ខេត្តកណ្តាល ៖ នារីម្នាក់ កំពុងជិះម៉ូតូតែម្នាក់ឯងតាមផ្លូវ ស្រាប់តែត្រូវជនសង្ស័យម្នាក់ ជិះម៉ូតូ ១គ្រឿង មកធ្វើសកម្មភាពឆក់យកកាបូបបានសម្រេច រួចព្យាយាមជិះម៉ូតូរត់គេច តែត្រូវនារីរងគ្រោះ មានស្មារតីរឹងមាំក្លាហាន ជិះប្រដេញតាមបំបុកម៉ូតូជនសង្ស័យ បណ្តាលឱ្យដួលទាំងអស់គ្នា រួចស្រែកឆោឡោ ផ្អើលប្រជាពលរដ្ឋព័ទ្ធចាប់ក្របួចជនសង្ស័យជាប់ ប្រគល់ឱ្យសមត្ថកិច្ច នាំយកទៅចាត់ការតាមច្បាប់។
ករណីចោរឆក់កាបូបនេះ បានកើតឡើងកាលពីវេលាម៉ោង២និង២០នាទីរសៀល ថ្ងៃទី១៨ ខែធ្នូ ឆ្នាំ២០២៤ នៅចំណុចលើកំណាត់ផ្លូវជាតិលេខ២១ ស្ថិតក្នុងភូមិព្រែកថី សង្កាត់រកាខ្ពស់ ក្រុងតាខ្មៅ។
នារីជាជនរងគ្រោះ មានឈ្មោះស៊ាន សារ៉េន អាយុ៣០ឆ្នាំ មុខរបរបុគ្គលិកក្រុមហ៊ុនឯកជន មានលំនៅ ភូមិថ្មី សង្កាត់តាខ្មៅ ក្រុងតាខ្មៅ (រងរបួសស្រាល)។ ចំណែកជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះចក់ សុផល ភេទប្រុស អាយុ៣៨ឆ្នាំ មុខរបរមិនពិតប្រាកដ មានលំនៅ ភូមិព្រែកហូរលិច១ សង្កាត់ព្រែកហូរ ក្រុងតាខ្មៅ។
ចំពោះវត្ថុតាងចាប់យក រួមមាន ម៉ូតូ ១គ្រឿង ម៉ាកដា ឌ្រីម សេ១២៥ ពណ៌ខ្មៅ ពាក់ស្លាកលេខ កណ្តាល 1AS-1404 (ជារបស់ ជនសង្ស័យ) និងកាបូបយួរដៃ១ (ជារបស់ជនរងគ្រោះ)។
លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានបញ្ជាក់ប្រាប់ថា មុនពេលកើតហេតុ នារីជាជនរងគ្រោះបានជិះម៉ូតូតែម្នាក់ឯង ចេញពីផ្ទះ ជាមួយកាបូបប្រាក់១ លុះពេលជិះមកដល់ចំណុចកើតហេតុ ស្រាប់តែលេចមុខជនសង្ស័យខាងលើ ជិះដេញតាមពីក្រោយ ហើយធ្វើសកម្មភាពឆក់កាបូបរបស់ជនរងគ្រោះបានសម្រេច រួចជិះគេចខ្លួន តែភ្លាមនោះនារីរងគ្រោះបានបើកម៉ូតូដេញតាមពីក្រោយ រហូតតាមទាន់ និងជិះបំបុកម៉ូតូជនសង្ស័យ បណ្តាលឱ្យដួលទាំងអស់គ្នា ហើយស្រែកថាចោរ!ៗ ធ្វើឱ្យផ្អើលប្រជាពលរដ្ឋនៅក្បែរ នាំគ្នាចាប់បានជនសង្ស័យ និងប្តឹងសមត្ថកិច្ចប៉ុស្តិ៍រកាខ្ពស់ នាំខ្លួនជនសង្ស័យយកទៅសាកសួរ។
នៅចំពោះមុខសមត្ថកិច្ច ជនសង្ស័យខាងលើ បាឆ្លើយសារភាពថា ខ្លួនពិតជាបានជិះម៉ូតូធ្វើសកម្មភាពឆក់កាបូបរបស់នារីរងគ្រោះខាងលើ ប្រាកដមែន។
ជនសង្ស័យខាងលើ រួមនិងវត្ថុតាង ត្រូវបានសមត្ថកិច្ចជំនាញរៀបចំកសាងសំណុំរឿង បញ្ជូនទៅចាត់ការបន្តតាមនីតិវិធី៕
