ភ្នំពេញ ៖ ស្ត្រីម្នាក់ កំពុងជិះម៉ូតូ១គ្រឿង តាមផ្លូវ តែម្នាក់ឯង ដោយក្រវាត់កាបូបលុយ ជាប់ចង្កេះ ស្រាប់តែរំពេចនោះ មានជនសង្ស័យម្នាក់ ជិះម៉ូតូ ១គ្រឿង មកអែប រួចធ្វើសកម្មភាពឆក់យកកាបូបលុយបានសម្រេច និងធ្វើឱ្យស្ត្រីរងគ្រោះដួលម៉ូតូ រងរបួសធ្ងន់ ចំណែកជនសង្ស័យបានយកកាបូប ជិះម៉ូតូគេចបាត់ដោយសុវត្ថិភាព។
ករណីនេះ បានកើតឡើង កាលពីវេលាម៉ោង១១និង៤៥នាទីព្រឹក ថ្ងៃទី០២ ខែវិច្ឆិកា ឆ្នាំ២០២៤ នៅតាមផ្លូវជាតិលេខ៤ ត្រង់ចំណុចខាងលិចផ្លូវរថភ្លើងខ្សែភ្នំពេញ-ព្រះសីហនុ មុខបុរីញូវថោន ស្ថិតនៅក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ។
ស្ត្រីរងគ្រោះ មិនត្រូវបានស្គាល់អត្តសញ្ញាណនោះទេ គ្រាន់តែដឹងថា មានអាយុប្រមាណជាង៤០ឆ្នាំ ជិះម៉ូតូ ១ គ្រឿង ម៉ាក Suzuki Let’s ពណ៌ស លាយទឹកប្រាក់ ពាក់ស្លាកលេខ ភ្នំពេញ 1HI-9869។ ចំពោះទ្រព្យសម្ប ត្តិបាត់បង់រួមមាន កាបូបក្រវាត់ចង្កេះ១ ដែលនៅក្នុងកាបូបនោះមានប្រាក់ចំនួន ៥ម៉ឺនរៀល ទូរស័ព្ទម៉ាកណូគាអិនចុចពិល ១គ្រឿង និងម៉ាកអូបប៉ូ ១គ្រឿង។ ដោយឡែកជនសង្ស័យ ជិះម៉ូតូ ១គ្រឿង ម៉ាកហុងដា ឌ្រីម សេ១២៥ ពណ៍ខ្មៅ មិនចាំស្លាកលេខ។
តាមប្រភពស្ត្រីរងគ្រោះ បានរៀបរាប់ប្រាប់ថា មុនពេលកើតហេតុ គាត់បានជិះម៉ូតូ ធ្វើដំណើរតាមផ្លូវជាតិលេខ៤ ក្នុងទិសដៅដៅពីលិច ទៅកើត តែម្នាក់ឯង ដោយបានក្រវាត់កាបូបនៅជាប់ចង្កេះផង។ លុះពេលទៅដល់ត្រង់ចំណុចកើតហេតុ ស្រាប់តែមានជនសង្ស័យម្នាក់ ជិះម៉ូតូ ១គ្រឿង ម៉ាកហុងដា ឌ្រីម សេ១២៥ ដេញតាមពីក្រោយ ធ្វើសកម្មភាពឆក់កាបូបលុយបានសម្រេច និងធ្វើឱ្យគាត់ដួលម៉ូតូរងរបួស រលាត់ដៃជើង ចំណែកជនសង្ស័យអត់ដួលទេ ហើយក្រោយពេលឆក់បានសម្រេច ក៏បានយកកាបូបជិះម៉ូតូគេចខ្លួនបាត់ដោយសុវត្ថិភាព។
ក្រោយពេលកើតហេតុ ប្រជាពលរដ្ឋដែលស្ថិតនៅជិតកន្លែងកើតហេតុនោះ បាននាំគ្នាជួយលើកស្ត្រីរងគ្រោះ គ្រាហ៍ដើរចេញពីផ្លូវ និងជួយអូសម៉ូតូចេញ បន្ទាប់មកស្ត្រីរងគ្រោះ បានទៅកាន់គ្លីនិកមួយកន្លែង ដើម្បីព្យាបាលរបួសដោយខ្លួនឯង៕