ខេត្តស្វាយរៀង ៖ ក្មេងទំនើង ១ក្រុម គេចសាលា មិចូលរៀន នាំគ្នាជិះម៉ូតូដើរលេង បង្ហោះម៉ូតូ ប្រសាចពេញដងផ្លូវ ថតវីដេអូឃ្លីបបង្ហោះអួតក្នុងបណ្តាញសង្គមហ្វេសប៊ុកទៀត ចុងក្រោយត្រូវបានសមត្ថកិច្ចចុះបង្ក្រាបឃាត់ ខ្លួនបានចំនួន៦នាក់ នាំយកទៅអប់រំ និងដកហូតម៉ូតូ ៣គ្រឿង រក្សាទុក៣ខែ។
ប្រតិបត្តិការបង្ក្រាបក្រុមក្មេងទំនើងបង្ហោះម៉ូតូនេះ បានធ្វើឡើង កាលពីវេលាម៉ោង ១០និង២៥នាទីព្រឹក ថ្ងៃទី១៤ ខែធ្នូ ២០២៤ នៅលើកំណាត់ផ្លូវក្រាលកៅស៊ូ ស្ថិតក្នុងភូមិឫស្សីជួរខាងត្បូង ឃុំក្រោលគោ ស្រុកស្វាយជ្រំ។
ក្មេងទំនើង ទាំង៦នាក់ ដែលត្រូវសមត្ថកិច្ចឃាត់ខ្លួន រួមមាន ទី១-ឈ្មោះសុផុន រក្សា ភេទប្រុស អាយុ១៤ឆ្នាំ មុខរបរសិស្សថ្នាក់ទី 8D រៀននៅអនុវិទ្យាល័យហ៊ុនសែន ក្រោលគោ មានលំនៅភូមិឫស្សីទទឹង ឃុំក្រោលគោ ស្រុកស្វាយជ្រំ។ ទី២-ឈ្មោះឈឿន សុវណ្ណឌី ភេទប្រុស អាយុ១៤ឆ្នាំ មុខរបរសិស្សថ្នាក់ទី 8C រៀននៅអនុវិ ទ្យាល័យហ៊ុនសែនក្រោលគោ មានលំនៅ ភូមិឃួច ឃុំក្រោលគោ ស្រុកស្វាយជ្រំ។ ទី៣-ឈ្មោះតឹង តូម៉ន ភេទប្រុស អាយុ១៤ឆ្នាំ មុខរបរសិស្សថ្នាក់ទី 8D រៀននៅអនុវិទ្យាល័យហ៊ុនសែនក្រោលគោ មានលំនៅ ភូមិឫស្សីទទឹង ឃុំក្រោលគោ ស្រុកស្វាយជ្រំ។ ទី៤-ឈ្មោះសឿម ស៊ាកហេន ភេទប្រុស អាយុ១៤ឆ្នាំ មុខរបរសិស្សថ្នាក់ 9D រៀននៅ អនុវិទ្យាល័យហ៊ុនសែនក្រោលគោ មានលំនៅ ភូមិគោកកណ្តោល ឃុំក្រោលគោ ស្រុកស្វាយជ្រំ។ ទី៥-ឈ្មោះថេន ចាន់សីហា ភេទប្រុស អាយុ១៤ឆ្នាំ មុខរបរសិស្សថ្នាក់ទី 9A រៀននៅអនុវិទ្យាល័យហ៊ុនសែន ក្រោលគោ មានលំនៅ ភូមិក្រោលគោ ឃុំក្រោលគោ។ និងទី៦-ឈ្មោះថៃ សុខហេង ភេទប្រុស អាយុ១៤ឆ្នាំ មុខរបរសិស្សថ្នាក់ 9C រៀននៅអនុវិទ្យាល័យហ៊ុនសែនក្រោលគោ មានលំនៅ ភូមិព្រៃញ៉យ ឃុំក្រោលគោ ស្រុកស្វាយជ្រំ។
តាមប្រភពសមត្ថកិច្ច បានឱ្យដឹងថា កាលពីវេលាម៉ោង១០និង២៥នាទីព្រឹក ថ្ងៃទី១៤ ខែធ្នូ ២០២៤ សមត្ថកិច្ចប៉ុស្តិ៍នគរបាលរដ្ឋបាលក្រោលគោ បានទទួលព័ត៌មានពី ប្រជាពលរដ្ឋថា មានករណីក្មេងទំនើងជិះម៉ូតូបង្ហោះ នៅចំណុចលើផ្លូវក្រាលកៅស៊ូ ស្ថិតនៅភូមិឫស្សីជួរខាងត្បូង ឃុំក្រោលគោ ស្រុកស្វាយជ្រំ ពេលទទួលព័ត៌មានបានកម្លាំងជំនាញស្រុក សហការជាមួយ កម្លាំងប៉ុស្តិ៍នគរបាលរដ្ឋបាលក្រោលគោ បានចុះស្រាវ ជ្រាវដល់កន្លែងហេតុ ទើបកំណត់មុខសញ្ញាក្មេងទំនើង ដែលជិះម៉ូតូបង្ហោះ បានចំនួន៦នាក់។
