ភ្នំពេញ៖ក្នុងអាជីព២៧ឆ្នាំ(១៩៩៧-២០២៤ )លោកព្រាប សុវត្ថិ មានបទចម្រៀងនៅហង្សមាស ជាង៣ពាន់បទ ខណៈដែលជ្រកនៅGalaxy ជាង៤ឆ្នាំ បទចម្រៀងរបស់លោកក៍មានល្បីខ្លះដែរ។ប៉ុន្ដែលោកសុវត្ថិ មិនធ្លាប់ភ្លក្សរសជាតិច្រៀងSolo Concert ឡើយ ពោលធ្លាប់តែច្រៀងBest Of The Best ជាច្រើនលើកច្រើនសារ អំឡុងពេលដែលលោកជ្រកនៅហង្សមាស។យ៉ាងណាដោយសារតែព្រាប សុវត្ថិ មានអាយុជ្រេបន្ដិចទៅហើយ ព្រោះឆ្នាំនេះវ័យ៤៩ឆ្នាំ នោះទើបពេលនេះFan ជម្រុញឲ្យលោកឧកញ៉ាស្នាយ រៀបចំការប្រគុំតន្រ្ដីSolo Concert ដូចឱក សុគន្ធកញ្ញា ដែលបានធ្វើកាលពីថ្ងៃទី១៤ខែកញ្ញាឆ្នាំ២០២៤ ដែរ ព្រោះថាបទចម្រៀងរបស់លោកចាស់ៗនៅហង្សមាសមានល្បីជាច្រើនបទ ហេតុនេះបើច្រៀងជិត៤០បទ តែម្នាក់ឯងដូចសុគន្ធកញ្ញា នោះលោកសុវត្ថិ នឹងត្រូវអ្នកគាំទ្រចាប់អារម្មណ៍បទលោកនៅផលិតកម្មចាស់ជាថ្មីជាមិនខាន ខណៈដែលមុននេះអ្នកធ្លាប់ស្រលាញ់គាំទ្រព្រាប សុវត្ថិ មួយចំនួនក៍បានបង្ហាញការខកចិត្តចំពោះលោកចេញមុខការពារថៅកែដែរមានអ្នកខ្លះព្រមានធ្វើពហិការ លែងស្ដាប់បទចម្រៀងរបស់លោកថែមទៀតផង ។
ហ្វេសបុកឈ្មោះវណ្ណ ណារ៉ា បានបញ្ចេញយោបល់ថា«បងប្អូនណាខ្លះដូចខ្ញុំ? សម្រាប់ខ្ញុំសូមគាំទ្រយ៉ាងពេញទំហ៊ឹងចំពោះកំពូលតារាចម្រៀងព្រាប សុវត្ថិ ក្នុងការរៀបចំប្រគុំតន្រ្ដីSolo Concert គួរតែមានសម្រាប់បង ព្រោះបទចម្រៀងបងល្បីខ្លាំងគ្រប់ជំនាន់ មិនថាក្មេងសម័យមុន និងក្មេងជំនាន់ក្រោយ ហើយខ្ញុំហ៊ាននិយាយថាបើសិនជាព្រឹត្តិការណ៍នោះកើតឡើង ខ្ញុំនឹងទៅទិញសំបុត្រមុនគេហើយ ព្រោះអ្វីដែលតែងតែស្រម៉ៃចង់ឃើញIdol ខ្ញុំគាស់ចម្រៀងពីមុននិងឥឡូវមកបកស្រាយ ហើយណាមួយIdol វ័យកាន់តែច្រើនដែរហើយ »។
មានខមិនជាច្រើនទៀតបានសំណូមពរឲ្យលោកព្រាប សុវត្ថិ ច្រៀងSolo Concert ដើម្បីឲ្យអ្នកគាំទ្រទទួលយកបទពិសោធន៍ថ្មីពីលោក ប៉ុន្ដែអ្នកជំនាញសិល្បៈបានលើកឡើងថារឿងនោះពិបាកទៅរួច ព្រោះបើGalaxy រៀបចំការប្រគុំតន្រ្ដីឲ្យព្រាប សុវត្ថិ ច្រៀងខ្ទង់៤០បទ តែម្នាក់ឯងហើយសឹងតែ១០០% លោកច្រៀងបទនៅហង្សមាសនោះប្រាកដជាGalaxy មិនចង់ប្រូម៉ូតបទតារារបស់ខ្លួនច្រៀងនៅផលិតកម្មផ្សេងនោះទេ ។ប៉ុន្ដែព្រាប សុវត្ថិ អាចធ្វើរឿងនេះទៅបានប្រសិនបើអ្នករៀបចំការប្រគុំតន្រ្ដីនោះជាម្ចាស់Sponsor ដែលមិនមែនជាGalaxy ដែលពេលនោះលោកចង់ច្រៀងបទអ្វីក៍បានដែរ។
សូមបញ្ជាក់ថាព្រាប សុវត្ថិ ល្បីល្បាញខ្លាំងអំឡុងពេលជ្រកនៅហង្សមាសរយៈពេល២៣ឆ្នាំ(១៩៩៧-២០២០ )បើទោះជាគេដឹងថាបទចម្រៀងរបស់លោកភាគច្រើនបកប្រែពីបទថៃ និងចិន ក្ដី។ប៉ុន្ដែនៅពេលដែលព្រាប សុវត្ថិ ជ្រកនៅGalaxy ជាង៤ឆ្នាំនេះបទចម្រៀងរបស់លោកមិនសូវមានខ្លាំងៗដូចមុនទេ ហើយអ្វីដែលធ្វើឲ្យអ្នកស្ដាប់ធុញទ្រាន់នោះគឺលោកមានដៃគូតែម្នាក់គត់នោះគឺនាងតន់ច័ន្ទសីម៉ា ផ្ទុយពីនៅហង្សមាសលោកមានដៃគូបុប្ផាចម្រុះព័ណ។អ្នកជំនាញសិល្បៈលោកនូ ស៊ឹប ថាព្រាប សុវត្ថិ ទោះជាមានវ័យច្រើនបន្ដិចមែនតែសម្លេងនៅមិនទាន់ធ្លាក់ចុះទេ ហើយមូលហេតុដែលទៅGalaxy លែងសូវមានបទល្បីៗព្រាះតាំងពីឡើងជាឧកញ៉ាមកព្រាប សុវត្ថិ មិនផ្ដោតលើចម្រៀងទាំងស្រុងដូចមុនទេគឺងាកទៅរកស៊ីច្រើនជាង។
ក្រៅពីព្រាប សុវត្ថិ មាស សុខសោភា ក៍ត្រូវបានFanជម្រុញឲ្យធ្វើSolo Concert ដែរហេតុនេះគេចាំមើលថាតើកំពូលតារាចម្រៀងទាំងពីរដួងមួយណារៀបចំព្រឹត្តិការណ៍ធំច្រៀងម្នាក់ឯង៤០បទមុនគេ ?
