ភ្នំពេញ៖ពេជ្រ សោភា ត្រៀមចេញMV ទ្រង់ទ្រាយធំជាលើកដំបូងរបស់ខ្លួនទាក់ទងប្រាសាទរបស់ខ្មែរជាកេរ្ដិ៍មរតកដូនតាបន្សល់ឲ្យតាមរយៈបទ«ម្ចាស់កេរ្ដិ៍» ដែលបទនេះមានការសម្រិតសម្រាំងជាពិសេស ប៉ុន្ដែFull MV មានគុណភាពកម្រិតណានោះសោភា អត់ទាន់បញ្ចេញគឺបង្ហាញតែTrailer ។ទោះជាយ៉ាងណាបទប្រភេទនេះមុននេះនាងទេព បូព្រឹក្ស បានដើរមួយជំហ៊ានមុនសោភា តាមរយៈបទ«ទេវរាជ » ដែលMV នោះចំណាយលុយធំ និងធ្វើការសម្ពោធផ្អើលកោះពេជ្រទៀតផង តែចុងក្រោយលោកងួន ចាន់ដេវីត គូស្នេហ៍របស់បូព្រឹក្ស បានប្រកាសថាឈប់ផលិតMV ចំណាយលុយក្រាស់បែបនេះទៀតហើយ ព្រោះអត់បានការ ដែលរឿងនេះត្រូវបានគេសន្និដ្ឋានថាដេវីត អន់ចិត្តចំណាយអស់លុយដុល្លារទាំងបាច់ផលិតMV តែមួយបទ ប៉ុន្ដែអ្នកចូលមើលនៅតិចមិនដូចការរំពឹងទុក ពោលគឺ៤ខែបានត្រឹមតែ 1,6 M Views ។ប៉ុន្ដែសម្រាប់សោភា វិញគេរំពឹងថានឹងមានការគាំទ្រច្រើន ព្រោះជាតារាជើងចាស់ មានFan ច្រើន ហើយកន្លងមកនាងតែងតែបង្ហាញការឈឺចាប់ចំពោះប្រទេសជិតខាងដែលចង់បានប្រាសាទខ្មែរ ដែលជាកេរ្តិ៍មរតករបស់ដូនតាខ្មែរ ទើបនាងផលិតជាMV ឡើង។
សូមបញ្ជាក់ថាពេជ្រ សោភា បានចាប់អាជីពចម្រៀងនៅហង្សមាសគម្រប់២០ឆ្នាំគត់(២០០៤-២០២៤) ប៉ុន្ដែនៅរយៈពេលចុងក្រោយនេះគេសង្ស័យថាសោភា បានដើរចេញពីហង្សមាសទៅហើយអំឡុងពេលដែលតារាជាច្រើនបានបន្ដកន្ទុយគ្នាហើចេញពីហង្សមាសនេះ។តែនៅពេលអ្នកយកព័តមានយើងសាកសួររឿងនេះសោភា មិនធ្វើអត្ថាធិប្បាយអ្វីទាំងអស់ហើយនាងនាងបែជាងាកមកច្រៀងបទមរតកដើមដូចជាបទ«យ៉ងៗម៉ាឌូ » របស់លោកស្រីមាស សុម៉ាលី ទៅវិញ ។អ្វីដែលគួរឲ្យចាប់អារម្មណ៍ថ្មីៗនេះសោភា បានរំលឹកអនុស្សាវរីយ៍ដែលនាងចូលហង្សមាសឆ្នាំដំបូងប្រាប់ពិធីករលោកសុខ រ៉ាស៊ី នៅឆ្នាំគម្រប់ខួប២០ឆ្នាំនេះថាកាលនោះផលិតកម្មនេះមានរថយន្ដតែ១គ្រឿងដឹកតារាទៅថតMV តែពេលនេះក្រុមហ៊ុនមានអ្វីៗគ្រប់យ៉ាងទាំងអស់ដែលធ្វើឲ្យនាងពិតជាមានមោទនភាពខ្លាំង។សាររបស់សោភា នាពេលនេះហាក់ចង់បង្ហាញថា«អ្វីៗក៍មានចំណុចផ្ដើម និងទីបញ្ចប់ដែរ» ដែលរឹតតែធ្វើឲ្យគេសង្ស័យថានាងលែងជាតារាហង្សមាសទៀតហើយ ទើបនឹកឃើញរឿងចាស់ ។ប៉ុន្ដែយ៉ាងណាគេចាំអ៊ុតមើលថាតើសោភា នៅតែបន្ដធ្វើជាគ្រូបង្វឹគកម្មវិធីThe Voice Cambodia រដូវកាលទី៣ និងជាគណៈកម្មការBeat The Best រដូវកាលទី៣ ទៀតឬយ៉ាងណា ?
