ភ្នំពេញ៖ក្រមុំមកពីខេត្តត្បូងឃ្មុំអាយុ២២ឆ្នាំ នាងលីន សោម៉ា ម្ចាស់ពានBeat The Best រដូវកាលទី២ បន្ទាប់ពីវះកាត់កែខ្ទង់ច្រមុះឲ្យខ្ពស់ស្រួចមក ពេលនេះនាងមានទាំងយីអ៊ុនស្នេហ៍ ទាំងទីផ្សារសិល្បៈ ។និស្សិតឆ្នាំទី៣ផ្នែកគណនេយ្យ និងពន្ធដា នៅវិទ្យាស្ថានជាតិគ្រប់គ្រងរូបនេះត្រូវបានគេផ្សារភ្ជាប់រឿងស្នេហាជាមួយសិស្សច្បងខ្លួនលោកសួរ វិចិត្រ ម្ចាស់ពានBeat The Best រដូវកាលទី១ ក្រោយពីគេឃើញលោកវិចិត្រ តែងបង្ហាញកាយវិការចង់ប៉ះដៃជើងនាង រហូតមានពេលខ្លះលោកបានលួចទៅបន្ទប់ជួលនាងហើយចង់ចូលទៅមើលគ្រែនាងគេងទៀតផងតែសីម៉ា បដិសេធ ។លោកវិចិត្រ ថែមទាំងសុំនាងសោម៉ា ថើប១ត្រង់ៗតែម្ដង ប៉ុន្ដែស្រីស្រស់គេចចេញជាបន្ទាន់ ព្រោះមិនទាន់ទុកចិត្ត ។
យ៉ាងណាអ្វីដែលគួរឲ្យចាប់អារម្មណ៍ថ្មីៗនេះដែរគេឃើញលីន សោម៉ា ក៍ត្រូវបានសិស្សច្បងម្នាក់ទៀតគឺលីម តិចម៉េង ម្ចាស់ពានCambodian Idol រដូវកាលទី៤ បង្ហាញកាយវិការចាប់អារម្មណ៍ទៅលើស្រីស្រអែមស្រស់នេះដែរដោយលោកថែមទាំងថាចំណុចទាំងប៉ុន្មានដែលសោម៉ា ចង់បានបុរសជាម្ចាស់បេះដូងនាងនោះលោកមានទាំងអស់ អត់មានខ្វះត្រង់កន្លែងណាមួយឡើយ ។ ការលើកឡើងរបស់លោកតិចម៉េង បែបនេះដោយសារ តែពិធីករហង្សមាសបានសួរទៅនាងសោម៉ា ថាតើនាងស្រលាញ់បុរសបែបណាដែលពេលនោះលោកតិចម៉េង ឈរនៅក្បែសោម៉ា និងចាំស្ដាប់ដោយយកចិត្តទុកដាក់បំផុត ។ភ្លាមនោះស្រីស្អាតសោម៉ា ថាបុរសក្នុងស្រម៉ៃរបស់ខ្លួនមាន៤ចំណុចធំៗគឺ«ទី១៖ចេះនាំនាងសើចច្រើន,ទី២៖មានកម្ពស់ខ្ពស់ជាងនាង,ទី៣៖ចេះរួសរាយ និងទី៤៖ចេះរកស៊ីចិញ្ចឹមនាង »។
គ្រាន់តែសោម៉ា និយាយមិនទាន់ចប់ស្រួលបួលផងលោកតិចម៉េង ឆ្លើយភ្លាមភ្លែតថា«ទុកឲ្យបង!ចំណុចខាងលើដែលអូនចង់បានបងអត់មានបាត់ត្រង់ណា១ទេ » ។
