ភ្នំពេញ៖តារាចម្រៀងប៉ាច គីមមួយ បានជ្រកនៅហង្សមាសរយៈពេល១០ឆ្នាំហើយ ដែលរូបនាងស្ថិតក្នុងចំណោមស្រីស្អាតម្នាក់នៅទ្រនុំនេះ មានទីផ្សារចម្រៀងគួរសមព្រោះអាចច្រៀងទាំងបទខ្មែរ ភាសារអង់គ្លេស និងចិន ផងដែរ ។ប៉ុន្ដែតាំងពីលោកព្រាប សុវត្ថិ ដើរចេញពីហង្សមាសកាលពីឆ្នាំ២០២០ នោះធ្វើឲ្យគីមមួយ បាត់បង់ជំនួយព្រោះអំឡុងពេលដែលនាងសម្ដែងMV ជាមួយលោកសុវត្ថិ ទទួលបានការគាំទ្រច្រើនដូចជាបទ«មាន់ស្រែបន្លែស្រស់ » និងបទ«កាឌឹបៗដាក់ »ជាដើម ។ប្រភពបានឲ្យដឹងថាគីមមួយ អាចនឹងដើរចេញពីហង្សមាសដូចមិត្តរួមក្រុមរបស់នាងដែលថ្មីៗនេះពួកគេបន្ដកន្ទុយគ្នាចេញពីផលិតកម្មធំនេះ ព្រោះគីមមួយ ក៍គ្មានបទចម្រៀងដិតដល់លើទីផ្សារដែរ ។
ក្នុងជំនួបតាមទូរស័ព្ទកាលពីរសៀលថ្ងៃទី១៩ កញ្ញា គីមមួយ វាចាថានាងមិនទៅណាពីហង្សមាសទេ គឺនៅតែបន្ដធ្វើការឲ្យផលិតកម្មនេះជាធម្មតា បើទោះជាពេលនេះនាងច្រៀងដោយគ្មានកុងត្រាក្ដី។គីមមួយ ថ្លែងថា «ខ្ញុំច្រៀងនៅហង្សមាសអត់កុងត្រា ៥ឆ្នាំ ហើយ តែខ្ញុំនៅធ្វើការឲ្យផលិតកម្មធម្មតា ។ ខ្ញុំគ្មានគម្រោងចេញពីផលិតកម្មឆាប់ៗទេ និយាយទៅយើងនៅមានក្ដីសុខ អត់បញ្ហាអីចោទទេ ធ្វើការរាល់ថ្ងៃ » ។
ទាក់ទងរឿងតារាហង្សមាសម្រុកចេញពីផលិតកម្មមួយនេះយ៉ាងគំហ៊ុកនៅឆ្នាំ២០២៤ នេះប៉ាច គីមមួយ ថានាងមិនបានដឹងរឿងអីទេ ព្រោះរវល់ធ្វើការរៀងៗខ្លួន។នាងថានៅរដូវធ្លាក់ភ្លៀងនេះក៍នាងនៅតែចេញច្រៀងតាមបណ្ដាកម្មវិធីទាំងឡាយជាហូរហែផងដែរតាមPub និងក្រុមហ៊ុនមួយចំនួន ។ប៉ុន្ដែនាងថាសម្រាប់បុណ្យភ្ជុំបិណ្ឌឆ្នាំនេះនាងគ្មានបទចម្រៀងប្រពៃណីខ្មែរចេញឡើយ ព្រោះរៀបចំមិនទាន់ ខណៈដែលបទសម័យវិញថ្មីៗនេះនាងក៍ទើបបានចេញបានខ្លះដែរ ។
ប៉ាច គីមមួយ អតីតបេក្ខភាពThe Voice Cambodia រដូវកាលទី១បានក្លាយជាតារាហង្សមាសកាលពីឆ្នាំ២០១៤ ហើយនាងក៍ឈានទៅថតភាពយន្ដជាបន្ដបន្ទាប់ផងដែរ ស្របពេលដែលលែងមានឱកាសសម្ដែងជាមួយលោកព្រាប សុវត្ថិ នោះនាងបានងាកមកចាប់ដៃគូជាមួយគូដណ្ដឹងរបស់នាងលោកសយ រតនៈ តែម្ដងក្រោយពីពួកគេបានភ្ជាប់ពាក្យជាមួយគ្នាកាលពីថ្ងៃទី១ ខែកក្កដា ឆ្នាំ២០២២ ។
ប៉ាច គីមមួយ បន្ថែមថាពេលនេះនាងបានផ្អាកថតភាពយន្ដមួយរយៈទៅហើយ ដោយផ្ដោតលើចម្រៀងសិន តែនឹងឆ្លៀតថតរឿងវិញនៅពេលមានពេលគ្រប់គ្រាន់។នាងថាមិនបារម្ភខ្លាចគ្មានបទចម្រៀងចេញដិតដល់លើទីផ្សារនោះទេ ព្រោះពេលចេញច្រៀងConcerts ថ្មីៗនេះនាងយកបទចាស់ល្បីៗ បូកបទថ្មីៗខ្លះ តំណើរការបានធម្មតា ។
ទាក់ទងរឿងរៀបការជាមួយលោកសយ រតនៈ វិញប៉ាច គីមមួយ ថានាងមិនអាចប្រាប់ថ្ងៃខែឆ្នាំណាបានទេ ព្រោះចង់ធ្វើឲ្យSurprise ដល់Fan របស់នាង ប៉ុន្ដែកម្មវិធីនោះនាងប្រាកដជាធ្វើ ដោយមិនចង់ពន្យាពេលច្រើនឆ្នាំឡើយ ។ដោយឡែកលោកសយ រតនៈ វិញធ្លាប់ប្រាប់អ្នកយកព័តមានយើងថាទោះជាមង្គមការរបស់លោកនិងអូនគីមមួយ អត់ទាន់កំណត់ក្ដី ប៉ុន្ដែពេលនេះរូបលោកនិងគូដណ្ដឹងចិត្ត១ថ្លើម១និងគ្នាហើយ ពោលគឺរស់នៅក្រោមដំបូលតែ១ ។
ក្រៅពីប៉ាច គីមមួយ តារាយកប្ដីជាតារាដូចគ្នាមានដូចជាអ្នកនាងគង់ សុជាតិ ,គង់ ច័ន្ទស្រីមុំ ,ទេព បូព្រឹក្ស ,យក់ ថឹតរដ្ឋា ,និងខាត់ សុឃីម ជាដើម ៕