ភ្នំពេញ៖ឈិន ម៉ានិច្ច បានបណ្ដើរប្រុសស្នេហ៍ថ្មីជាចំហ ចូលរួមមង្គលការរបស់សុភ័ក្រ្ដ កុសុម៉ា កាលពីថ្ងៃទី៤ វិច្ឆិកា ដែលបុរសវ័យខ្ទង់៣០ក្រាស់រូបនោះកាន់ដៃនាងជាប់តែម្ដង ។ប៉ុន្ដែអ្វីដែលគួរឲ្យចាប់អារម្មណ៍ប្រុសស្នេហ៍នាងម៉ានិច្ច នេះមិនមែនជាបុរសដែលធ្លាប់ជូននាងទៅប្រលងចម្រៀងCambodian Idol និងតែងតែដឹកនាងទៅច្រៀងតាមឆាកតន្រ្ដីនោះទេ ទើបអ្នកលេងបណ្ដាញសង្គមលើកឡើងថាម៉ានិច្ច បែកសង្សារចាស់ មានសង្សារថ្មីហើយ ។
ម្ចាស់តិកតុកឈ្មោះMaly ខមិនថា«ចុះពូម្នាក់ដែលជូនគាត់ទៅប្រលងនោះ?», ស្រាប់តែម្ចាស់តិកតុកឈ្មោះSe Sotheany ខមិនដាក់ស្ទីគ័ររូបសើចថា «ដល់ត្រើយហើយបង »។
ឈិន ម៉ានិច្ច បានភ្ជាប់សំណេរក្រោមរូបនាងនិងសង្សារឈរក្បែសុភ័ក្រ្ដ កុសុម៉ា នោះថា«ជីវិតម្នាក់ៗ ប្រើបែបណាក៍បានដែរ សូមឲ្យតែវាស្ថិតក្នុងសេចក្ដីល្អ » ។តារារួមអាជីពជាច្រើនបានចូលទៅខមិនសាទរ ម៉ានិច្ច ដែលរកបានដៃគូជាបុរសរូបសង្ហារ តែខ្លះឆ្ងល់ថាម៉េចបានប្រុសនោះកាន់ដៃនាងជាប់ស្អិតដូចតុកកែ អត់ព្រមព្រលែងសោះបែបនេះ ?ម៉ានិច្ច បានឆ្លើយតបតាមរយៈរូបស្ទីគ័រទៅអ្នកខមិនដោយរូបសំពះ និងបេះដូង បញ្ជាក់ថានាងទទួលស្គាល់ថាប្រុសដែលកៀកកើយនាងនោះគឺជាម្ចាស់បេះដូងនាងពិតប្រាកដមែន ។
សូមបញ្ជាក់ថាឈិន ម៉ានិច្ច (ឈិន ស្រីនិច្ច)ជាម្ចាស់ពានCambodian រដូវកាលទី២ បន្ទាប់ពីនាងបានបរាជ័យលើកពានThe Voice Cambodia រដូវកាលទី១ ។ស្រីនិច្ច មានសម្លេងពិរោះរណ្ដំចិត្តពិសេសច្រៀងបទស្លូវចាប់ដៃជាមួយលោកដួង វីរៈសិទ្ធ ប៉ុន្ដែនាងមិនសូវលេចធ្លោឡើយ ដោយសារតែការមិនសូវមានមុខលើសារព័តមាន ព្រោះនាងមិនផ្ដល់បទសម្ភាសន៍ដល់អ្នកកាសែតនោះទេ ។តាមប្រភពថាបុរសម្នាក់ដែលគេជឿថាជាគូស្នេហ៍របស់នាងធ្លាប់ជូននាងទៅប្រលងចម្រៀង និងឡើងឆាកគ្រប់ស្ថានីយ៍ទូរទស្សន៍ ពេលនាងមិនទាន់ល្បីនោះ បែកនាងទាំងមិនអស់ចិត្តឡើយ ។ប៉ុន្ដែនាងម៉ានិច្ច មិនធ្លាប់ទម្លាយពីមូលហេតុដែលនាងនិងសង្សារចាស់ចែកផ្លូវគ្នានោះទេ ខណៈដែលអ្នកលេងបណ្ដាញសង្គមខ្លះបានរិះគន់នាងថាកាលមិនទាន់ល្បីស្អិតល្មូតជាមួយសង្សារកម្សត់ តែពេលបានល្បីប្ដូរយកសង្សារថ្មី …។តែសម្រាប់អ្នកសិល្បៈរួមអាជីពបានសរសើរថានាងភ្នែកមុតរកបានសង្សារសង្ហារ ហើយខ្លះជម្រុញឲ្យនាងឆាប់ចូលរោងការដូចនាងសុភ័ក្រ្ដ កុសុម៉ា ទៀតផង។
អ្នកជំនាញសិល្បៈលើកឡើងថាឈិន ម៉ានិច្ច ពិបាកឈានទៅរកចំណុចកំពូល ព្រោះនាងច្រៀងស៊ីតែបទស្លូវ និងមរតកដើម មិនអភិវឌ្ឍន៍ខ្លួនទៅជាមានក្រុមរាំអមអាជីព ឬផលិតបទញាក់ឲ្យដើរទន្ទឹមបទស្លូវដូចតារាល្បីៗផ្សេងទៀតឡើយ ទើបពិបាកប្រជែងទីផ្សារជាមួយតារាស្រីល្បីៗដូចសព្វថ្ងៃ។ប៉ុន្ដែនៅលើហ្វេសបុកនាងម៉ានិច្ច ថាគ្រាន់តែក្នុងខែវិច្ឆិកា ឆ្នាំ២០២៤ នេះនាងចេញច្រៀងសម្ដែងដល់ទៅ៨កម្មវិធី ដែលបញ្ជាក់ថាអាចរកលុយបានរាប់ពាន់ដុល្លារក្នុង១ខែៗ ហើយនាងថាសិល្បៈជាការងារដែលនាងស្រលាញ់បំផុត។តារាចម្រៀងដែលមានស្រុកកំណើតនៅខេត្តកំពង់ស្ពឺ និងធ្លាប់ច្រៀងពេលរាត្រីនៅហាងម្ដុំព្រែកលាភ រូបនេះក្រោយលើកពានជិត៨ឆ្នាំ នាងមានជីវភាពធូធា ខុសឆ្ងាយពីមុនស្រឡះ ទិញបានផ្ទះល្វែង និងជិះ រថ យន្ដទំនើបម៉ាកJeep Rubicon ទៀតផង។ម៉ានិច្ច ក៍គ្មានដំណឹងដើរចេញពីហង្សមាសដែរ ខណៈដែលមិត្តរួមអាជីពបានចាកចេញពីផលិតកម្មនេះជាបន្ដបន្ទាប់ ប៉ុន្ដែនាងនៅតែពិបាកឈានទៅប្រជែងតំណែងតារាស្រីលំដាប់ជូរមុខរបស់ហង្សមាសដដែល ព្រោះតែបទចម្រៀងចេញមិនដិតដល់លើទីផ្សារ ហើយនាងក៍គ្មានក្រុមផលិតបទចម្រៀងផ្ទាល់ខ្លួនដូចតារាមួយចំនួនទៀតដែរ ។
Fan ចាំមើលថាតើចំណងស្នេហាថ្មីនាងឈិន ម៉ានិច្ច អាចឈានទៅដល់ចំណុចដឹកដៃគ្នាចូលរោងការដែរ ឬទេ ?
