ភ្នំពេញ៖ផលិតកម្មហង្សមាស,Galaxy និងថោន អាចនឹងលែងមើលផ្លូវមាស សុខសោភា ចូលផលិតកម្មខ្លួននៅពេលទៀតហើយ ព្រោះកាលពីថ្ងៃទី២៦ ធ្នូ តារាចម្រៀងសំនៀងផ្អែមរូបនេះ បានប្រកាសថានៅឆ្នាំ២០២៥ នឹងបន្ដច្រៀងនៅផលិតកម្មផ្ទាល់ខ្លួនCamtrax Music តទៅទៀតដោយថែមទាំងដាក់គោលដៅផ្ដោតលើការផលិតបទចម្រៀងពិរោះៗឲ្យបានច្រើនទៀតផង។ការតាំងចិត្តរបស់សុខសោភា បែបនេះបន្ទាប់ពីនាងដើរចេញពីរាម កាលពីឆ្នាំ២០២២ ហើយមិនទៅផលិតកម្មណាទាំងអស់តែមកច្រៀងនៅផលិតកម្មផ្ទាល់ខ្លួនCamtrax Music ដែលគ្រប់គ្រងដោយស្វាមីលោកអ៊ឹត រ៉ាដា និងបងប្រុសនាងលោកមាស សុខរតនៈ ហើយគេកត់សម្គាល់ថាពេលច្រៀងអត់ផលិតកម្មនេះសោភា មិនសូវមានបទល្បីៗឬផ្ទុះដូចមុនទេ អីចឹងហើយបានជាសឹងរាល់ការបង្ហាញខ្លួននៅឆាកធំៗនាងច្រើនតែយកបទចម្រៀងដែលល្បីៗពីមុនមកច្រៀងឡើងវិញដែលពេលខ្លះគ្រាន់តែកែភ្លែងថ្មីប៉ុណ្ណោះ ។ប៉ុន្ដែសោភា នៅតែមានទីផ្សារអាចកើបលុយបានរាប់ម៉ឺនដុល្លារក្នុង១ខែៗពីអាជីពចម្រៀងដដែល ជាក់ស្ដែងដូចជាគ្រាន់តែនៅខែធ្នូ ឆ្នាំ២០២៤ នេះសោភា បង្ហាញតារាង(Schedule )ដែលនាងត្រូវច្រៀងត្រូវគេកក់លុយរួចរាល់មានដល់ទៅ១៣ កម្មវិធីផ្សេងគ្នាឯណ្ណោះ ដែលចំនួននេះ មានន័យថានាងអាចរកលុយបានមិនក្រោម៣ម៉ឺនដុល្លារឡើយក្នុង១ខែ ។ ចំនួននៃការចេញច្រៀងសម្ដែងរបស់សុខសោភា នេះដែររឹតតែសំខាន់ទៅទៀតបង្ហាញថាក្រោយច្រៀងនៅផលិតកម្មខ្លួនឯង២ឆ្នាំនេះសោភា អត់ធ្លាក់ប្រាក់ចំណូល ឬនៅតែមានទីផ្សារចម្រៀងល្អដូចមុន ។យ៉ាងណាអ្នកជំនាញសិល្បៈព្រមានថាសោភា មិនអាចស៊ីកេរបទនៅផលិតកម្មចាស់ៗគ្រប់ឆាកបានទេ បើសិនជានាងចង់ប្រជែងទីផ្សារចម្រៀងឡើងវិញគឺទាល់តែមានបទថ្មីៗល្បីដែរទើបអាចទៅរួច ព្រោះថាតារាល្បីៗរបស់Galaxy ពួកគេចេញបទថ្មីៗសឹងតែរាល់ថ្ងៃតែម្ដង។
មាស សុខសោភា ជាគោលដៅចង់បានរបស់ហង្សមាសជាង១០ឆ្នាំមកហើយ ខណៈដែលGalaxy ដែលទិញបានតារាប្រុសល្បីជាច្រើនដួងខ្វះតែតារាស្រីជើងខ្លាំងនោះរឹតតែចង់បានតារាដែលមានសម្ថភាពដូចនាងទៅធ្វើជាដៃគូរបស់តារាប្រុសខ្លួនក៍ដូចជាសម្រាលបន្ទុកនាងតន់ ច័ន្ទសីម៉ា ខណៈដែលថោន វិញសោភា ធ្លាប់ជ្រក៩ឆ្នាំនោះនាងគ្មានបំណងវិលទៅជ្រកជាលើកទី២ទេ បើទោះជាថ្នាក់ដឹកនាំផលិតកម្មនេះនៅតែបើកទ្វារសម្រាប់នាងវិលវិញក៍ដោយ តែសោភា តាំងចិត្តបន្ដច្រៀងឆ្នាំទី៣នៅផលិតកម្មខ្លួនឯងទៀត ដែលបញ្ហានេះដោយសារតែនាងបានដឹងច្បាស់ថា២ឆ្នាំកន្លងមកអត់ច្រៀងនៅផលិតកម្មគេ រូបនាងនៅតែល្បីហើយរកលុយបានដូចមុន។
គួរបញ្ជាក់ថាមាស សុខសោភា ត្រូវបានគេចាត់ទុកថាជាតារាប្ដូរផលិតកម្មច្រៀង ដូចប្ដូរខោអាវ ព្រោះរូបនាងផ្ទាល់ជឿជាក់លើខ្លួនឯង ហើយFan គិតថារូបនាងទៅច្រៀងណាក៍នៅតែល្បីដែរ ទើបធ្វើឲ្យសោភា មើលរំលងផលិតកម្មធំៗខាងលើ។រឿងសំខាន់មួយទៀតដែលសុខសោភា រារែកចិត្តក្នុងការទៅផលិតកម្មធំនោះដោយសារ តែនាងចង់ច្រៀងដោយគ្មានកុងត្រា ព្រោះគ្មានសម្ពាធ ច្រៀងដោយសេរីភាព មិនមានការបង្ខំពាក់ព័ន្ធនយោ បាយ តែថៅកែចង់ឲ្យនាងចុះកុងត្រាទើបសោភា បន្ដច្រៀងផលិតកម្មផ្ទាល់ខ្លួនបែបនេះតទៅទៀត បើទោះជាពេលនេះនាងគ្មានដៃគូតារាចម្រៀងប្រុសរូបណាម្នាក់ក៍ដោយ ។ ក្រៅពីមាស សុខសោភា តារាដែលដើរចេញពីផលិតកម្មហើយងាកមកផលិតបទចម្រៀងដោយខ្លួនឯងនៅឆ្នាំ២០២៤ -២០២៥ មានដូចជាពេជ្រ សោភា ,សុគន្ធ និសា ,វី ឌីណែត ,ទេព បូព្រឹក្ស ,ពេជ្រ សូលីកា …លោកងួន ចាន់ដេវីត និងលោកដួង វីរៈសិទ្ធ ជាដើម ។គេចាំមើលថានៅឆ្នាំ២០២៥ សុខសោភា អាចទប់លំនឹងទីផ្សារចម្រៀងរបស់ខ្លួនបានឬអត់ ខណៈដែលការប្រកាសបន្ដច្រៀងCamtrax Music នៅឆ្នាំ២០២៥ នេះតែ២ថ្ងៃប៉ុណ្ណោះមុននាងរៀបចំខួបអាពាហ៍ ពិពាហ៍ គម្រប់១៥ឆ្នាំ នៅថ្ងៃទី២៨ ខែ១២ ឆ្នាំ២០២៤ ៕
