ភ្នំពេញ៖រយៈពេលជាង៤ខែមកហើយដែលស្រីស្អាតរ៉េត ស៊ូហ្សាណា បានដើរចេញពីផលិតកម្មរស្មីហង្សមាស ចូលផលិតកម្មបារមី ដែលទ្រនុំទី២នេះ នាងមិនសូវបង្ហាញសកម្មភាពចេញច្រៀងសម្ដែងសកម្មដូចកាលនៅជ្រកហង្សមាសនោះទេ ពោលគឺយូៗចេញច្រៀងម្ដង ។បញ្ហានេះហើយនាំឲ្យមានការលើកឡើងថាហ្សាណា អាចធ្លាក់ប្រាក់ចំណូលបន្ដិចនារដូវក្ដៅនេះជាមិនខាន ព្រោះកាលនៅហង្សមាសផលិតកម្មនេះរៀបចំConcerts និងមានស្ថានីយ៍ទូរទស្សន៍ខ្លួនឯង ហេតុនេះតារាទាំងអស់របស់ខ្លួនមានការងារធ្វើគ្រប់ៗគ្នា ហើយហ្សាណា ចេញមុខសឹងតែគ្រប់ឆាកទាំងអស់ ។ប៉ុន្ដែការច្រៀងនៅបារមី ហ្សាណា ក៍មានការវិត្តន៍ខ្លួនជាងមុនដែរ តាមរយៈការក្លាយទៅជាអ្នកនិពន្ធទំនុកច្រៀង និងជាអ្នកដឹកនាំសម្ដែងMV បទផ្ទាល់ខ្លួនទៀតផង ដែលជំហ៊ានថ្មីនេះគេមិនដែលឃើញនាងមានឱកាសបញ្ចេញស្នាដៃនៅហង្សមាសឡើយ ។
រ៉េត ស៊ូហ្សាណា មិនអាចទាក់ទងបានទេ កាលពីពេលថ្មីៗនេះ ព្រោះនាងមិនដែលផ្ដល់បទសម្ភាសន៍ឲ្យអ្នកកាសែតតាមទូរស័ព្ទឡើយ ។តែនៅលើហ្វេសបុកផ្ទាល់ខ្លួនហ្សាណា ថ្លែងសារថាឆ្នាំ២០២៤ គឺជាឆ្នាំដែលរូបនាងមានការផ្លាស់ប្ដូរច្រើនសម្រាប់នាងក្នុងនាមជាតារាចម្រៀងម្នាក់។នាងថាជីវិតនាងរីករាយ ព្រោះជាឆ្នាំដ៍មានន័យ ហើយនាងសន្យាថានឹងមានបទចម្រៀងថ្មីៗជាច្រើននៅឆ្នាំ២០២៥ ។
តាមព័តមានថារយៈពេលជាង៤ខែនេះរ៉េត ស៊ូហ្សាណា ចេញបានបទចម្រៀងទើបតែ៣បទប៉ុណ្ណោះគឺ«Lost »,«Better Off » ,និងបទ«ស្រ្ដីសេរី » ដែលបទទាំងមានការគាំទ្រមធ្យម និងមិនសូវមានគេយកទៅច្រៀងតាមបណ្ដារកម្មវិធីផ្សេងៗ ដូចអឡុងនាងល្បីនៅហង្សមាសបទ«ឈប់ »,«ប្រយោគស្នេហ៍ » និងបទ«សង្ស័យ » នោះទេ ។អ្វីដែលFan ចាំអ៊ុតហើយហាក់នៅជាប់គាំងនោះហ្សាណា នៅតែពន្យាពេលចាប់ដៃគូច្រៀងជាមួយតារារ៉េប វណ្ណដា តទៅទៀត បើទោះជាពួកគេធ្លាប់ឡើងឆាកជាមួយគ្នាក្ដី ។
រ៉េត ស៊ូហ្សាណា ទើបតែមានអាយុ២៤ឆ្នាំ ត្រូវបានគេចាប់អារម្មណ៍នាងទៅលើរូបសម្រស់ច្រើនជាងសម្លេង ហើយចាប់អាជីពសិល្បៈជិត១០ឆ្នាំនោះស្រីស្រស់ធ្មេញចំពើសមានត្រេមុខស្រដៀងកូនកាត់ជប៉ុនរូបនេះមិនធ្លាប់ប៉ះរឿងអាស្រូវស្នេហាឡើយ ក្រៅពីធ្លាប់បង្ហាញស្និតស្នេហ៍កូនកំលោះទី២ លោកឧកញ៉ាព្រាប សុវត្ថិ គឺសុវត្ថិ មុនីនាគ តែពួកគេបានរយាលៗពីគ្នាវិញក្រោយលោកជំទាវឡុង ស្រីមុំ បានប្រកាសថាមុនីនាគ អត់មានស្នេហាជាមួយហ្សាណា ដូចគេសង្ស័យឡើយ ។ក្រោយម្ដាយមុនីនាគ បញ្ជាក់ច្បាស់បែបនេះហ្សាណា ស្រងូតស្រងាត់ និងច្រើនតែចេញទៅកម្សាន្ដនៅបរទេសម្នាក់ៗឯង ហើយ២ឆ្នាំនេះនាងមិនដែលបង្ហាញការកៀកកើយជាមួយបុរសណាម្នាក់ដូចជាមួយលោកមុនីនាគ ឡើយ ។ចំណែកFan នៅតែចង់ឲ្យហ្សាណា-មុនីនាគ ចាប់ដៃគ្នាជាលើកទី២ ក្រោយពួកគេល្បីបទ«សុំខុសមួយយប់ » ប៉ុន្ដែរឿងនេះពិបាកទៅរួច ព្រោះគ្មានដំណឹងកូនលោកឧកញ៉ាទៅជ្រកនៅទ្រនុំជាមួយនាងហ្សាណា ឡើយ ។
គេចាំមើលថានាងរ៉េត ស៊ូហ្សាណា ដែលមានសម្រស់គួរឲ្យក្នក់ក្នាញ់នោះអាចគេចផុតពីប៉ះរឿងអាស្រូវកេរ្ដិ៍រហូត ឬយ៉ាងណា ?
