ខេត្តកណ្តាល ៖ នារីវ័យក្មេងម្នាក់ តែងជួយលក់ថ្នាំញៀនឱ្យប្រុសស្នេហ៍ លុះក្រោយមកសមត្ថកិច្ចទទួលបានព័ត៌មានពីម្ចាស់ផ្ទះជួល ចុះបង្ក្រាបនិងឆែកឆេរ រកឃើញថ្នាំញៀន ១កញ្ចប់ធំ ដែលលាក់ទុកក្នុងអាវទ្រនាប់ រួចក៏នាំយកទៅសាកសួរ ស្រាប់តែក្រោយមក មានម៉ូយទិញថ្នាំញៀន ២នាក់ទៀត បាននាំគ្នាមករកទិញថ្នាំញៀន ពីនារីខាងលើ ដល់មុខបន្ទប់ជួល ក៏ត្រូវកម្លាំងសមត្ថកិច្ចចាប់ក្របួចជាប់ថែម ២នាក់ទៀត នាំយកទៅចាត់ការតាម ច្បាប់។
ករណីនេះ បានកើតឡើង កាលពីថ្ងៃទី១៧ ខែធ្នូ ឆ្នាំ២០២៤ នៅចំណុចបន្ទប់ជួលមួយកន្លែង ស្ថិតក្នុងភូមិព្រែកតាហ៊ីង ឃុំព្រែកថ្មី ស្រុកកោះធំ។
ជនសង្ស័យទាំង៣នាក់ ដែលត្រូវបានសមត្ថកិច្ចចាប់ឃាត់ខ្លួន រួមមាន ទី១-ឈ្មោះភ័ណ្ឌ សុភ័ក្ត្រា ហៅតា ភេទ ស្រី អាយុ២៣ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ក្នុងភូមិព្រែកតាហ៊ីង ឃុំព្រែកថ្មី ស្រុកកោះធំ (មានសារធាតុញៀន)។ ទី២-ឈ្មោះម៉េន រាជ ហៅរាក់ ភេទប្រុស អាយុ២២ឆ្នាំ មុខរបរមិន ពិតប្រាកដ មានលំនៅ ភូមិទួលស្វាយ ឃុំកំពង់កុង ស្រុកកោះធំ (មានសារធាតុញៀន) និងទី៣-ឈ្មោះដង់ ចាន់ ហៅពក ហៅរ៉ាន់ ភេទប្រុស អាយុ២៧ឆ្នាំ មុខរបរ មិនពិតប្រាកដ មានលំនៅ ភូមិទួលស្វាយ ឃុំកំពង់កុង ស្រុកកោះធំ (មានសារធាតុ ញៀន)។
ចំពោះវត្ថុតាងចាប់យក រួមមាន ១-ថ្នាំញៀនប្រភេទមេតំហ្វេតាមីន ម៉ាទឹកកក (Ice) ចំនួន១កញ្ចប់ធំ ទម្ងន់ ១០,៣០ក្រាម។ ២-ទូរស័ព្ទដៃចំនួន៣គ្រឿង (ម៉ាក OPPO ពណ៌ស ម៉ាក OPPO ពណ៍ខៀវ និងម៉ាក Vivo ពណ៌ទឹកសមុទ្រ)។ ៣-ឧបករណ៍កែច្នៃសម្រាប់ជក់ ថ្នាំញៀន (បំពង់កែវ) ចំនួន២ និងថង់សម្រាប់វេចខ្ចប់មួយចំនួនធំ។ ៤-ដែកកេះ ចំនួន២ និងកន្ត្រៃចំនួន១។ ៥-វិក្កយបត្រវេរលុយវីង ចំនួន១ សន្លឹក។ ៦-ស្លាកលេខម៉ូតូ ភ្នំពេញ 1AQ-2285 ចំនួន១បន្ទះ។ ៧-ជញ្ជីងថ្លឹងថ្នាំញៀន ចំនួន១គ្រឿង។ ៨-ម៉ូតូ២គ្រឿង (ម៉ាក ហុងដាស្កុបពី ពណ៌ស ស៊េរីឆ្នាំ២០១៥ ពាក់ស្លាកលេខ កណ្តាល 1T-2757 លេខម៉ាស៊ីន 0386849 លេខតួ 5386849 ចំនួន១គ្រឿង និងម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០២២ ស្លាកលេខ កំពង់ស្ពឺ 1Q-9410 លេខតួ និងលេខម៉ាស៊ីន 5454536)។
