ភ្នំពេញ៖ខុសពីនាងឈិន ម៉ានិច្ច ម្ចាស់ពានCambodian Idol រដូវកាលទី២ ដែលចូលចិត្តសាមញ្ញៗ តែនាងលីន សោម៉ា ដែលជាម្ចាស់ពានBeat The Best រដូវកាលទី២ វិញនាងហាក់លេងខ្លួន និងមានសម្រស់ត្រដែតជាងសិស្សច្បង បន្ទាប់ពីបានកែច្រមុះយកហុងស៊ុយ ខណៈដែលបុរសតាមស្នេហានាងស្និតជាងគេគឺសិស្សច្បងរបស់នាងលោកសួរ វិចិត្រ ដែលតាមនាងដល់បន្ទប់ជួលតែម្ដង រហូតមានពេលខ្លះសុំស្រីស្រស់ថើប១មុនទៅផ្ទះវិញទៀតផង ។ប៉ុន្ដែទំនាក់ទំនងរវាងសិស្សច្បង និងសិស្សប្អូនរូបនេះនៅស្ថិតក្នុងភាពស្រពិចស្រពិលនៅឡើយ ព្រោះនាងសោម៉ា ធ្លាប់វាចាថារាប់អានគ្នាធម្មតា ហើយស្និតគ្នាតែពេលត្រូវទៅច្រៀងជាមួយគ្នាប៉ុណ្ណោះ ដែលការអះអាងបែបនេះហាក់ផ្ទុយពីការពិតទាំងស្រុង។
សូមបញ្ជាក់ថានាងលីន សោម៉ា បានក្លាយជាតារាចម្រៀងហង្សមាសក្រោយលើកពានBeat The Best 2024 កាលពីខែ៦ ហើយ៥ខែមកនេះនាងទើបតែចេញបាន១បទប៉ុណ្ណោះគឺ«មិនចេះតាមដាន » ដែលបញ្ជាក់ថាទីផ្សារចម្រៀងរបស់នាងមិនដិតដល់ឡើយ ។តែនាងសោម៉ា មានឱកាសបានចេញច្រៀងសម្ដែងតាមបណ្ដារក្រុមហ៊ុនAgency និងឆាកហង្សមាសជាច្រើនកម្មវិធី ខណៈដែលនាងមានជំនាញច្រៀងបទមរតដើម ជាងបទសម័យ ។
គួរកត់សម្គាល់ថាលីន សោម៉ា អាយុ២១ឆ្នាំ មានស្រុកកំណើតនៅខេត្តត្បូងឃ្មុំ ដែលក្រៅពីលោកសួរ វិចិត្រ មិនទាន់មានតារាប្រុសណាស្និតនាងរហូតហ៊ានចូលទៅដល់បន្ទប់នាងនោះឡើយ ។ប្រភពខ្លះថានាងសោម៉ា ទុកចិត្តសិស្សច្បងម្នាក់នេះជាងគេ ព្រោះតែពេលនេះនាងមិនទាន់មានរថយន្ដជិះផ្ទាល់ខ្លួនទេ ហេតុនេះពេលទៅច្រៀងនៅខេត្តមានតែពឹងលោកវិចិត្រ ឲ្យជូននាងទៅ ប៉ុន្ដែរឿងដែលសិស្សច្បងចេះតែសុំថើបញយៗដង នេះប្រសិនបើនាងនៅស្ងៀមតទៅទៀត ច្បាស់ជាមានរឿងធំជាមិនខាន បើទោះជានាងមិនដែលបណ្ដាយឲ្យលោកវិចិត្រ ថើបនាងតាមចិត្តចង់ក្ដី ។
ក្រៅពីនាងលីន សោម៉ា មានតារាស្រីជាច្រើនបានកែខ្ទង់ច្រមុះយកហុងស៊ុយដូចជាមាស សុខសោភា ,នី មុនីនាថ ,បេប៊ី ,តន់ ច័ន្ទសីម៉ា ,ឱក សុគន្ធកញ្ញា ,សុខ ពិសី ,ថន លក្ខិណា និងពេជ្រ សោភា (វះស្លាបច្រមុះ) ជាដើម តែក្នុងនោះគាគច្រើនអត់ព្រមទទួលស្គាល់ លើកលែងតែនាងសោម៉ា ម្នាក់។សម្រាប់នាងលីន សោម៉ា វិញគ្មានដំណឹងនាងចង់កែសម្រស់ផ្នែកផ្សេងៗទៀតនោះទេ ព្រោះតាមព័តមានថាឪពុកម្ដាយនាងមិនអនុញ្ញាត្តិឲ្យស្រីស្រស់កែកន្លែងសំខាន់ៗជាងនេះឡើយ ព្រោះខ្លាចប្រឈាមហានិភ័យនៅថ្ងៃក្រោយ ។
ថ្វីត្បិតតែនាងលីន សោម៉ា កាន់តែស្និតស្នេហ៍លោកសួរ វិចិត្រ ក្ដី តែពេលនេះហង្សមាសនៅមិនទាន់ផលិតបទចម្រៀងណាឲ្យនាងច្រៀងជាដៃគូឡើយ ហើយប្រសិនបើកន្លះឆ្នាំចេញបានតែ១បទបែបនេះ គេជឿថាកុំថាឡើយអាចប្រជែងជាមួយផលិតកម្មផ្សេង ទោះជាមួយតារារួមទ្រនុំក៍ពិបាកនឹងទៅរួចដែរ ។តែនាងសោម៉ា ដែលមានរូបសម្រស់គួរឲ្យក្នក់ក្នាញ់ក្រោយកែច្រមុះនេះអាចនឹងត្រូវហង្សមាសមិនមើលរំលងឡើយ បន្ទាប់ពីតារាស្រីល្បីៗរបស់ផលិតកម្មនេះបានដើរចេញជាបន្ដបន្ទាប់ ព្រោះតែគ្មានបទច្រៀងនោះ ។ប៉ុន្ដែអ្វីដែលគេចាំអ៊ុតមើលនោះថាតើស្រីស្រអែមស្រស់លីន សោម៉ា ព្រមបើកបេះដូងឲ្យសិស្សច្បងសួរ វិចិត្រ បានស្នេហ៍ស្និតនាងមែនទែន ដែរឬទេ ?