ពាក្យនេះនាងលីន សោម៉ា ដឹងច្បាស់ថាលីម តិចម៉េង ពេញចិត្តនិងចង់រ៉ាប់រងចំណុចដែលនាងត្រូវការដៃគូស្នេហាខាងលើ។ប៉ុន្ដែក្រោយតិចម៉េង ស៊កសំដីដាក់សោម៉ា បែបនេះមកស្រាប់តែមានអ្នកខមិនសួរទៅលោកតើលោកមិនខ្លាចលោកវិចិត្រ ខឹងទេអី?តែតិចម៉េង តបទៅវិញថាលោកនៅទន្ទឹងរងចាំសោម៉ា បែកពីសង្សារគេតើ ។តែភ្លាមនោះលោកវិចិត្រ បានចេញពីខាងក្រោយឆាកឡើងមកលើឆាកប្រាប់ទៅតិចម៉េង ដោយផ្ទាល់ថាសោ ម៉ា នៅជាសង្សារលោកទេ ហើយលោកសួរទៅតិចម៉េង ថាម៉េចបានបង្ខំគេឲ្យបែកពីសង្សារចឹង ?លោកតិចម៉េង បន្ថែមថាលោកមិនដឹងទេ ព្រោះ«ទំពក់វាទៅ ទើបព្នៅវាមក» ។ខ្ញុំនិងសោម៉ា ស្រលាញ់គ្នាចេញពីចិត្ត ឥឡូវសោ ម៉ា កំពុងសុំបងចិត្រ បែកហើយ ចឹងបងគួរទទួលយកការពិត …។
អ្នកលេងបណ្ដាញសង្គមបានសួរទៅនាងលីន សោម៉ា ថាតើនាងសម្រេចចិត្តយក១ណាទៅ បើមកម្ដងដល់ទៅ២បែបនេះ ហើយពេលនោះនាងបែជាស្រែកសួទៅFan វិញថា«តើឲ្យនាងយកមួយណាទៅ?» ។តែយ៉ាងណាគេមិនទាន់ឃើញលោកតិចម៉េង ហ៊ានលេងដៃដល់លើសោម៉ា ដូចជាចង់ឆ្មក់ចូលបន្ទប់នាងគេងទាំងយប់ ហើយមុនវិលទៅផ្ទះវិញសុំនាងថើប១ដូចលោកវិចិត្រ ឡើយ ។
គួរបញ្ជាក់ថាលីន សោម៉ា បានចូលហង្សមាសជាង៦ខែហើយ ក្រោយលើកពាន តែនាងទើបចេញបានចម្រៀង១បទប៉ុណ្ណោះគឺ«មិនចេះតាមដាន » ដែលនាងថាបទដំបូងរបស់ខ្លួននេះនាងផ្លាស់ប្ដូរបច្ចេកទេសច្រៀងសឹងតែទាំងស្រុងដោយសារតែពីមុននាងចូលចិត្តច្រៀងបទមរតកដើម តែពេលនេះបត់បែនមកច្រៀងបទសម័យបែបយុវវ័យវិញម្ដង ។ដោយសារតែបទចម្រៀងមិនដិតដល់លើទីផ្សារបែបនេះហើយទើបគេពិបាកសន្និដ្ឋានថាតើនាងសោម៉ា អាចវាយលុកបំបែកទីផ្សារចម្រៀងនៅហង្សមាសបាន ឬអត់ ព្រោះនាងនៅសល់កុងត្រាជាង៤ឆ្នាំទៀត ខណៈដែលពេលនេះតារាស្រីល្បីៗរបស់ហង្សមាសបានដើរចេញពីផលិតកម្មមួយនេះជាបន្ដបន្ទាប់ទៅហើយ ។ប៉ុន្ដែរឿងដែលសោម៉ា លេចធ្លោជាងបទចម្រៀងនៅដើមឆ្នាំ២០២៥ គឺរឹតតែមានមន្ដស្នេហ៍មិនធម្មតា ធ្វើឲ្យតារាប្រុសរួមទ្រនុំជ្រួលជ្រើមនិងសម្រស់នាង ក្រោយស្រីស្រស់ទើបតែកែច្រមុះយកហុងស៊ុយនោះទៅវិញ ៕
