ភ្នំពេញ ៖ បុរសម្នាក់បានបើកបររថយន្ត ១គ្រឿង ក្នុងល្បឿនលឿន រេចង្កូតទៅបុកក្បាលនាគថ្មពុះចែកទ្រូងផ្លូវ បណ្តាលឱ្យក្រឡាប់ផ្ងារជើងទ្រមេឃ សំណាងល្អមិនបង្កឱ្យមានគ្រោះថ្នាក់ដល់មនុស្សណាម្នាក់ឡើយ។ ចំណែកតៃកុងរថយន្ត និងនារីម្នាក់ទៀត ជាអ្នករួមដំណើរ ត្រូវបានជួយសង្គ្រោះចេញពីក្នុងរថយន្តភ្លាមៗ។
ហេតុការណ៍នេះ បានកើតឡើង កាលពីវេលាម៉ោង៨យប់ ថ្ងៃទី២៧ ខែវិច្ឆិកា ឆ្នាំ២០២៤ ស្ថិតនៅតាមបណ្តោយផ្លូវបេតុង ក្នុងបរិវេណកោះពេជ្រ ក្នុងសង្កាត់ទន្លេបាសាក់ ខណ្ឌចំការមន។
តាមប្រភពព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញរថយន្ត១គ្រឿង ម៉ាកតីយ៉ូតា កូរ៉ូលឡា ពណ៌ក្រហម ពាក់ស្លាកលេខ ភ្នំពេញ 2F-7479 បើកបរដោយបុរសម្នាក់ រួមដំណើរជាមួយនារីម្នាក់ទៀត ធ្វើដំណើរតាមបណ្តោយផ្លូវបេតុងកោះពេជ្រ ទិសដៅ ពីជើង ទៅត្បូង ក្នុងល្បឿលលឿនល្មម ខណៈមកដល់ចំណុចកើតហេតុ រថយន្តបានជ្រុលទៅបុកក្បាលនាគថ្មពុះចែកទ្រូងផ្លូវ បណ្តាលឱ្យក្រឡាប់ផ្ងារជើងតែ ម្តង។ ភ្លាមៗនោះក្រុមសន្តិសុខដែលនៅការពារក្នុងតំបន់កោះពេជ្រ បាននាំគ្នាជួយទាញយកមនុស្សដែលនៅខាងក្នុងចេញមកក្រៅ តែសំណាងល្អ ក្នុងហេតុការណ៍នេះមិនបង្កគ្រោះថ្នាក់ធ្ងន់ដល់អ្នកនៅក្នុងរថយន្ត ឬអ្នកដទៃឡើយ។
ក្រោយពេលកើតហេតុ បុរសជាម្ចាស់រថយន្តបង្កហេតុ បានសងសំណងការខូចខាត ចំនួន៣០ម៉ឺនរៀល ប៉ុន្តែត្រូវបានប្រធានគ្រប់គ្រងនៅក្នុងកោះពេជ្រ ប្រគល់ជូនវិញ ដោយឃើញថាការបុកប៉ះនេះ គឺតិចតួច មិនមានបង្កការបាក់បែកទ្រូងផ្លូវនោះទេ រួចក៏បានអនុញ្ញាតឱ្យម្ចាស់រថយន្ត ស្ទូចយករថយន្តនោះទៅជួសជុលដោយខ្លួនឯង៕
