធំផ្កាយ២លោកថុល សុភិទិ ដែលជាអ្នកលេងម៉ូដសាក់លេចធ្លោរូបនេះទទួលបានការគាំទ្រពីក្រុមគ្រួសារទាំងសងខាង ហើយនាងម៉ានីន កាន់តែមានភាពកក់ក្ដៅបំផុតព្រោះភិទិ ស្រលាញ់កូនស្រីនាងដូចជាកូនបង្កើតរបស់លោកដែរ ។តែអ្វីដែលភិទិ ពិបាកប្រឈមនោះគឺនាងម៉ានីន មិនអនុញ្ញាត្តិឲ្យលោកថតMV ដែលមានឈុតសម្ដែងក្ដៅសាច់រោលរាលជាមួយតារាស្រីរូបណាដែលមានប្លង់អោបថើប ឬជញ្ជក់មាត់តួស្រីម្នាក់ណាឡើយ ហើយបើហ៊ានតែល្មើសបម្រាបមួយនេះនោះនាងមិនស្ទក់ស្ទើក្នុងការផ្ដាច់ចំណងស្នេហាកណ្ដាលទីនោះទេ ។ជាក់ស្ដែងដូចជាកាលពីខែកញ្ញា ឆ្នាំ២០២៣ នៅពេលដែលអ្នកលេងម៉ូដសាក់រូបនេះហ៊ានលេងឈុតថើបមាត់នាងអ៊ីងអ៊ីង ធ្វើឲ្យនាងម៉ានីន ឆេះដុំ និងឲ្យលោកដេកក្រៅផ្ទះមួយរយៈទើបតារាហង្សមាសរូបនេះដឹងកំហុសព្រមផ្សះផ្សារស្នេហាវិញតាមរយៈការព្រមធ្វើទៅតាមល័ក្ខខណ្ឌនាងគ្រប់យ៉ាងទាំងអស់។
ក្រៅពីថុល សុភិទិ តារាដែលភ្ជាប់ស្នេហាជាមួយអ្នកមេម៉ាយមានដូចជាលោកជា វិបុល ,អ៊ិន សុបញ្ញា ហៅផាណូ ,រស់ រាជសាល,ប៊ឺរី ,ប៉ែន ភ័ក្រ្ដសុធារិទ្ធ និងព្រីង ច័ន្ទបុត្រ ជាដើម ៕
