ខេត្តកណ្តាល ៖ ជនសង្ស័យ ចំនួន២នាក់ បានធ្វើសកម្មភាពផ្លោះរបងចូលទៅគាស់ឃ្លាំង ១កន្លែង លួចយកដែក និងសម្ភារៈជាច្រើនលើកច្រើនសា ដែលគិតជាទឹកប្រាក់ប្រមាណ ១០ម៉ឺនដុល្លារ លុះចុងក្រោយត្រូវបានប្រជា ពលរដ្ឋប្រទះឃើញរាយការណ៍ប្រាប់សមត្ថកិច្ច ចុះឃាត់ខ្លួនបានចំនួន២នាក់ភ្លាមៗ នាំយកមកចាត់ការតាម ច្បាប់។
ករណីអំពើលួចនេះ បានកើតឡើង កាលពីវេលាម៉ោង ៣និង៣០នាទីរសៀល ថ្ងៃទី០៦ ខែមករា ឆ្នាំ២០២៥ នៅចំណុចឃ្លាំងមួយកន្លែង ស្ថិតក្នុងភូមិមនោរម្យ ឃុំបែកចាន ស្រុកអង្គស្នួល។
ជនសង្ស័យដែលត្រូវសមត្ថកិច្ចចាប់ឃាត់ខ្លួន មានចំនួន២នាក់ ទី១-ឈ្មោះឃុន វណ្ណៈ ហៅស្វិត ភេទប្រុស អាយុ៣២ឆ្នាំ មុខរបរមិនពិតប្រាកដ ស្នាក់នៅភូមិចុងបង្គោល ឃុំបែកចាន ស្រុកអង្គស្នួល (មានសារធាតុញៀន) និងទី២-ឈ្មោះសំអូន សំអ៊ាក ហៅម៉ាប់ ភេទប្រុស អាយុ២៤ឆ្នាំ មុខរបរកម្មករសំណង់ ស្នាក់នៅភូមិចុងបង្គោល ឃុំបែកចាន ស្រុកអង្គស្នួល (គ្មានសារធាតុញៀន)។ ចំពោះវត្ថុតាងចាប់យក រួមមាន ឧបករណ៍សម្រាប់ដោះគ្រឿងខ្ចៅ ចំនួន៧ដើម កន្ត្រៃធំ សម្រាប់កាត់ស័ង្កសី១ ទួរណឺវីសក្បាលខ្លី ១ដើម (ជារបស់ជនសង្ស័យ)។
ចំណែកជនរងគ្រោះ មានឈ្មោះឡេង ស៊្រី ភេទប្រុស អាយុ៤៦ឆ្នាំ មុខរបរលក់ដូរ មានលំនៅភូមិទី៦ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។ រីឯសម្ភារៈបាត់បង់រួមមាន ស័ង្កសី ប្រហែល១តោន ដែកគ្រប់ប្រភេទ ប្រហែល៣តោន ម៉ូទ័រកង្ហារ ចំនួន ២០គ្រឿង ម៉ាស៊ីនត្រជាក់ ១៥គ្រឿង តុដែក ប្រហែល១៥០តុ ទូដែក ចំនួន៨ ខ្សែភ្លើង ប្រហែល៨០០ម៉ែត្រ គ្រែឈើ ចំនួន១៥ គ្រែប្រអប់ ចំនួន២ បង្អូចដែក ចំនួន៣០ កង្ហារបឺតខ្យល់ ចំនួន២០ កង្ហារតូច ចំនួន១៥ និងម៉ាស៊ីនក្រឡុកស៊ីម៉ងត៍ ចំនួន១ សរុបជាទឹកប្រាក់ចំនួនប្រហែល ១០ម៉ឺនដុល្លារ។
តាមប្រភពសមត្ថកិច្ច បានឱ្យដឹងថា នៅមុនពេលកើតហេតុ មានប្រជាពលរដ្ឋល្អបានទូរស័ព្ទរាយការណ៍មកកម្លាំងប៉ុស្តិ៍នគរបាលរដ្ឋបាលបែកចាន ថាមានជនសង្ស័យ ចំនួន២នាក់ បានផ្លោះរបងចូលទៅក្នុងឃ្លាំងទុកចោលរបស់ជនរងគ្រោះ ធ្វើសកម្មភាពលួចដែកនៅក្នុងឃ្លាំងនោះ។ បន្ទាប់ពីទទួលបានព័ត៌មានភ្លាម កម្លាំងប៉ុស្តិ៍នគរបាលរដ្ឋបាលបែកចាន បានចុះទៅដល់ចំណុចកើតហេតុខាងលើ បន្ទាប់មកបានទូរស័ព្ទផ្តល់ដំណឹងទៅជនរងគ្រោះ និងបានមកចូលរួមឃាត់ជនសង្ស័យទាំង២នាក់បានភ្លាមៗ រួចបញ្ជូនទៅសាកសួរនៅអធិការដ្ឋាននគរបាលស្រុក។
នៅចំពោះមុខសមត្ថកិច្ច ជនសង្ស័យឈ្មោះឃុន វណ្ណៈ ហៅស្វិត បានឆ្លើយសារភាពថា ខ្លួនបានធ្វើសកម្មភាពចូលលួចដែក នៅចំណុចកើតហេតុ ជាញឹកញាប់ សរុប៥-៦លើកមកហើយ រួចបានលុយយកទៅទិញថ្នាំញៀន ដើម្បីប្រើប្រាស់។ ចំណែកជនសង្ស័យឈ្មោះសំអូន សំអ៊ាក កំពុងដកក្រអៅឈូក ក៏ត្រូវខ្លួន (ឃុន វណ្ណៈ ហៅស្វិត) បានស្រែកហៅឱ្យទៅជួយលើកដែក ហើយពេលទៅដល់ចំណុចកើតហេតុ ក៏បានធ្វើសកម្មភាពជាមួយគ្នាតែម្តង។
ជនសង្ស័យទាំង២នាក់ខាងលើ រួមនិងវត្ថុតាង ត្រូវបានសមត្ថកិច្ចជំនាញរៀបចំកសាងសំណុំរឿង បញ្ជូនទៅចាត់ការបន្តតាមនីតិវិធី៕