ភ្នំពេញ៖ទេព បូព្រឹក្ស ដឹកដៃងួន ចាន់ដេវីត ទៅអាមេរិកកាលពីថ្ងៃទី៧ កញ្ញា ដើម្បីប្រារពខួបស្នេហ៍របស់ពួកគេគម្រប់៨ឆ្នាំ ។ ប្ដីប្រពន្ធតារា១គូនេះមិនមែនទៅចាយលុយខ្លួនឯងសុទ្ធនោះទេ តែពួកគេក៍ឆ្លៀតទៅចូលរួមកម្មវិធីបង្ហាញម៉ូដមួយនៅទីក្រុងញូយ៉ក New York Fashion Week SS 2025 ផងដែរ ហើយនេះក៍មិនមែនជាលើកទី១ដែរ តែអ្នកទាំងពីរបានបណ្ដើរគ្នាទៅអាមេរិកជាច្រើនលើកច្រើនសារមកហើយ ពោលគឺដើរលេងសប្បាយផង រកលុយផង។យ៉ាងណាសម្រាប់ដំណើរលើកនេះស្រីនិច្ច និងដេវីត បានសប្បាយម៉ាអស់ដៃតែម្ដង ព្រោះទៅច្រើនទីតាំងជាងលើកមុនៗដោយសារតែចង់ធ្វើឲ្យជីវិតស្នេហារបស់ពួកគេកាន់តែមានន័យក្នុងថ្ងៃគម្រប់ខួបស្នេហ៍៨ឆ្នាំ ។
ទេព បូព្រឹក្ស បាននិយាយថារយៈពេល៨ឆ្នាំមកនេះនាងគិតថាគ្មានអ្នកណាដឹងចិត្តនាងច្បាស់ជាងដេវីត ឡើយ ។ចំណែកដេវិត វិញបានបង្ហាញការថ្នាក់ថ្នមភរិយា និងមានការតុបតែងសម្លៀកបំពាក់ និងម៉ូដសក់ព័ណទង់ដែងស៊ីគ្នាតែម្ដង ប៉ុន្ដែអត់និយាយអ្វីទាំងអស់ ។
ទេព បូព្រឹក្ស បានភ្ជាប់ស្នេហាជាមួយងួន ចាន់ដេវីត កាលពីឆ្នាំ២០១៦ ហើយនៅថ្ងៃទី១៦ ខែ២ ឆ្នាំ២០២៣ នាងសម្រាលបានកូនប្រុសមួយឈ្មោះទេព បញ្ចវរាប ហៅRobert ។មុនស្រីនិច្ច ដឹកដៃដេវីត ទៅអាមេរិក គូស្នេហ៍របស់នាងបានប្រកាសថាឈប់ចំណាយលុយធំ ផលិត MV ច្រើនសន្ធឹកសន្ធាប់ដូចមុនទៀតហើយ ព្រោះអត់បានការ ដែលបញ្ហានេះអាចធ្វើឲ្យរាំងស្ទះដល់ការវាយលុកទីផ្សារមួយផ្នែកធំរបស់បូព្រឹក្ស ក្រោយមានកូន១អាយុជាង១ឆ្នាំ ។ប៉ុន្ដែការចេញទៅសាងស្នេហាលើទឹកដីអាមេរិករបស់បូព្រឹក្ស-ដេវីត នេះចំពេលដែលមានព័តមានថាពួកគេលែងកំណត់ពេលវេលារៀបការទៀតហើយតែត្រៀមយកកូនទី២ បើទោះជាបានថតរូបPre-Wedding តាំងពីឆ្នាំ២០១៩ ក្ដី ។
ទស្សនិកជនសង្កេតឃើញថាទេព បូព្រឹក្ស ដែលធ្លាប់ទទួលបានការចាប់អារម្មណ៍តាមរយៈវិធីតុបតែងខ្លួន ក្បាច់រាំ ជាងទឹកដមសម្លេងនោះពេលនេះនាងនៅតែលេងខ្លួនមិនចាញ់កាលនៅលីវឡើយ តែទីផ្សារចម្រៀងនាងហាក់នៅចង្អៀតជាងមុន បើទោះជាមានម្ចាស់ស្នេហាថ្លើមថ្លៃជាអ្នកធ្វើភ្លេង និងនិពន្ធទំនុកច្រៀងឲ្យនាងក៍ដោយ។យ៉ាងណាគេឃើញថាស្រីនិច្ច មានយីអ៊ុនល្អនៅលើការផ្សព្វផ្សាយស្ពត ដែលធ្វើឲ្យនាងនិងគូស្នេហ៍រកលុយរួមគ្នាបានច្រើនក្នុង១ឆ្នាំៗទើបធ្វើឲ្យពេលនេះពួកគេមានលទ្ធភាពទិញផ្ទះវីឡារទ្រនុំស្នេហ៍ និងជិះរថយន្ដទំនើបម៉ាកLamborghini ទៀតផង។ប្រភពបានឲ្យដឹងថាស្រីនិច្ច គ្មានគម្រោងទៅចូលផលិតកម្មណាទេ ហើយដេវីត នៅតែដាក់ផែនការណ៍ជួយនាងឲ្យនាងល្បីដូចមុនឡើងវិញដែលអាចតាមរយៈការច្រៀងដៃគូរួមគ្នា បើទោះជាលែងចាយលុយច្រើនធ្វើMV ឲ្យនាងទៀតក្ដី ។
ក្រៅពីទេព បូព្រឹក្ស តារាជ្រើសគូស្នេហ៍ជាអ្នកសិល្បៈដូចគ្នាមានដូចជាស៊ឹម សូលិកា -អេង រិទ្ធី ,ប៉ាច គីមមួយ -សយ រតនៈ,កុល ដាវី -សុខ រក្សា ,ខាត់ សុឃីម-ផាណូ ,គង់ ច័ន្ទស្រីមុំ -គឹម សីហា ,កាតតុ -នាយខ្យង និងឈិន មុនីនាថ -នាយព្រែក ជាដើម ៕
