អាមេរិក៖តារាចម្រៀងលោកម៉ម វាសនា ហៅដួង វីរៈសិទ្ធ បានចេញទៅច្រៀងសម្ដែងនៅអាមេរិក កាលពីថ្ងៃទី២៨ តុលា តាមរយៈសមាគម សុខាភិបាលខ្មែរ (Cambodian Health Professionals Association)នៅអាមេរិក ហៅអង្គការCHPAA ជាអ្នករៀបចំឲ្យលោកច្រៀង ដើម្បីរៃអង្គាសថវិកាជួយប្រជាជនក្រីក្រនៅខ្មែរ។នេះមិនមែនជាលើកទី១នោះទេ តែកាលពីឆ្នាំមុនៗលោក ក៍ធ្លាប់ទៅច្រៀងនៅទីនោះដែរ ខណៈដែលការសម្ដែងរបស់លោកចុងក្រោយនៅអាមេរិក គឺកាលពីឆ្នាំ២០២២ ។ ប្រភពបានឲ្យដឹងថាវីរៈសិទ្ធ ទទួលបានការគាំទ្រច្រើនពីអា ណិកជនខ្មែរនៅអាមេរិក ដោយសារតែលោកអាចច្រៀងបទមរតកដើមបានយ៉ាងពិរោះ និងចំណុចពិសេស លោកមិនជាប់ពាក់ព័ន្ធនយោបាយ ដូចតារាល្បីៗផ្សេងទៀតឡើយ ទើបរាល់ការច្រៀងសម្ដែងរបស់លោកតែងតែមានគេទិញសំបុត្រចូលទស្សនា ដើម្បីជួយដល់សមាគម និងមានជូនកាដូលើកទឹកចិត្តដល់តារារាម រូបនេះទៀតផង ។
ដួង វីរៈសិទ្ធ បានថ្លែងមុនឡើងយន្ដហោះទៅអាមេរិកថាលោកនឹងច្រៀងសម្ដែងនៅថ្ងៃទី២ ខែ១១ ឆ្នាំ២០២៤ នៅទីក្រុងLong Beach ទីតាំងនៅThe Westin Hotel Long Beach ដែលជាកម្មវិធីសប្បុរសធ័ម រៃអង្គាសថវិកាជួយព្យាបាលជំងឺប្រជាជនកម្ពុជា ក្នុងបេសកកម្មទី១៣ ។លោកថាអង្គការCHPAA បានចុះមកព្យាលបានជំងឺពលរដ្ឋខ្មែរចំនួន១២លើកមកហើយ និងបានព្យាបាលជំងឺប្រជាជនកម្ពុជាបានជាជិត៨ម៉ឺននាក់ ហើយលោកនឹងបន្ដបេសកម្មនេះជួយប្រជាជនក្រីក្រនៅខ្មែរតទៅទៀត តាមរយៈអង្គការមួយនេះ។
តាមព័តមានថាការចុះឡើងទៅអាមេរិកជាញឹកញាប់របស់លោកដួង វីរៈសិទ្ធ នេះក៍មាននារីអាណិកជនខ្មែរនៅទីនោះចាប់ចិត្តលើលោកដែរ ប៉ុន្ដែលោកសិទ្ធ ហាក់មិនចាប់អារម្មណ៍ឡើយពោលគឺច្រៀងចប់វិលមកស្រុកវិញភ្លាម។ចំពោះការចូលរួមធ្វើការសប្បុរសធ័មជាមួយអង្គការនៅបរទេស របស់វីរៈសិទ្ធ នេះដែរកន្លងមកគេឃើញសារព័តមានក្រៅស្រុកក៍ចាប់អារម្មណ៍និងសម្ភាសន៍លោកជាញឹកញាប់ដែរ ព្រោះសកម្មភាពរបស់លោកដើម្បីជួយពលរដ្ឋក្រីក្រនៅខ្មែរ ដែលនេះជាសកម្មភាពគំរូ ល្អហើយសម្រាប់សិល្បករផ្សេងទៀតនៅពេលដែលពួកគេល្បី កុំភ្លេចជួយដល់សង្គមជាតិរបស់ខ្លួនផង មិនមែនចេញច្រៀងគិតតែពីរឿងលុយ គិតតែពីតតំឡើងតម្លៃខ្លួន លេងតែម៉ូតឡាន និងវីឡារនោះទេ ។
គួរបញ្ជាក់ថាដួង វីរៈសិទ្ធ ជាម្ចាស់ពានI Am A Singer Cambodia រដូវកាលទី១ និងបានដើរចេញពីហង្សមាស ចូលរាម ហើយទោះជាពេលនេះតារារាម ល្បីៗ ចាកចេញពីផលិតកម្មនេះជាបន្ដបន្ទាប់ តែលោកនៅតែមិនទាន់ទៅជ្រកទ្រនុំថ្មីនោះទេ។លោកវីរៈសិទ្ធ ធ្លាប់ប្រាប់អ្នកយកព័តមានយើងថាលោកមិនបារម្ភពីការផ្លាស់ប្ដូរផលិតកម្មច្រៀងនោះទេ ព្រោះលោកទៅផលិតកម្មណា ឬច្រៀងចេញបទលើផេកខ្លួនឯងក៍នៅតែប៉ុណ្ណឹង ដោយសារតែបទចម្រៀងលោកភាគច្រើនលោកធ្វើបទដោយខ្លួនឯងព្រោះលោកអាចនិពន្ធទំនុកច្រៀង ,Mix ព្រមទាំងចេះលេងឧបករណ៍តន្ត្រីទាំងសម័យ និងបុរាណ ទៀតផង។តាមព័តមានថាGalaxy ក៍ចង់បានលោកវីរៈសិទ្ធ ដែរ ប៉ុន្ដែគេជឿថាភាគរយខ្ពស់លោកនឹងមិនទៅឡើយ ព្រោះមិនចង់ធ្វើជាតួរងម្ដងទៀតដូចកាលប៉ះព្រាប សុវត្ថិ និងខេមរៈ សិរីមន្ដ អំឡុងជ្រកនៅហង្សមាសជាមួយគ្នា ។អតីតតារាមហាហង្ស និងហង្សមាស រូបនេះមានមានឪពុកជាតន្រ្ដីករ(ស្លាប់) ម្ដាយជាតារាចម្រៀងបុរាណ ហើយបងប្រុសលោកឈ្មោះម៉ម សំនៀង ជាតារាចម្រៀង និងពិធីករ ព្រមទាំងចេះលេងតន្រ្ដីបុរាណយ៉ាងស្ទាត់ជំនាញផងដែរ។ដោយឡែកប្អូនប្រុសលោកម្នាក់ទៀតឈ្មោះម៉ម ពេជ្ជរិទ្ធ ជាតារាចម្រៀងដែលល្បីបទ”មិនអាចឃាត់ទេ “ ហើយចេះជំនាញនិពន្ធទំនុកច្រៀង ,លេងឧបករណ៍តន្រ្ដី ទាំងសម័យ និងបុរាណផងដែរ។
គេចាំមើលថាលោកដួង វីរៈសិទ្ធ ចុះឡើងអាមេរិក ញឹកបែបនេះលោកអាចនឹងបានប្រពន្ធនៅទីនោះដូចលោកសុវណ្ណ មុន្នី ,ខៀវ សំភេទ ,នៅ ស៊ីនឿន,មាស សាលី និងសុភា ដេវីត ជាដើម ដែរឬទេ ?
