ភ្នំពេញ៖ព្រាប សុវត្ថិ បានចេញបទកម្សត់ ស្នេហាខូចចចិត្ត «បំផ្លាញបេះដូង » ក្រោយមានភាពចម្រូងចម្រាសបទ«សែកមន្ដ » ដែលនេះគឺជាយុទ្ធសាស្រ្ដថ្មី ច្រៀងស្ទីលចាស់របស់ខ្លួនធ្លាប់តែជោគជ័យជាច្រើនបទនៅហង្សមាស ។តែយ៉ាងណានៅតែមានការរិះគន់ថាព្រាប សុវត្ថិ អាយុ៤៩ឆ្នាំ រូបនេះហាក់គ្មានគោលការណ៍ច្បាស់ លាស់ ក្នុងការចេញបទចម្រៀង ព្រោះជាង៤ឆ្នាំចុងក្រោយនេះបទចម្រៀងលោកពិបាកស្ដាប់ ខណៈពេលខ្លះការតែងខ្លួននិងម៉ូតសក់ពិបាកមើល ដូចជាឆាកខ្លះគេច្រឡំលោកស្លៀកសំពត់ឡើងច្រៀងទៀតផង ស្របពេលការច្រៀងបទស្លូវវិញគុណភាពបទលោកនៅតែមិនដល់បទនៅផលិតកម្មចាស់ទេ ។ប៉ុន្ដែគេចាំមើលថាដើម្បីគេចចេញពីគេវាយប្រហារនៅលើបណ្ដាញសង្គមលោកសុវត្ថិ នឹងបន្ដច្រៀងបទស្ទីលចាស់ៗរបស់លោកជាង១០ឆ្នាំ ឡើងវិញរហូត ឬក៍គ្រាន់តែចេញមួយប្រាវ ដើម្បីទប់ទល់ស្ថានការណ៍មិនល្អលើខ្លួននាពេលថ្មីៗនេះ ។
គេកត់សម្គាល់ថាការងាកមកលេងស្ទីលចាស់របស់ព្រាប សុវត្ថិ នាពេលនេះគឺចំពេលដែលខេមរៈ សិរីមន្ដ ក៍បានវិលមកច្រៀងបទកម្សត់ៗវិញដែរហើយថ្មីៗនេះលោកថៃ ទទួលបានការគាំទ្រគួរសមតាមរយៈបទ«ដាច់ឆ្នាំសល់អ្វីខ្លះ?» ។លោកសិរីមន្ដ បានដើរដល់ចំណុចទាល់ពេលមកឈរជើងនៅGalaxy ព្រោះច្រៀងបទអីក៍អ្នកលេងបណ្ដាញសង្គមចេញជេរ ក្រោយពីតារាវ័យ៣៩ឆ្នាំ រូបនេះចេញមុខការពារថៅកែនិងថាអត់ស្គាល់មុខឧកញ៉ាណាកាប់ឈើលក់ ទើបធ្វើឲ្យអ្នកលេងហ្វេសបុកបតិកម្មនិងដៀមដាមលោកថៃ ចំៗមិនធ្លាប់មានពីមុនមក។តែលោកថៃ បានចេញបទដែលធ្វើឲ្យអ្នកខ្លះលែងចង់ស្ដាប់ចម្រៀងលោកនោះចាប់អារម្មណ៍ម្ដងទៀតនោះគឺការច្រៀងបទដូចអំឡុងពេលលោកច្រៀងនៅU2 និងសាន់ដេដែលធ្លាប់ទទួលបានការគាំទ្រច្រើន ។
