ភ្នំពេញ៖ពេជ្រ សូលីកា បានប្រកាសកាលពីថ្ងៃទី៣០ ខែ១២ ឆ្នាំ២០២៤ ថាក្នុងឆ្នាំ២០២៤ ពេញនាងត្រូវបានគេជួលឲ្យច្រៀងសរុបទាំងអស់ចំនួន៩៩ កម្មវិធី(Events) ដែលចំនួននេះមានន័យថាក្នុង១ខែយ៉ាងហោចណាស់ក៍នាងត្រូវគេហៅច្រៀងជិត១០កម្មវិធីដែរ ។ចំនួននេះមានន័យថាប្រាក់ចំណូលសូលីកា អាចរកបានលើសពី៣០ម៉ឺនដុល្លារក្នុង១ឆ្នាំ ព្រោះតាមអ្នកដឹកនាំការប្រគុំតន្រ្ដីម្នាក់បង្ហើបប្រាប់អ្នកយកព័តមានយើងកាលពីរសៀលថ្ងៃទី៩ ខែ១ ថាស្រីពេជ្រ ច្រៀងកម្មវិធី១ស៊ីថ្លៃជាង៣ពាន់ដុល្លារ ។ប្រាក់ចំណូលដ៍ច្រើនសន្ធឹករបស់សូលីកា ប្រចាំឆ្នាំនេះដែរ មិនគិតទៅលើលុយមួយច្រកទៀតដែលនាងរកបានពីស្ពតពាណិជ្ជកម្មផ្សេងៗទៀតនោះទេ តែគេអាចប្រមាណបានថាការធ្វើជាBA និងថតស្ពតធំៗនោះស្រីពេជ្រ ក៍ស៊ីថ្លៃម៉ឺនដុល្លារដែរ ហេតុនេះអ្នកមេម៉ាយកូន១ស្រួយដូចដូងដុតរូបនេះស្ថិតក្នុងចំណោមតារាដែលរកលុយបានច្រើនលំដាប់ជូរមុខនាពេលបច្ចុប្បន្ន ។
គេកត់សម្គាល់ថាការត្រូវប៉ាន់ទីផ្សាររបស់ពេជ្រ សូលីកា នាឆ្នាំ២០២៤ នោះក្រោយនាងល្បី២បទគឺ«ថែការចងចាំ » និងបទ«បើសិនអូនជួបគេ » ដែលធ្វើឲ្យនាងហក់ឡើងយ៉ាងរហ័ស បើទោះជាបរាជ័យរឿងស្នេហាធ្លាក់ខ្លួនមេម៉ាយកូន១ក៍ដោយ ។អ្វីដែលស្រីពេជ្រ នៅរក្សាទីផ្សារសិល្បៈបាននោះមួយផ្នែកសំខាន់គឺរូបសម្រស់នាងនៅតែស្វែលស្អាត មិនសូវបែកសាច់ និងអត់ឡើងគីឡូជ្រុលដូចតារាខ្លះដែលមានស្វាមីនិងកូនហើយនោះទេ ដែលចំណុចនេះហើយស្រីពេជ្រ នៅតែត្រូវប៉ាន់ទាំងទីផ្សារចម្រៀង និងស្ពត។
សូមបញ្ជាក់ថាពេជ្រ សូលីកា បានចេញពីហង្សមាស ផលិតបទចម្រៀងដោយខ្លួនឯងហើយនាងក៍មានក្រុមតន្រ្ដីផ្ទាល់ខ្លួនផងដែរ ។ស្រីពេជ្រ បានប្រកាសថានៅឆ្នាំ២០២៥ នេះរូបនាងមិនព្រលែងដៃជាដាច់ខាត បើនាងចេញបទSad អ្នកគាំទ្រនាងក៍Sad ដូចគ្នាដែរ ព្រោះបទទាំងនោះចុកទាំងចំណងជើង និងចាក់ទាំងបទចម្រៀង ។
កាថ្លែងបែបនេះរបស់ពេជ្រ សូលីកា បញ្ជាក់ថាស្រីពេជ្រ នាងនឹងត្រៀមចេញបទបែបមនោសញ្ចេតនា ស្នេហាខូចចិត្តទៀតនៅឆ្នាំ២០២៥ នេះ ក្រោយជោគជ័យបទស្លូវៗដែលមានបទខ្លះនាងច្រៀងបែបសាច់រឿងស្នេហាផ្ទាល់ខ្លួននោះ ។គេជឿថាតម្លៃខ្លួន និងប្រាក់ចំណូលរបស់សូលីកា អាចនឹងកើនទៀតនៅឆ្នាំ២០២៥ នេះប្រសិនបើនាងមានបទល្បីផ្ទុះ២ទៅ៣បទថែមទៀត ។
ពេជ្រ សូលីកា បានទុកជីវិតជាស្រ្ដីមេម៉ាយកូន១ជាង២ឆ្នាំហើយ ខណៈដែលអតីតគូដណ្ដឹងនាងលោកគឹម ហាន កំពុងត្រៀមរៀបការជាមួយគូស្នេហ៍ថ្មី ដោយគ្មានផែនការណ៍ផ្សះផ្សារស្នេហាជាមួយនាងវិញឡើយ ។ប៉ុន្ដែគេជឿថារូបសម្រស់របស់ស្រីពេជ្រ នៅតែផូផង់បែបនេះនាងមានជម្រើសស្នេហ៍ច្រើន បើទោះជានាងបានបង្ហាញសញ្ញាមានស្នេហ៍ថ្មី១ប្រាវតាមIG ហើយស្ងាត់ទៅវិញក៍ដោយ។
គេចាំមើលថាគង់ ស្រីពេជ្រ ហៅពេជ្រ សូលីកា មានគេជួលច្រៀងនៅឆ្នាំ២០២៥ តិច ឬច្រើនជាងឆ្នាំ២០២៤ ?
