ភ្នំពេញ៖កាលនៅRock លោកខាន់ មករា ហៅខាន់ ជេមស៍ ជាសេ្ដចត្រាញ់ ឬតួឯកដែលមានបទចម្រៀងល្បីៗជាច្រើនបទ ខណៈដែលទៅដល់សាន់ដេលោករក្សារបានកេរ្តិ៍ឈ្មោះមធ្យម ព្រោះពេលនោះលោកឆាយ វីរៈយុទ្ធ និងខេមរៈ សិរីមន្ដ មានប្រៀបជាង។តែនៅពេលដែលលោកមករា មកដល់Galaxy តារាកូន៤រូបនេះកាន់តែពិបាកដណ្ដើមភាពលេចធ្លោជាងមុនទៅទៀត ព្រោះលោកព្រាប សុវត្ថិ និងខេមរៈ សិរីមន្ដ គឺជាតួឯក ខណៈដែលលោកជេមស៍ ក៍មិនដឹងថាយកតំណែងលេខ៣បានឬអត់នោះទេ ដោយសារតែសិស្សប្អូនខ្លួនគឺលោកខេម ក៍មិននៅក្រោមលោក ដែរ ។អ្នកខ្លះថាលោកជេមស៍ អាចនឹងព្រមធ្វើជាតួរង ឬឈរលំដាប់ទី៤ ដែលបញ្ហានេះបណ្ដាលថាមកពីលោកត្រូវផលិតកម្មមើលរំលង តែខ្លះទៀតថាលោកមករា កំពុងដើរលើផ្លូវជាន់បន្លា ព្រោះតែទៅជ្រកនៅទ្រនុំមួយដែលប្រជុំទៅដោយតារាប្រុសខ្លាំងៗជាងខ្លួន ហេតុនេះមិនអាចវ៉ា ព្រាប សុវត្ថិ និងខេមរៈ សិរីមន្ដ បាននោះទេ ។ប៉ុន្ដែលោកជេមស៍ អាចនឹងគ្មានគម្រោងដើរចេញពីGalaxy ឆាប់ៗឡើយ ព្រោះតែថៅកែផលិតកម្មនេះបានទទួលយកកូនស្រីរបស់លោកមកធ្វើជាតារាចម្រៀងបើទោះជានាងមិនធ្លាប់ឆ្លងកាត់ការប្រលងច្រៀងតាមកម្មវិធីណាមួយក៍ដោយ ពោលគឺចូលឆៅៗតែម្ដង ។ប្រភពថាលោកជេមស៍ ក៍គ្រោងយកកូនប្រុសម្នាក់ទៀតចូលជ្រកនៅGalaxy ផងដែរ ពោលគឺធ្វើដូចលោកព្រាប សុវត្ថិ ដែរ ព្រោះក្នុងចំណោមកូន៤នាក់(ស្រី២)លោកមករា ជម្រុញឲ្យពួកគេក្លាយទៅជាតារាចម្រៀងទាំងអស់ ។
តាមព័តមានថាលោកខាន់ ជេមស៍ ដែលច្រៀងហាក់នៅទ្រឹងចុងក្រោយនេះក៍ស្ថិតក្នុងបញ្ជីតារាដែលGalaxy នឹងរុញឲ្យឡើងជាឧកញ៉ាដូចព្រាប សុវត្ថិ និងខេមរៈ សិរីមន្ដ ដែរនាពេលដ៍ឆាប់ៗ ហើយពេលនោះលោកមករា អាចនឹងត្រូវសិស្សប្អូនគោរពជាងពេលនេះជាមិនខាន បើទោះជាគេនៅមិនច្បាស់ថារវាងលោកជេមស៍ និងខេម ថៅកែឲ្យឡើងឧញ៉ា១ណាមុនក៍ដោយ។អ្វីដែលគួរឲ្យកត់សម្គាល់អំឡុងពេលដែលលោកជេមស៍ មានកូនប្រុសស្រីកំលោះក្រមុំស្រាងអស់ទៅហើយនេះ លោកមករា ក៍បានបង្ហាញនូវភាពផ្អែមល្ហែមស្នេហ៍ជាមួយប្រពន្ធដូចគ្នាទៅនិងលោកព្រាប សុវត្ថិ ,ឆាយ វីរៈយុទ្ធ និងខេមរៈ សិរីមន្ដ ដែរ តែអត់ដំណឹងលោកតាមយកកូនទី៥ ។ប្រភពបានឲ្យដឹងថាលោកជេមស៍ គ្មានមហិច្ឆិតា យកតំណែងលេខ១នៅGalaxy នោះទេ តែលោកក៍មិនបណ្ដោយខ្លួនឲ្យធ្លាក់ដល់បាតដែរ ហើយនាពេលខាងមុខលោកថែមទាំងមានគម្រោងចាប់ដៃច្រៀងជាមួយកូនស្រីខ្លួនទៀតផង។
សូមបញ្ជាក់ថាខាន់ ជេមស៍ មុនបណ្ដើរកូនស្រីទៅជ្រកនៅGalaxy នោះលោកក៍ធ្លាប់បើកផលិតកម្មខ្លួនឯងដែរ ដោយអតីតតារាសាន់ដេរូបនេះប្រាប់ថាផលិតកម្មនេះសម្រាប់តែលោកនិងកូនទាំង៤ ។ប៉ុន្ដែចុងក្រោយលោកជេមស៍ បានប្ដូរយុទ្ធសាស្រ្ដវិញដោយផ្អាកផលិតកម្មរបស់ខ្លួនដែលគេជឿថាបញ្ហានេះព្រោះតែខ្វះធនធានសម្រាប់ផលិត ហើយបើបើកផលិតកម្មមួយច្រៀងតែឪនិងកូន តើឲ្យអ្នកណាស្ដាប់ទៅ ?ហេតុនេះហើយបានជាលោកចូលជ្រកនៅGalaxy បើទោះជាពេលនេះលោកមិនអាចក្លាយទៅជាតួឯកដូចកាលពីនៅRock ក្ដី តែបានឲ្យកូនស្រីធ្វើជាតារាចម្រៀងម្នាក់តាមបំណង ។
ក្រៅពីលោកខាន់ ជេមស៍ តារាចម្រៀងដែលកំពុងឲ្យកូនដើរតាមគន្លងរបស់ខ្លួននោះមានដូចជាលោកហួរ ឡាវី ,ព្រាប សុវត្ថិ ,អ្នកនាងម៉េង កែវពេជ្ជតា ,កែវ កល្យាណ និងសឿន ផាភួង ជាដើម ៕
