ភ្នំពេញ៖កាលពីឆ្នាំ២០១៩ ស្រីស្រស់តន់ ច័ន្ទសីម៉ា ត្រូវថៅកែអ្នកឧកញ៉ាលើកឲ្យច្រៀងបទល្បីៗជាមួយលោកខេម ខណៈដែលនៅឆ្នាំ២០២០ -២០២១ ព្រាប សុវត្ថិ បានរុញនាងឲ្យឡើងស្រឺតៗថែមទៀត ហើយនៅឆ្នាំ២០២៣ ខេមរៈ សិរីមន្ដ បានបន្ថែមល្បឿននាងបានមួយកម្រិតទៀតតាមរយៈការច្រៀងជាដៃគូ ប៉ុន្ដែនៅឆ្នាំ២០២៤ ឧកញ៉ាទាំង៣ ហាក់បន្ធូដៃលែងសូវបុកជួយនាងសីម៉ា ដូចមុនទៀតទើបនាងលែងមានផ្ទុះខ្លាំងដូចមុន ។បញ្ហានេះនាំឲ្យមានការលើកឡើងថាអាជីពរបស់នាងសីម៉ា ហាក់នៅទ្រឹង ឬលែងឡើងប្រសិនបើឧកញ៉ាទាំងនោះលែងផ្ដោតសម្រុកអន្ដរាគមន៍មកលើនាងទៀត ។ប៉ុន្ដែសម្រាប់Fan របស់សីម៉ា មិនគិតដូចច្នេះទេ ព្រោះពួកគេចាត់ទុកថានាងជាតារាមានសម្ថភាពម្នាក់ដែលឲ្យតែពេលមានបទល្អច្រៀង និងល្បីឡើងវិញភ្លែតតែម្ដង ហេតុនេះទោះជាគ្មានជំនួយពីឧកញ៉ាក៍នៅតែគេស្គាល់នាងច្បាស់ដែរ បើទោះជានារីតូចច្រឡឹងរូបនេះធ្លាប់មានបញ្ហាចច្រូង ចម្រា សជាមួយFan មួយចំនួនរឿងនាងចេញមុខការពារថៅកែរហូតមានអ្នកខ្លះព្រមានធ្វើពហិកាលែងស្ដាប់បទ ចម្រៀងនាងទៀតក្ដី ។តែតន់ ច័ន្ទសីម៉ា ហាក់មិនក្វល់ចំពោះអ្នកថានាងលែងមានបទល្បីខ្លាំងដូចមុននោះទេ ប៉ុន្ដែកាលពីថ្ងៃទី១៧ សីហា នាងបែជាថាពិបាករឿងម្ដាយបង្ខំឲ្យយកប្ដី ហើយនាងមានតែលួងលោមម្ដាយដោយអង្វរម្ដាយថានាងមិនទាន់ចង់បានប្ដីសីនោះទេ ។យ៉ាងណាមនុស្សភាគច្រើននៅតែចាត់ទុកថានាងសីម៉ា លេងស្ទីលDrama ម្ដងទៀតហើយ ព្រោះល្បីនិងស្អាតប៉ុណ្ណឹងដែរ រឿងអីរកក្ដឹបសង្សារ១មកអោបដូចគេមិនបាន ?
គួរបញ្ជាក់ថាតន់ ច័ន្ទសីម៉ា ជាតារាម្នាក់ដែលហ៊ានសារភាពថានាងបានកែសម្រស់ដល់ទៅ៣កន្លែងគឺធ្វើច្រមុះ ,ចាក់ចង្កា និងពត់ធ្មេញ ខណៈដែលតារាជាច្រើនទៀតបានកែលើសនាងផង តែអត់ដែលទទួលស្គាល់ ។តែសីម៉ា មិនទាន់មានដំណឹងចង់កែកន្លែងទី៤នោះទេ ដោយសារតែមិត្តភក្ដិជុំវិញខ្លួននាងប្រាប់ថាស្អាតប៉ុណ្ណឹងហើយ ចង់កែទៀត ប្រយ័ត្នគ្រោះថ្នាក់…។
សូមរំលឹកថាតន់ ច័ន្ទសីម៉ា អាយុ២៦ឆ្នាំ ទើបតែប្រែប្រួលកេរ្ដិ៍ឈ្មោះ និងជីវភាពនៅជិត៥ឆ្នាំចុងក្រោយប៉ុណ្ណោះ ដែលធ្វើឲ្យនាងសល់លុយទិញផ្ទះ និងរថយន្ដផ្ទាល់ខ្លួនជិះមិនចាញ់តារាល្បីៗផ្សេងទៀតឡើយ ខណៈដែលអំឡុងច្រៀងនៅហាងវីហ្វេ្រននាងបានប្រាក់ខែតែ៤៥០ដុល្លារប៉ុណ្ណោះ តែពេលនេះច្រៀងកម្មវិធីធំ១ស៊ីថ្លៃដល់ទៅ៥ពាន់ដុល្លារ ពោលគឺស្មើនាងច្រៀងនៅហាងកាលពីឆ្នាំ២០១៦ រយៈពេលដល់ទៅ១ឆ្នាំ ។ប៉ុន្ដែសីម៉ា តែងតែលើក ឡើងថា១០ឆ្នាំខាងមុខ មិនដឹងជាមានរឿងអ្វីកើតឡើងទេ ហេតុនេះនាងហាក់ត្រៀមខ្លួនរួចជាស្រេចទៅហើយថាអាជីពដូចនាងអាចនឹងប្រឈមប្រែប្រួល ពោលគឺគ្មានអ្វីថិតថេឡើយ ។
គេចាំមើលថាអតីតអ្នកស្មូតជាប់លេខ១ប្រចាំខេត្តតាកែវតន់ ច័ន្ទសីម៉ា នឹងធ្វើឲ្យទីផ្សារចម្រៀងរបស់នាងមានការប្រែប្រួលវិញទេ សម្រាប់បទចម្រៀងប្រពៃណីខ្មែរបុណ្យភ្ជុំបិណ្ឌឆ្នាំនេះ បន្ទាប់ពីឧកញ៉ាៗលែងដណ្ដើមគ្នាធ្វើជាដៃគូនាងដូចមុននេះ ?
