ភ្នំពេញ៖ដូចការព្យាករណ៍មែននៅទីបំផុតរ៉េត ស៊ូហ្សាណា បានឡើងឆាកជាមួយតារារ៉េបវណ្ណដា ជាលើកដំបូងកាលពីថ្ងៃទី៣១ ខែតុលា ឆ្នាំ២០២៤ ក្នុងព្រឹត្តិការណ៍ប្រកួតកីឡាជាតិលើកទី៤ និងកីឡាជនពិការ លើកទី២ឆ្នាំ២០២៤ ប៉ុន្ដែពួកគេនៅមិនទាន់មានបទចម្រៀងច្រៀងឆ្លងឆ្លើយគ្នាតែពីរនាក់ផ្ដាច់មុខទេគឺច្រៀងជាក្រុមជាមួយតារាបារមី ផ្សេងទៀតដូចជាលោកវណ្ណថាន ណរិទ្ធ និងយូហៃ ជាដើម។ហ្សាណា -វណ្ណដា បានបង្ហាញអារម្មណ៍រីករាយដូចគ្នានៅពេលចាប់ដៃគ្នាជាលើកទី១នេះ ប៉ុន្ដែនៅលើបណ្ដាញសង្គមFan របស់ហ្សាណា ខ្លះបែជាយករូបភាពអតីតតារាចម្រៀងហង្សមាសរូបនេះមកTroll និងថានាងក្រៀមក្រំទៅវិញ ។ការដែលពួកគេលើកឡើងបែបនេះព្រោះតែពីមុនគេមិនដែលឃើញនាងហ្សាណា ច្រៀងចង្វាក់ថ្មីដូចការមកដល់បារមី នេះទេ ហើយគេធ្លាប់តែឃើញនាងច្រៀងជាដៃគូជាមួយលោកសុវត្ថិ មុនីនាគ ,ដួង វីរៈសិទ្ធ និងលីម តិចម៉េង ជាបទស្លូវ ហេតុនេះពេលច្រៀងជាមួយតារារ៉េបវណ្ណដា ទើបមានការលើកឡើងថាស្រីស្អាតរូបនេះមិនទាន់ស៊ីចង្វាក់ជាមួយដៃគូថ្មីនៅឡើយ រហូតខ្លះថានាងចុះពីលើឆាកទឹកមុខមិនរីករាយទៀតផង តែអ្នកតាមដានសកម្មភាពតារាមួយចំនួនថាហ្សាណា មិនសប្បាយចិត្តព្រោះអំឡុងពេលច្រៀងជាមួយវណ្ណដា នោះភ្លៀងធ្លាក់ខ្លាំង ពេក។
ទោះជាយ៉ាងណានៅលើបណ្ដាញសង្គមនាងរ៉េត ស៊ូហ្សាណា បង្ហាញអារម្មណ៍មានមោទនភាពចំពោះការមានឱកាសច្រៀងព្រឹត្តិការណ៍ដ៍ធំនោះដោយនាងថាសម្លេងហ៊ោទាំងនោះនៅដក់ជាប់បេះដូងនាងនៅឡើយ ។នាងក៍ថាតំណក់ទឹកភ្លៀងមិនមែនជាឧបស័គ្គការច្រៀងសម្ដែងរបស់នាងទេ។
គួរបញ្ជាក់ថារ៉េត ស៊ូហ្សាណា បានចូលផលិតកម្មបារមី ជាង២ខែមកហើយ ក្រោយពីនាងឈរជើង នៅហង្សមាសជាង៨ឆ្នាំ ។ជ្រកនៅទ្រនុំថ្មីជាង៦០ថ្ងៃហ្សាណា ចេញបាន៣បទនោះគឺ«Lost »,«Better Off » និងបទ«ស្រ្ដីសេរី » ។ប្រភពបានឲ្យដឹងថាហ្សាណា នឹងចាប់ដៃគូច្រៀងបទថ្មីតែពីរនាក់ជាមួយវណ្ណដា នាពេលខាងមុខដែលពេលនោះនាងនឹងកាន់តែប្លែកជាងពេលនេះទៅទៀត ព្រោះផ្លាស់ប្ដូរបច្ចេកទេសច្រៀងពីស្លូវទៅជារ៉េប វិញម្ដង ហើយគេក៍អាចវាយតម្លៃបានហើយថាតើតារាមានត្រេមុខដូចកូនកាត់ជប៉ុនរូបនេះ នឹងឡើងឬចុះ ក្រោយដើរចេញពីហង្សមាសមករួមជ្រកនៅទ្រនុំជាមួយវណ្ណដា តែការចេញទើបបាន៣បទ គេមិនទាន់អាចវាយតម្លៃថាទីផ្សារចម្រៀងរបស់នាងចុះខ្សោយ ឬខ្លាំងនោះទេ ។
គេកត់សម្គាល់ថាមុនរ៉េត ស៊ូហ្សាណា ក្លាយទៅជាដៃគូរបស់វណ្ណដា នេះនៅលើបណ្ដាញសង្គមមានការលើកឡើងចង់ឲ្យនាងច្រៀងឆ្លងឆ្លើយជាមួយសុវត្ថិ មុនីនាគ កូនឧកញ៉ាព្រាប សុវត្ថិ ក្រោយពួកគេល្បីបទ«សុំខុសមួយយប់ » អំឡុងច្រៀងរួមគ្នានៅហង្សមាស និងធ្លាប់មានការសង្ស័យថាពួកគេជាគូស្នេហ៍និងគ្នា។ប៉ុន្ដែរឿងនេះពិបាកអាចពិបាកទៅរួចដោយសារតែហ្សាណា ក្លាយទៅជាដៃគូរបស់វណ្ណដា ហើយមុនីនាគ ត្រូវឪពុកជួលគ្រូបរទេសមកបង្រៀនច្រៀងរាំ ដែលអាចនឹងមិនទៅរួមទ្រនុំជាមួយហ្សាណា ជាលើកទី២នោះទេ តែភាគរយខ្ពស់ទៅGalaxy ច្រើនជាង។គេរងចាំមើលថាស្រីស្រស់ធ្មេញចំពើសនាងហ្សាណា អាចទាញមុនីនាគ មករួមទ្រនុំជាមួយនាងតាមការចង់ឃើញរបស់Fan ដែរ ឬនាងជាប់ចិត្តតារាលេងម៉ូដសាក់វណ្ណដា ភ្លេចមុនីនាគ ?