ប្រភពដដែលបន្តថា បន្ទាប់ពីកំណត់មុខសញ្ញាក្មេងទំនើងទាំង៦នាក់បានហើយ សមត្ថកិច្ចបានចុះទៅសហការជាមួយលោកនាយកអនុវិទ្យាល័យហ៊ុនសែនក្រោលគោ អញ្ជើញសិស្សទាំង៦នាក់ ដែលពាក់ព័ន្ធនឹងករណីក្មេងទំនើងបង្ហោះម៉ូតូ ដែលមានឈ្មោះដូចខាងលើ យកមកប៉ុស្តិ៍នគរបាលរដ្ឋបាលក្រោលគោ ដើម្បីសាកសួរ។
នៅចំពោះមុខសមត្ថកិច្ច ក្មេងទំនើងដែលជាសិស្ស ឈ្មោះសុផុន រក្សា ឈ្មោះឈឿន សុវណ្ណឌី ឈ្មោះតឹង តូម៉ន និងឈ្មោសឿម ស៊ាកហេន បានឆ្លើយសារភាពថា កាលពីវេលាម៉ោង ១រសៀល ថ្ងៃទី០៦ ខែធ្នូ ឆ្នាំ២០២៤ ពេលពួកខ្លួនចេញពីរៀនទៅដល់ផ្ទះ បានដោះខោអាវ រៀនចេញ បន្ទាប់មកបានតេទូរស័ព្ទរកគ្នា បបួលគ្នាជិះម៉ូតូដើរលេង រហូតដល់ចំណុចលើផ្លូវក្រាលកៅស៊ូ មុខការដ្ឋានសំណង់ ក្រុមហ៊ុនចិន ស្ថិតនៅ ភូមិបឹងរ៉ៃខាងត្បូង ឃុំក្រោលគោ ក៏នាំគ្នាជិះម៉ូតូបង្ហោះ ចំនួន៣លើក ទៅ៤លើក ដោយបង្ហោះម្តងៗបានចម្ងាយប្រហែលពី២០ម៉ែត្រ ទៅ៣០ម៉ែត្រ។ ពេលបង្ហោះម៉ូតូម្តងៗ មានឈ្មោះថេន ចាន់សីហា និងឈ្មោះថៃ សុហេង ជាអ្នកជិះម៉ូតូតាមពីក្រោយ កាន់ទូរស័ព្ទថត។
ក្រុមក្មេងទំនើងខាងលើ បានបន្តសារភាពទៀតថា កាលពីអំឡុងខែវិច្ឆិកា ឆ្នាំ២០២៤ (មិនចាំថ្ងៃ) ពេលពួកខ្លួនចេញពីរៀន ក៏បានបបួល គ្នាជិះម៉ូតូដើរលេង និងបានជិះម៉ូតូទៅបង្ហោះ នៅចំណុចលើផ្លូវក្រាលកៅស៊ូមុខការ ដ្ឋានសំណង់ក្រុមហ៊ុនចិន ជាច្រើនលើកដែរ។
ក្រោយពីស្តាប់ចម្លើយសារភាពរបស់ក្រុមក្មេងទំនើងខាងលើរួចហើយ លោកអធិការនគរបាលស្រុកស្វាយជ្រំ បានរាយការណ៍ជូនលោកឧត្តមសេនីយ៍ទោស្នងការ និងបានសុំយោបល់ពីលោកខាំ សុផារី ព្រះរាជអាជ្ញាអមសាលាដំបូង ខេត្តស្វាយរៀង ដើម្បីធ្វើការអប់រំ និងឱ្យឪពុក ម្តាយធ្វើលិខិតធានាយកទៅផ្ទះវិញដើម្បីអប់រំបន្ត។ ចំពោះម៉ូតូ ចំនួន៣គ្រឿង ដែលជាមធ្យោបាយជិះធ្វើសកម្មភាពបង្ហោះនោះ សមត្ថកិច្ចបាន ដកហូតរក្សាទុកនៅអធិការដ្ឋាននគរបាលស្រុកស្វាយជ្រំ រយៈពេល៣ខែ៕