មជ្ឈដ្ឋានមហាជនមើលឃើញថាព្រាប សុវត្ថិ -ខេមរៈ សិរីមន្ដ មិនត្រឹមតែចង់ស្ដារកេរ្ដិ៍ឈ្មោះឡើងវិញ និងចង់ឲ្យមានការគាំទ្រពួកគេដូចច្រៀងនៅផលិតកម្មចាស់នោះទេ ប៉ុន្ដែការវិលមកច្រៀងបទស្លូវព្រមគ្នានេះគឺជាសញ្ញានៃការប្រជែងប្រជាប្រិយភាពរបស់តារាទាំងពីរនៅចុងឆ្នាំ២០២៤ នេះដែរ ថា១ណាខ្លាំងជាង បើទោះជាពេលនេះពួកគេមិនសូវបង្ហាញឲ្យឃើញចំៗនៃការដណ្ដើមគ្នាយកលេខ១យ៉ាងតឹងតែងបំផុតដូចកាលនៅហង្សមាស៣ឆ្នាំ(២០១៧-២០២០) ជាមួយគ្នាក្ដី តែតារាទាំងពីរគ្មាន១ណាចង់ធ្វើជាតួរងទេ ។ប្រសិនបើថៅកែGalaxy មិនលើកតារាទាំងពីរឲ្យស្មើឬប្រហាក់ប្រហែលគ្នាទេ នោះប្រាកដជានឹងមានតារាណាម្នាក់ដើរចេញជាមិន ហេតុនេះបើមានម្នាក់ណាផ្ទុះបទ១ ត្រូវតែតារា១ទៀតចេញបទខ្លាំងព្រមគ្នាដែរទើបអាចនៅសុខ ។
ព្រាប សុវត្ថិ នឹងផុតកុងត្រានៅGalaxy នាដំណាក់កាលដំបូងនៅខែ៨ឆ្នាំ២០២៥ ខាងមុខនេះ ហើយមិនទាន់មានការចរចាកុងត្រាថ្មីនោះទេ ។ប៉ុន្ដែគេជឿថាលោកឧកញ៉ាស្នាយ នឹងបន្ដច្រៀងនៅផលិតកម្មនេះតទៅទៀត ព្រោះថាកូនប្រុសទាំងពីររបស់លោកសុវត្ថិ មុនីវណ្ណ និងសុវត្ថិ សិរីវុឌ្ឍ កំពុងតែឈរជើងនៅទ្រនុំជាមួយឪពុករបស់គេដែរ ហេតុនេះគ្មានហេតុផលណាដែលលោកសុវត្ថិ ត្រូវដើរចោលកូនប្រុសទាំងពីរឡើយ ។
សម្រាប់លោកខេមរៈ សិរីមន្ដ វិញទើបមកដល់Galaxy ជិត២ឆ្នាំទេ ហេតុនេះកុងត្រាលោកនៅសល់៣ឆ្នាំទៀត ។ថ្វីត្បិតតែសិរីមន្ដ មិនទាន់នាំកូនប្រុសចូលGalaxy ដូចព្រាប សុវត្ថិ មែន ប៉ុន្ដែលោកប៊ុនថៃ ដែលអះអាងថារាប់អានថៅកែផលិតកម្មនេះដូចបងប្អូននោះ នឹងអាចផ្ញើរខ្លួននៅផលិតកម្មនេះច្រើនឆ្នាំតទៅទៀត ព្រោះដំណឹងលោកបើកផលិតកម្មផ្ទាល់ខ្លួនតាំងពីឆ្នាំ២០១៧ នោះត្រូវស្ញប់ស្ងាត់ទៅវិញហើយ។
ទស្សនិកជនលើកឡើងថាព្រាប សុវត្ថិ -ខេមរៈ សិរីមន្ដ នឹងមិនអាចគេចផុតពីការជេរប្រមាថនៅលើបណ្ដាញសង្គមបានទេ ប្រសិនបើលោកនៅតែចេញការពារថៅកែនិងអ្នកនយោបាយដូចមុន ទោះជាពេលនេះតារាកូន៣ទាំង៣ ព្យាយាមលួងចិត្តFan តាមរយៈការដឹកដៃគ្នាច្រៀងបទបែបកម្សត់ៗជាថ្មី ដូចពួកគេធ្លាប់ជោគជ័យនៅផលិតកម្មចាស់ក្ដី ក៍គេសង្កេតឃើញថាអ្នកលេងបណ្ដាញសង្គមមួយចំនួននៅតែមិនទាន់ពេញចិត្តពួកគេដូចមុនទេ ៕
