Arturo Vidal បាននិយាយថា ខ្លួនគ្មានហេតុផលណាមួយចាកចេញពី Bayern នារដូវក្តៅខាងមុខនេះទេ ។ ព្រមពេលជាមួយគ្នា កីឡាករសញ្ជាតិស៊ីលីរូបនេះ ក៏បានទាត់ចោលផងដែរនូវការលើកឡើងដែលថា ខ្លួននឹងទៅចូលរួមជាមួយ Chelsea ដែលដឹកនាំដោយលោក Antonio Conte ។
Vidal ត្រូវបានគេស្គាល់និងមានឈ្មោះល្បីទូទាំងអឺរ៉ុបក្រោយចូលលេងឱ្យក្លឹប Juventus ដែលពេលនោះស្ថិតក្រោមការដឹកនាំដោយគ្រូបង្វឹក Antonio Conte ។ គេបានយកឈ្នះពានអ៊ីតាលីស៊េរី A ចំនួន៣លើកមុនការចាកចេញរបស់លោក Conte ឆ្នាំ២០១៤ ។
តាមរយៈគេហទំព័រ SportBild កីឡាករវ័យ២៩ឆ្នាំរូបនេះបញ្ជាក់ថា« អ្វីទាំងអស់ដែលយើងបានឮគឺគ្រាន់តែជាពាក្យចចាមអារ៉ាមប៉ុណ្ណោះ ។ រយៈពេល៤ឆ្នាំក្រោមការដឹកនាំគ្រូបង្វឹកAntonio Conte នៅJuventus ខ្ញុំពិតជាទទួលបានជោគជ័យ ។ ប៉ុន្តែ ទោះជាដូច្នេះក្តី នេះមិនមែនបានន័យថា ខ្ញុំត្រូវចាកចេញពី Bayernនោះទេ ។ ខ្ញុំពាក់អាវBayernក្នុងមោទនភាព ។ ខ្ញុំ ភរិយានិងកូនពិតជាសប្បាយចិត្ត ។ សូមប្រាប់ថា ខ្ញុំនៅតែមានគោលដៅធំជាមួយ Bayern »។
សូមបញ្ជាក់ថា ការចុះផ្សាយមួយចំនួននាពេលថ្មីៗនេះសុទ្ធតែអះអាងថា Vidal នឹងទៅចូលរួមជាមួយអតីតគ្រូចាស់ Antonio Conteដែលបច្ចុប្បន្នកំពុងដឹកនាំក្លឹប Chelsea ។ ប្រភពទាំងនោះថែមទាំងនិយាយថា លោក Antonio Conteពិចារណាត្រៀមលុយដ៏ច្រើនដើម្បីទិញយក Vidal ដើម្បីពង្រឹងក្លឹប ៕
ដោយ៖ ហេង ដេត