ភ្នំពេញ ៖ បុរសម្នាក់ បានបើករថយន្តទំនើប ១គ្រឿង រវល់តែឈ្ងោកចុចទូរស័ព្ទ មិនបានមើលផ្លូវ ធ្វើឱ្យរេចង្កូតរថយន្តទៅបុកបង្គោលថ្មអមបង្គោលភ្លើង ពេញទំហឹង បណ្តាលឱ្យរងការខូចខាតរថយន្តផ្នែកខាងមុខយ៉ាងដំណំ។
ហេតុការណ៍គ្រោះថ្នាក់នេះ បានកើតឡើង កាលពីវេលាម៉ោង ១០និង៤៥នាទីយប់ ថ្ងៃទី០៧ ខែវិច្ឆិកា ឆ្នាំ២០២៤ ស្ថិតនៅតាមបណ្តោយផ្លូវ៣៧១ (បុរីសូនី) សង្កាត់ស្ទឹងមានជ័យទី៣ ខណ្ឌមានជ័យ។
តាមប្រភពព័ត៌មានពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញរថយន្តទំនើប ១គ្រឿង ម៉ាក Ford Ranger Raptor ពណ៌ខ្មៅ ពាក់ស្លាកលេខ ភ្នំពេញ 2CC-7237 បើកបរដោយបុរសម្នាក់ ធ្វើដំណើតាមបណ្តោយផ្លូវលេខ៣៧១ (បុរីសូនី) ទិសដៅពីលិច ទៅកើត ខណៈមកដល់ចំណុចកើតហេតុ រវល់តែឈ្ងោកចុចទូរស័ព្ទ ស្រាប់តែរថយន្តរេចង្កូតមកខាងស្តាំដៃ រួចជ្រុលបុកបង្គោលថ្មអមបង្គោលភ្លើង បណ្តាលឱ្យរថយន្តខូចខាតផ្នែកមុខខាងស្តាំ បែកកង់ ផ្ទុះពោងសុវត្ថិភាព។
ក្រោយពេលកើតហេតុ សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានចុះមកធ្វើការវាស់វែង រួចអូសយករថយន្តខាងលើ ទៅរក្សាទុក រង់ចាំដោះស្រាយនៅពេលក្រោយ៕
