ភ្នំពេញ៖ពេជ្រ សោភា បានបង្ហាញខ្លួននៅផលិតកម្មថ្មីAKASA MUSIC ច្រៀងបទ«ស្មារតីជាខ្មែរ » ចាប់ដៃជាមួយលោកហ្សូណូ ,នារតី និងកញ្ញាពេជម្នី សេលីណា ដែលបទនេះនិពន្ធទំនុកច្រៀងដោយលោកខាំ ភូរិ និងលោកលី ធានហ្វូ ។មានការសង្ស័យថាសោភា បានចូលផលិតកម្ម AKASA MUSIC ក្រោយនាងចាកចេញពីផលិតកម្មរស្មីហង្សមាសមកធ្វើជាតារាចម្រៀងឯករាជ្យ ។ប៉ុន្ដែដំណឹងនេះត្រូវបានអ្នកនិពន្ធល្បីឈ្មោះលោកខាំ ភូរិ ច្រានចោល ។
លោកខាំ ភូរិ ដែលជាអ្នកគ្រប់គ្រង AKASA MUSIC និពន្ធបទ«ស្មារតីជាខ្មែរ » បានប្រាប់«នគរធំ » តាមទូរស័ព្ទកាលពីរសៀលថ្ងៃទី២៤ ធ្នូ ថាលោកបានអញ្ជើញពេជ្រ សោភា មកចាប់ដៃតារា៣រូបផ្សេងទៀតមកច្រៀងបទនេះដោយសារតែចម្រៀងនេះទាក់ទងជាតិ បង្ហាញពីស្មារតីរបស់ខ្មែរ ប្រាសាទមរតករបស់ដូនតា ឈាមជ័រជាខ្មែរ …។លោកថាសោភា មិនមែនជាតារារបស់ AKASA MUSIC នោះទេ ហើយបើពេលខាងមុខលោកផលិតបទទាក់ទងជាតិទៀតនោះលោកនៅតែហៅសោភា ច្រៀងបទទាំងនោះបន្ថែមទៀត។
លោកខាំ ភូរិ អ្នកនិពន្ធបទ«ស្មារតីជាខ្មែរ »
ឆ្លើយតបសំណួរថាតើលោកខាំ ភូរិ មានបំណងហៅពេជ្រ សោភា ច្រៀងនៅផលិតកម្មលោកផ្ដាច់មុខដែរ ឬយ៉ាងណានោះអ្នកនិពន្ធល្បីឈ្មោះរូបនេះថា បើសោភា មកAKASA MUSIC មែនលោកសូមទទួលយកម្រាមដៃ១០តែម្ដង ។ប៉ុន្ដែលោកភូរិ និយាយរបៀបដាក់ខ្លួនថាដោយសារតែផលិតកម្មលោកនៅតូច ហេតុនេះមិនហ៊ានហៅសោភា មកទេ ព្រោះតំណាក់កាលដំបូងនេះលោកផ្ដល់ឱកាសឲ្យតារាថ្មីៗបានបញ្ចេញសម្ថភាព ពោលគឺ AKASA MUSIC យកតែតារាថ្មីៗដែលគាត់ស្រលាញ់សិល្បៈហើយគ្មានទីតាំងឈរជើងសិន ។
គួររំលឹកថាពេជ្រ សោភា និងលោកខាំ ភូរិ ធ្លាប់ចាប់ដៃគ្នាធ្វើការនៅហង្សមាសជាច្រើនឆ្នាំ តែតាំងពីលោកភូរិ ចេញពីហង្សមាស និងមមាញឹកច្រើនទៅលើការដឹកនាំស្ពតពាណិជ្ជកម្ម និងផលិតរឿងដោយខ្លួនឯងទើបលោកនិងសោភា អាកខានធ្វើការជាមួយគ្នាជិត១០ឆ្នាំហើយ ទើបតែពេលនេះវិលមកចាប់ដៃគ្នាជាថ្មី។ប៉ុន្ដែលោកភូរិ ថានៅតែឆ្លៀតនិពន្ធបទចម្រៀងពិសេសគឺបទទាក់ទងជាតិ ។សម្រាប់សោភា វិញដែលច្រៀងឲ្យហង្សមាស១៩ឆ្នាំ(២០០៥-២០២៤) នោះទើបតែមានដំណឹងថានាងចេញពីផលិតកម្មធំនេះនៅឆ្នាំ២០២៤ នេះទេ តែសោភា មិនឆ្លើយឲ្យចំសំណួរបស់អ្នកយកព័តមានយើងឡើយ ពីរឿងថាចេញឬនៅហង្សមាសនោះ បើទោះជាពេលនេះគេឃើញនាងងាកមកផលិតបទចម្រៀងដោយខ្លួនឯងជាបន្ដបន្ទាប់ក្ដី ។
ប្រភពបានឲ្យដឹងថាក្រៅពី AKASA MUSIC តារាវ័យ៤០ឆ្នាំពេជ្រ សោភា ក៍នៅតែត្រូវបានGalaxy ចង់បាននាងទៅចាប់ដៃគូជាមួយលោកព្រាប សុវត្ថិ ជាលើកទី២ដែរ ក្រោយនាងបសេធទៅជ្រកនៅផលិតកម្មថ្មីចាយលុយធំនេះកាលពីឆ្នាំ២០២០ ។តែសោភា បានជ្រើសផ្លូវផលិតបទចម្រៀងដោយខ្លួនឯងដោយសារតែនាងមានStudio ក្រុមការងារ និងពិសេសនាងក៍អាចនិពន្ធបទចម្រៀងបានដោយខ្លួនឯងផងដែរ។ចំណែកលោកខាំ ភូរិ ទទួលស្គាល់ថាដោយសារតែបច្ចុប្បន្នមានផលិតកម្មធំៗច្រើន ហើយលោកគិតថាផលិតកម្មលោកនៅតូចនៅឡើយ ទើបលោកមិនហ៊ានហៅសោភា មកច្រៀងនៅផលិតកម្មលោកទេ ។
ពេជ្រ សោភា អាចដើរផ្លូវដូចមាស សុខសោភា ,សុគន្ធ និសា ,វី ឌីណែត និងលោកហ្សូណូ ជាដើម ដែលពួកគេងាកមកផលិតបទចម្រៀងដោយខ្លួនឯង ចេញនៅលើផេកផ្ទាល់ខ្លួន ហើយពេលចេញច្រៀងConcerts ធំៗយកបទល្បីៗពីមុន ដោយកែភ្លេងថ្មី នោះនៅតែរក្សារបានទីផ្សារសិល្បៈ។ទាកទងរឿងស្នេហាវិញអ្នកមេម៉ាយសោភា ដែលប្រកាសភ្ជាប់ពាក្យជាមួយលោកឆឹម សក្កដា កាលពីថ្ងៃទី១១ ខែ១១ ឆ្នាំ២០២២ រូបនេះលែងក្វល់ពីរឿងរៀបការក្រោយឆាចោលមង្គលការជាមួយប្រុសក្មេងកាលពីឆ្នាំ២០២៣ ហើយឥឡូវស្រាប់តែនាងម្ដងបង្ហាញភាពផ្អែមល្ហែមដាក់លោកសក្កដា ម្ដងបែខ្នងដាក់គ្នាទៅវិញ ខណៈដែលលោកសក្កដា ព្រមានធ្វើអត្តឃាតបញ្ចប់ជីវិតមិនក្រោម១០ដងឡើយ ហើយសោភា បែជាថាអត់ដឹងរឿងទៅវិញ ។
គេចាំមើលថាពេជ្រ សោភា នឹងបន្ដជ្រើសផ្លូវធ្វើជាតារាចម្រៀងឯករាជ្យរហូត ឬ AKASA MUSIC និងGalaxy នាងអាចជ្រើសយកទ្រនុំ១ផ្ញើរខ្លួន?
