ភ្នំពេញ៖លោកមាស ប៊ុនណាលិ ហៅអូជីហ្គូលឌិន (OG GOLDEN) បានលើកពានRapper Fighter រដូវកាលទី១ កាលពីរាត្រីថ្ងៃទី២ ខែកុម្ភៈ ដោយក្លាយទៅជាRapper ជំនាន់ថ្មីនិងទទួលបានរង្វាន់ដល់ទៅ៦០លានរៀល និងខ្សែកមួយខ្សែផងដែរ ក្រោយពីOG បានផ្ដួលបេក្ខភាព៤រូបផ្សេងទៀតនៅវគ្គផ្ដាច់ព្រ័ត្រ(Final)គឺTORO ,EMI ,SWEEZY និងRANNGO រៀបចំដោយPnn ។
ក្រោយក្ដីសុបិនក្លាយទៅជាការពិត OG GOLDEN ថ្លែងទាំងរីករាយថាពេលនេះ លោក ជឿ និងដឹងថាខ្លួនថាខ្លួនជាអ្នកណា និងអាចធ្វើបានហើយ ។លោកថាការខំប្រឹងប្រែង ការតស៊ូភាពអត់ធ្មត់ពិតជាមានតម្លៃ ដែលលោកអាចរកវាឃើញ។OG បន្ថែមថាលោកធ្លាប់ជាក្មេងម្នាក់ដែលមិនសូវដឹងអី រៀនមិនបានដិតដល់ ជួបឧប ស័គ្គរយលាន ទើបឈានមកដល់ចំណុចនេះ។អូជី ក៍អរគុណទៅដល់មហាជនដែលគាំទ្រលោក ហើយអ្វីដែលោកមិនអាចបំភ្លេចបាននោះគឺលោកRuthko ដែលជាគ្រូបង្វឹគរបស់ខ្លួនទទួលមរណភាពកាលពីដើមខែមករា នោះដោយថាលោកអាចធ្វើបានដូចពេលនេះគឺដោយសារតែមានគ្រូធ្លាប់បង្វឹគ។
OG GOLDEN បួងសួងទៅកាន់វិញ្ញាណក្ខ័ន្ធRuthko ថា«ប្អូនបងឯង ធ្វើបានហើយបងប្រុស បងប្រុសខ្ញុំល្អមែនទែនគាត់បានបណ្ដុះខ្ញុំតាំងពីវគ្គដំបូង រហូតមកដល់ពេលនេះទោះបងអត់បាននៅមែន តែគាត់នៅឈរមើលខ្ញុំពីលើមក»។
ជោគជ័យរបស់ OG GOLDEN ក៍មានតារាជាច្រើនបានសាទរផងដែរ រហូតមានខ្លះបានទៅលើកទឹកចិត្តលោកដល់ឆាកថ្ងៃប្រកួតផ្ដាច់ព្រ័ត្រទៀតផង ។
លោកខេមរៈ សិរីមន្ដ ថ្លែងសារថា«អបអរប្អូនប្រុសដែលជាប់ជ័យលាភី Rapper Fighter កាលពីយប់មិញ ប្អូននឹងក្លាយទៅជាទំពាំងស្នងឬស្សីថ្មី សង្ឃឹមថាប្អូននឹងក្លាយទៅជាគំរូល្អដល់យុវវ័យមានសុជីវធ័ម គុណធ័ម ជាគំរូដល់ពួកគេសរសេរចម្រៀង កុំមានពាក្យជេរ ពាក្យអសុរសណាប្អូន ជូនពរប្អូនជោគជ័យក្នុងវិស័យRapper »។
សូមរំលឹកថា OG GOLDEN មុនចូលប្រកួត Rapper Fighter រូបគេធ្លាប់ធ្វើជាអ្នកដឹកម្ហូប(Delivery) ដែលជាការងារមួយដែលលោកអះអាងថាមិនមែនជាចំណូលចិត្ត តែត្រូវប្រឹងធ្វើដើម្បីជីវភាព ក្រោយផ្អាកធ្វើបទចម្រៀងមួយរយៈ។OG ក៍ធ្លាប់ចេញបទ«ជីវិតអ្នកដឹកម្ហូប» ដោយសម្ដែងជាមួយគ្រូបង្វឹគរបស់ខ្លួនលោកRuthko ទៀតផង មុនពេលដែលលោកដាវីឌ ឬទ្ធីរុទ្រ បានជួបគ្រោះថ្នាក់ចរាចរណ៍រហូតបាត់បង់ជីវិតនៅលើបណ្ដោយផ្លូវ៦០ម៉ែត្រ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កាលពីថ្ងៃទី៦ ខែមករា ឆ្នាំ២០២៥ ។មុនឡើងឆាកFinal លោកអូជី ក៍បានអុជធូបបន់ស្រន់រំលឹកដល់គុណលោកRuthko ផងដែរនិងជឿជាក់ថាលោកឬទ្ធីរុទ្រ ឈរមើលលោកពីលើ។
គួរបញ្ជាក់ថាគិតត្រឹមនៅឆ្នាំ២០២៥ នេះតារាចម្រៀងរ៉េបដែលឈានមុខគេគឺវណ្ណដា និងងួន ចាន់ដេវីត ខណៈដែលតារាចម្រៀងល្បីៗដូចជាព្រាប សុវត្ថិ ,ខេមរៈ សិរីមន្ដ ,ពេជ្រ សោភា ,សួស វីសា ,ឈីន រតនៈ និងទេព បូព្រឹក្ស ជាដើមក៍ចេះច្រៀងរ៉េបផងដែរ ។ដោយឡែកសម្រាប់តារារ៉េបវ័យក្មេងដែលច្រៀងរ៉េប ដែរមុនពេលដែលលោកOG Golden លើកពាននោះមានដូចជាសុវត្ថិ មុនីវណ្ណ,ទេព ពិសិដ្ឋ និងចាន់ សុបញ្ញា ជាដើម ៕