សូមបញ្ជាក់ថាពេជ្រ សោភា ហាក់តែលតោលនៅពេលដែលដៃគូសំខាន់របស់នាងគឺលោកព្រាប សុវត្ថិ បានចាកចេញពីហង្សមាសជាង៤ឆ្នាំ ទើបធ្វើឲ្យនាងលែងមានដៃគូយល់ចិត្ត បើទោះជានាងមិនដែលប្រកាន់ដៃគូពោលគឺតែងតែច្រៀងជាមួយតារាក្មេងៗរបស់ហង្សមាសក៍ដោយ។ប្រភពបានឲ្យដឹងថាកាលពីខែកញ្ញា ឆ្នាំ២០២០ សោភា ក៍ជាមុខសញ្ញានៃការតាមទិញរបស់Galaxy ដែរ តែចុងក្រោយនាងសម្រេចចិត្តបន្ដនៅហង្សមាសវិញ ប៉ុន្ដែនៅពេលដែលតារាហង្សមាសទាំងស្រីទាំងប្រុសដើរចេញពីផលិតកម្មមួយនេះបន្ដកន្ទុយគ្នា ទើបធ្វើឲ្យលេចឮថាសោភា អស់និស្ស័យជាមួយទ្រនុំចាស់នេះហើយក្រោយជ្រកកោនបាន២ទសវត្សន៍។
អ្នកជំនាញសិល្បៈបានលើកឡើងថាពេជ្រ សោភា អាចដើរតាមគន្លងមាស សុខសោភា ពោលគឺច្រៀងបង្ហោះលើផេកផ្ទាល់ខ្លួន ហើយពេលឡើងឆាកផ្សេងៗនាងច្រៀងបទល្បីៗរបស់ខ្លួនឡើងវិញដែលធ្វើឲ្យនាងនៅរក្សារបានលំនឹងទីផ្សារដដែល។ប៉ុន្ដែប្រសិនបើសោភា ព្រមទៅGalaxy នោះនាងនឹងបានជួបដៃគូចាស់ជាថ្មីគឺព្រាប សុវត្ថិ និងខេមរៈ សិរីមន្ដ តែសោភា នឹងក្លាយទៅជាគូប្រជែងយ៉ាងស្វិតស្វាញបំផុតជាមួយនាងតន់ ច័ន្ទសីម៉ា ជាមិនខាន។ដោយឡែកទាក់ទងរឿងស្នេហាវិញសោភា ដែលប្រកាសថាបានភ្ជាប់ពាក្យជាមួយលោកឆឹម សក្កដា កាលពីថ្ងៃទី១១ ខែ១១ ឆ្នាំ២០២២ នោះពេលនេះទាំងសងខាងព្យាយាមរក្សារគម្លាតពីគ្នារៀងៗខ្លួន ហើយរឿងរៀបការស្ងាត់ដូចចោលួចសេះ បន្ទាប់ពីឆាចោលកាលពីឆ្នាំ២០២៣៕
