ភ្នំពេញ៖ការចេញបានត្រឹម៣បទ«Lost » ,« Better Off » និង«ស្រ្ដីសេរី»គេមិនអាចវាយតម្លៃថាស្រីស្រស់រ៉េត ស៊ូហ្សាណា ធ្វើបានល្អ ឬអន់ជាងកាលនៅហង្សមាសបានទេ ព្រោះនាងនៅត្រូវការពេលវេលាច្រើនបន្ថែមទៀត ដែលតាមព័តមានថាតារាធ្មេញចំពើសរូបនេះចុះកុងត្រាជាមួយផលិតកម្មបារមី ដល់ទៅ៥ឆ្នាំ ឯណ្ណោះ ។ប៉ុន្ដែអ្វីដែលគួរឲ្យកត់សម្គាល់ហ្សាណា ក្រោយចេញបទចុងក្រោយរបស់ខ្លួននៅទ្រនុំថ្មី «ស្រ្ដីសេរី » ធ្វើឲ្យតារាជើងចាស់របស់ហង្សមាសពេជ្រ សោភា ក៍ចាប់អារម្មណ៍ផងដែរ ខណៈដែលហ្សាណា ត្រូវបានថៅកែនាងលោកស្រីឡូរ៉ា ម៉ម ម្ចាស់ផលិតកម្មបារមី ផ្ដល់ទំនុកចិត្តដល់ស្រីក្មេងរូបនេះពេញទំហ៊ឹងតាមរយៈការអនុញ្ញាត្តិឲ្យនាងនិពន្ធបទចម្រៀង និងសាច់រឿងMV ដោយខ្លួនឯង ហើយក្រុមការងារផលិតកម្មទាំងមូលចាំគាំទ្រនាងពីក្រោយ ។សកម្មភាពរបស់ហ្សាណា នាពេលនេះបញ្ជាក់ថានាងមិនដូចនៅហង្សមាសដែលជ្រក៨ឆ្នាំ គ្រាន់តែជាតារាចម្រៀងម្នាក់ចាំតែច្រៀងបទផលិតកម្មទម្លាក់ឲ្យច្រៀង ហើយទាំងទំនុកច្រៀង ,និងការនិពន្ធMelody រួមទាំងសាច់រឿងMV ខាងផលិតកម្មជាអ្នករ៉ាប់រងទាំងអស់ដែលមានន័យថានាងចាំតែទទួលបញ្ជាធ្វើតាមនោះទេ ព្រោះពេលនេះកិច្ចការទាំងនោះនាងអាចសរសេរវាឡើងមកដោយខ្លួនឯងតែម្ដង ។អ្វីដែលពិសេសេនោះគឺនាងអាចច្រៀងបទណាដែលខ្លួនស្រលាញ់បានដូចជាការសរសេរប៉ារ៉ូលខ្មែរ លាយភាសារអង់គ្លេសជាដើម ។
ប្រភពបានឲ្យដឹងថាតាមពិតថៅកែហង្សមាសអ្នកឧកញ៉ាអ៊ឹង ឆៃងួន ក៍បានផ្ដល់សិទ្ធិឲ្យតារាមួយចំនួនអាចធ្វើបទចម្រៀងដោយខ្លួនឯងច្រៀងនៅហង្សមាសដែរ ឲ្យតែពួកគេមានសម្ថភាព ។ប៉ុន្ដែសម្រាប់ហ្សាណា ដែលមានវ័យទើបតែ២៤ឆ្នាំ នោះគេមិនដែលឃើញនាងចេះនិពន្ធបទចម្រៀង និងដឹកនាំសម្ដែងMv នៅហង្សមាស ដូចនាងច្រៀងឲ្យបារមី នេះឡើយ ។ចំណែករឿងដែលFan នាងហ្សាណា រង់ចាំនោះគឺគេចង់ឃើញស្រីស្រស់រូបនេះចាប់ដៃជាមួយតារារ៉េប លោកវណ្ណដា ដើម្បីធ្វើឲ្យទីផ្សារចម្រៀងរបស់នាងមានការបែប្រួល បើទោះជាពេលនេះថៅកែផលិតកម្មបានបិទជិតឈឹងមិនទម្លាយពីពេលវេលាពួកគេចេញបទចម្រៀងលើកទី១ជាលើកដំបូងជាមួយគ្នាក្ដី ។
គួររំលឹកថារ៉េត ស៊ូហ្សាណា ធ្លាប់ចាប់ដៃជាមួយតារាចម្រៀងប្រុស៣នាក់មកហើយក្នុងនោះមានដូចជាលោកដួង វីរៈសិទ្ធ ,សុវត្ថិ មុនីនាគ និងលីម តិចម៉េង ។តែក្នុងចំណោមដៃគូខាងលើនេះមានតែមុនីនាគ ប៉ុណ្ណោះដែលហ្សាណា ស្និតស្នេហ៍ជាងគេហើយឪពុកម្ដាយនាងមិនប្រឆាំងឡើយ ។ប៉ុន្ដែគួរឲ្យស្ដាយកាលពីឆ្នាំ២០២២ លោកស្រីឡុង ស្រីមុំ ម្ដាយរបស់មុនីនាគ បានប្រកាសថាកូនប្រុសគាត់គ្មានស្នេហាជាមួយហ្សាណា ទេ ទើបធ្វើឲ្យពួកគេលែងហ៊ានកៀកកើយគ្នាទៀត។ហ្សាណា ច្រើនបង្ហាញអារម្មណ៍ឯកោ និងទៅដើរលេងនៅបរទេសតែឯងៗ បន្ទាប់ពីអត់មុនីនាគ តែពេលនេះនាងត្រៀមចាប់ដៃជាមួយតារាលេងម៉ូដសាក់លោកវណ្ណដា ម្ដង បើទោះជាFan ចង់ឲ្យនាងនិងមុនីនាគ វិលមកជួបជុំគ្នាជាថ្មីក៍ដោយ ។
សម្រាប់អ្នកតាមដានសកម្មភាពសិល្បៈរបស់រ៉េត ស៊ូហ្សាណា លើកឡើងថាស្រីស្រស់រូបនេះចិត្តសឿង ព្រោះច្រៀងនៅហង្សមាស៨ឆ្នាំ នាងមានConcerts ពេញដៃ និងក្ដាប់ស្ពតធំៗ ជាច្រើន ដែលអាចរកប្រាក់ចំណូលបានជាច្រើនម៉ឺនដុល្លារក្នុង១ឆ្នាំៗ ប៉ុន្ដែពេលនេះបានហើរចោលហង្សមាសដោយគ្មានអាល័យ ដើម្បីបំពេញក្ដីស្រម៉ៃខ្លួនឯង នោះគឺការច្រៀងបទអ្វីដែលនាងស្រលាញ់ បើទោះជាការចេញបើកឆាកដំបូងគេឃើញ Views ចម្រៀងនាង បទខ្លះតិចជាងមុនក្ដី ។គេចាំមើលថាហ្សាណា ពេលប៉ះដៃគូទី៤ នាងទៅមុខ ឬថយក្រោយ?
