ភ្នំពេញ៖ព្រាប សុវត្ថិ ជាអ្នកលេងម៉ូដរថយន្ដទំនើបៗម្នាក់នាពេលបច្ចុប្បន្នដែលលោកបានចំណាយលុយរាប់សែនដុល្លារទិញរថយន្ដជិះក្នុងនោះសព្វថ្ងៃលោកប្រើប្រាស់ឡានមានដូចជាRolls Royce ,Escalade ,Range Rover ,Bmw និងIsuzu ជាដើម ។ប៉ុន្ដែគិតត្រឹមឆ្នាំ២០២៤ នេះព្រាប សុវត្ថិ មិនទាន់ទិញរថយន្ដម៉ាក Lamborghini ជិះនោះទេ ខណៈដែលបច្ចុប្បន្នមានតារា៤ដួងហើយបានលេងម៉ូដឡានលំដាប់សេដ្ឋីនេះក្នុងនោះមានដូចជាងួន ចាន់ដេវីត ,ផន សុផារី ,ខេមរៈ សិរីមន្ដ និងថុល សុភិទិ ។
ប្រភពបានឲ្យដឹងថាព្រាប សុវត្ថិ នឹងទិញរថយន្ដLamborghini នាពេលខាងមុខនេះជិះជាមិនខាន ព្រោះថាខេមរៈ សិរីមន្ដ ហ៊ានទិញឡាននេះជិះមុនលោកទៅហើយ ហេតុនេះរូបលោកដែលមានលុយប្រៀបដូចជាសេដ្ឋីម្នាក់ក្នុងសិល្បៈនោះរឿងអីដែលមិនជះលុយទិញរថយន្ដនេះជិះឲ្យផ្អើលមេឃដែរនោះ ។ប៉ុន្ដែតាមព័តមានថាទោះជាព្រាប សុវត្ថិ ដើរក្រោយ១ជំហានរឿងលេងម៉ូដឡានLamborghini នេះក្ដី តែគេជឿរថាលោកនឹងទិញរថយន្ដម៉ូដមួយនេះក្នុងតម្លៃខ្ពស់ជាងតារាខាងលើជាមិនខាន ។
យោងតាមវេបសាយខ្មែរ២៤ បានឲ្យដឹងថារថយន្ដម៉ាកLamborghini Aventador SV លក់នៅខ្មែរក្នុងតម្លៃ៣១ ម៉ឺនដុល្លារ ខណៈដែលវេបសាយក្នុងស្រុកមួយទៀតថារថយន្ដម៉ាកLamborghini Veneno Roadster តម្លៃដល់ទៅ៤,៥លានដុល្លារ។សម្រាប់ព្រាប សុវត្ថិ ទោះជាចង់ជិះរថយន្ដតម្លៃមួយណាក៍បានដែរ ព្រោះកាលពីខែកញ្ញា ឆ្នាំ២០២០ មនុស្សជំនិតរបស់លោកសុវត្ថិ ទម្លាយប្រាប់អ្នកកាសែតថាតារាចម្រៀងមានគោរមងារជាឧកញ៉ារូបនេះមានទ្រព្យសរុបប្រមាណ៣០លានដុល្លារ ពីការចាប់អាជីពចម្រៀងជាង២០ឆ្នាំ ។
គួរបញ្ជាក់ថាព្រាប សុវត្ថិ ជាអ្នកជំនួញម្នាក់ដែលមានមុខរបរជាច្រើននៅក្រៅសិល្បៈមានដូចជាហាងកាត់សក់ ,ហាងកាត់ដេរ ,សំអាងការ ,ភោជនីយដ្ឋាន ,Resort និងក្រុមហ៊ុនអចលនទ្រព្យ ជាដើម ។ក្រោយចាកចេញពីហង្សមាសជាង៤ឆ្នាំ ចូលជ្រកនៅGalaxy លោកសុវត្ថិ ដែលទទួលបានគោរមងារជាឧកញ៉ាកាលពីថ្ងៃទី២៩ខែ៤ ឆ្នាំ២០២២ នោះមិនផ្ដោតលើអាជីពចម្រៀងទាំងស្រុងដូចមុនទេ គឺងាកទៅពង្រីកមុខរបរបន្ថែម ខណៈដែលកូនប្រុសទី១ សុវត្ថិ មុនីវណ្ណ និងសុវត្ថិ សិរីវុឌ្ឍ ច្រៀងនៅផលិតកម្មជាមួយលោកនោះចាប់ផ្ដើមចេញមុខច្រើនជាងមុន ហើយកូនទី២ សុវត្ថិ មុនីនាគ ត្រៀមវិលរកឆាកតន្រ្ដីជាថ្មីផងដែរ ។ប៉ុន្ដែព្រាប សុវត្ថិ អាយុ៤៩ឆ្នាំ ចាប់ដៃអ្នកស្រីឡុង ស្រីមុំ រយៈពេល២៩ឆ្នាំ បានសុទ្ធតែកូនប្រុសដល់ទៅ៣នាក់ នោះគ្មានដំណឹងលោកតាមយកកូនស្រីឡើយ ៕