តាមប្រភពសមត្ថកិច្ច បានឱ្យដឹងថា នៅមុនពេលកើតហេតុ ដោយបានទទួលព័ត៌មានពីមហាជនល្អ (ម្ចាស់ផ្ទះជួល) បានរាយការណ៍ដល់កម្លាំងនគរបាលផ្នែកប្រឆាំងបទល្មើសគ្រឿងញៀនថា មានមុខសញ្ញាសង្ស័យកំពុងសកម្មភាព លក់និងចែកចាយថ្នាំញៀន នៅចំណុចបន្ទប់ជួល លេខ៦ របស់ជនសង្ស័យឈ្មោះភ័ណ្ឌ សុភ័ក្ត្រា ស្ថិតនៅភូមិព្រែកតាហ៊ីង ឃុំព្រែកថ្មី ស្រុកកោះធំ ខេត្តកណ្តាល។ ក្រោយពីទទួលបានព័ត៌មានភ្លាម កម្លាំងនគរ បាលផ្នែកជំនាញប្រឆាំងបទល្មើសគ្រឿងញៀន សហការជាមួយកម្លាំងនគរបាលប៉ុស្តិ៍ព្រែកថ្មី បានចុះធ្វើការស្រាវជ្រាវ បង្ក្រាបទៅដល់ ទីតាំងខាងលើភ្លាម ដោយបានឃាត់ខ្លួនជនសង្ស័យម្នាក់ឈ្មោះភ័ណ្ឌ សុភ័ក្ត្រា ហៅតា ភេទស្រី រួចបានត្រួតពិនិត្យរកឃើញថ្នាំញៀន ម៉ាទឹកកក ចំនួន១កញ្ចប់ធំ ទម្ងន់១០,៣០ក្រាម ដែលជន សង្ស័ យបានលាក់ទុកក្នុងជាយដៃអាវទ្រនាប់។
នៅចំពោះមុខសមត្ថកិច្ច ជនសង្ស័យឈ្មោះភ័ណ្ឌ សុភ័ក្ត្រា បានឆ្លើយសារភាពថា ថ្នាំញៀនចំនួន១កញ្ចប់ធំខាងលើ ពិតជារបស់ខ្លួនប្រាកដមែន ដោយបានមកពីសង្សារឈ្មោះស៊្រឺ ស៊្រីន ភេទប្រុស អាយុ៤៦ឆ្នាំ មានលំនៅ ភូមិអន្លង់សាន្ត សង្កាត់ព្រែកស្តី ក្រុងសំពៅពូន ជាអ្នកប្រគល់ឱ្យ ខ្លួនទុកលក់ និងចែកចាយបន្ត។ ចំណែកអ្នកដែលតែងមកទិញថ្នាំញៀនពីខ្លួនយកទៅលក់បន្ត គឺឈ្មោះម៉េន រាជ ហៅរាក់ ភេទប្រុស អាយុ២២ឆ្នាំ រស់នៅភូមិទួលស្វាយ ឃុំកំពង់កុង ស្រុកកោះធំ។
ក្រោយស្តាប់ចម្លើយជនសង្ស័យឈ្មោះភ័ណ្ឌ សុភ័ក្ត្រា រួច កម្លាំងផ្នែកជំនាញបន្តស្រាវជ្រាវតាមជំនាញ រហូតឃាត់ខ្លួនជនសង្ស័យ ២នាក់ទៀត គឺឈ្មោះម៉េន រាជ និងឈ្មោះដង់ ចាន់ ដែលមករកទិញថ្នាំញៀនពីឈ្មោះភ័ណ្ឌ សុភ័ក្ត្រា នៅចំណុចផ្លូវបេតុងមុខបន្ទប់ជួល ឈ្មោះភ័ណ្ឌ សុភ័ក្ត្រា តែម្តង។
ជនសង្ស័យ៣នាក់ រួមនិងវត្ថុតាង ត្រូវបានឃាត់ខ្លួននិងរក្សាទុកនៅអធិការដ្ឋាននគរបាលស្រុកកោះធំ ដើម្បីកសាងសំណុំរឿង ចាត់ការបន្តតាមនីតិវិធី៕