ភ្នំពេញ ៖ បុរសម្នាក់ បានបើករថយន្តសុខៗ ជ្រុះទូរស័ព្ទដៃទៅក្រោម ទើបព្យាយាមឱនរើស ធ្វើឲ្យរេចង្កូតរថយន្តទៅបុកក្បាលរបាំងថ្មពុះចែកទ្រូងផ្លូវ ពេញទំហឹង បណ្តាលឱ្យខូចខាតធ្ងន់។
ករណីនេះ បានកើតឡើងកាលពីវេលាម៉ោង ១២រំលងអធ្រាត្រ ឈានចូលថ្ងៃទី១០ ខែធ្នូ ឆ្នាំ២០២៤ ស្ថិតតាមបណ្តោយផ្លូវលេខ១៨២ ក្នុងមូលដ្ឋានសង្កាត់ផ្សារដេប៉ូទី១ ខណ្ឌទួលគោក។
តាមសម្តីបុរសម្ចាស់រថយន្ត បានរៀបរាប់ប្រាប់ថា មុនពេលកើតហេតុ គាត់បានបើកបររថយន្ត១គ្រឿង ម៉ាក Mazda BT-50 ពណ៌ស ពាក់ស្លាកលេខ ភ្នំពេញ 2BP-5246 ធ្វើដំណើរតាមបណ្តោយផ្លូវលេខ១៨២ ក្នុងទិស ដៅពីលិច ទៅកើត លុះមកដល់ចំណុចកើតហេតុ គាត់បានជ្រុះទូរស័ព្ទដៃ ទៅក្រោម ក៏បានឱនរើសទូរស័ព្ទដៃ បណ្តាលឱ្យរេចង្កូតរថយន្តទៅបុករបាំងថ្មពុះចែកទ្រូងផ្លូវទាំងកំរោលតែម្តង បណ្តាលឱ្យរថយន្តខូចខាតផ្នែកខាងមុខ និងគាបជាប់របាំងថ្មពុះចែកទ្រូងផ្លូវ តែរបាំងថ្ម មិនបានរងការខូចខាតធ្ងន់នោះទេ។
ក្រោយកើតហេតុ សមត្ថកិច្ចមូលដ្ឋានសង្កាត់ផ្សារដេប៉ូទី១ បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង យករថយន្តបង្កហេតុទៅរក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនទៅដោះស្រាយតាមនីតិវិធី៕
