ភ្នំពេញៈ មេបក្សជំនាន់ថ្មី លោកមាជ សុវណ្ណារ៉ា បានប្រកាសជាចំហថា បើសិនជាគណបក្សរបស់ខ្លួនឈ្នះឆ្នោត បានដឹកនាំរាជរដ្ឋាភិបាល នៅពេលខាងមុខនេះ លោកនឹងធ្វើវិសោធនកម្ម ពី៥០+១ ទៅ២/៣ឡើងវិញ ដូចស្មារតីដើមនៃរដ្ឋធម្មនុញ្ញឆ្នាំ១៩៩៣ ប្រយោជន៍ដើម្បីបើកផ្លូវឱ្យគណបក្សដែលឈ្នះអាសនៈនៅក្នុងរដ្ឋសភា បានចូលរួមធ្វើការជួយជាតិជាមួយគ្នា ក្នុងអំណាចតុល្យភាព រវាងនីតិបញ្ញត្តិ និងនីតិប្រតិបត្តិ ។
លោកមាជ សុវណ្ណារ៉ា បានសរសេរនៅក្នុងទំព័របណ្ដាញសង្គម ហ្វេសប៊ុក របស់លោកថា “ បើគណបក្សជំនាន់ថ្មី ឈ្នះឆ្នោតបានដឹកនាំរដ្ឋាភិបាល នឹងធ្វើវិសោធនកម្មច្បាប់ពី ៥០+១ ទៅ ២/៣ ឡើងវិញ ដូចស្មារតីដើមរដ្ឋធម្មនុញ្ញឆ្នាំ១៩៩៣ ប្រយោជន៍ដើម្បីបើកផ្លូវឱ្យគណបក្សដែលឈ្នះបានអាសនៈ បានចូលរួមធ្វើការជួយជាតិជាមួយគ្នា ក្នុងអំណាចតុល្យភាពរវាងនីតិបញ្ញត្តិ និងនីតិប្រតិបត្តិ ។ ប្រទេសប្រកាន់គោលការណ៍លទ្ធិប្រជាធិបតេយ្យសេរីពហុបក្ស យ៉ាងហោចណាស់ក៏មានគណបក្ស ២ ឬក៏៣ មានសំឡេងនៅក្នុងរដ្ឋសភាជាតិ ទើបរាជរដ្ឋាភិបាលមិនដឹកនាំរបៀបជិះសេះលេងដៃ។ បើគណបក្សកាន់អំណាចមិនសូវគិតពីប្រយោជន៍ជាតិ និងពលរដ្ឋម្ចាស់ឆ្នោត គឺបោះឆ្នោតប្ដូរថ្នាក់ដឹកនាំក្បាលម៉ាស៊ីនប្រទេស។ ដូច្នេះប្រជាពលរដ្ឋ និងយុវជនដែលសកម្មនឹងនយោបាយ នឹងជ្រើសរើសបានមេដឹកនាំដែលបម្រើម្ចាស់ឆ្នោតពិតប្រាកដ “ ។
បន្ថែមលើសំណេរតាមបណ្ដាញសង្គម ខាងលើនេះ លោកមាជ សុវណ្ណារ៉ា បានបញ្ជាក់ប្រាប់ “នគរធំ” នៅថ្ងៃទី២៨ ខែមីនា ឆ្នាំ២០២៥ថា ការដែលគណបក្សជំនាន់ថ្មី ចង់ឲ្យមានការកែប្រែវិសោធនកម្មពី៥០+១ មក២/៣ វិញ គឺវាមានប្រយោជន៍ច្រើន ដូចជា មានលទ្ធភាពឲ្យគណបក្សនយោបាយ អ្នកជំនាន់ថ្មី អ្នកបន្តវេន មិនថាបក្សកាន់អំណាច មិនថានិស្សិត បញ្ញវន្តជំនាន់ក្រោយ មានសិទ្ធិចូលរួមនយោបាយយ៉ាងសកម្ម ដោយគ្មានការគំរាមកំហែង បំភិតបំភ័យ គ្មានការគាបសង្កត់និន្នាការបក្សនយោបាយ ។ ម្យ៉ាងទៀត រូបមន្តនៃ៥០+១ បង្កើតរដ្ឋាភិបាល សម្រាប់ប្រទេសប្រជាធិបតេយ្យនៅលើពិភពលោក ដូចជាសហរដ្ឋអាមេរិក ថៃ ជាដើម គេអាចធ្វើបាន ដោយសារគេមាននីតិរដ្ឋ តែសម្រាប់កម្ពុជា ៥០+១ គឺវាគ្រោះថ្នាក់ បើសិនជាបក្សកាន់អំណាច ចង់ធ្វើអីតាមតែអំពើចិត្ត ហើយអត់ស្ដាប់មតិភាគតិច ។
លោកមាជ សុវណ្ណារ៉ា បានមានប្រសាសន៍ថា “បាទ! យើងដឹងហើយថា រដ្ឋធម្មនុញ្ ដែលបង្កើតឡើងដោយការតាក់តែងច្បាប់នៃធម្មនុញ្ញភាព ដែលក្រោយពីការបោះឆ្នោតនៃព្រះរាជាណាចក្រកម្ពុជា នៅក្នុងរបបលទ្ធិប្រជាធិបតេយ្យសេរីពហុបក្ស ក្នុងឆ្នាំ១៩៩៣ ដែលយើងបានបោះឆ្នោត ជាប់ដោយគណបក្ស៤ គឺគណបក្សរាជានិយមហ្វ៊ុនស៊ិនប៉ិច ៥៨កៅអី គណបក្សប្រជាជនកម្ពុជា ៥១កៅអី គណបក្សលទ្ធិប្រជាធិបតេយ្យសេរីនិយមព្រះពុទ្ធសាសនា របស់លោកតាសឺន សាន ១០កៅអី និងគណបក្សម៉ូលីណាកា របស់ព្រហ្ម នាគរាជ ១កៅអី ។ អ៊ីចឹងយើងបាន១២០កៅអីហើយ បានយើងធ្វើធម្មនុញ្ញភាព បង្កើតរដ្ឋធម្មនុញ្ញ ថ្ងៃ២៤ ខែកញ្ញា ឆ្នាំ១៩៩៣ រួចហើយក៏យើងបង្កើតរដ្ឋាភិបាល ប៉ុន្តែឆ្លងតាមរយៈការបង្កើតសភា សមាជិកសភា តំណាងរាស្រ្តដែលឈ្នះឆ្នោតហ្នឹង គឺ២/៣ ដើម្បីរើសក្បាលម៉ាស៊ីន នៃការដឹកនាំសភា ហើយ២/៣ នៃគណបក្ស ដើម្បីបង្កើតរដ្ឋាភិបាលអាណត្តិទី១ នៅឆ្នាំ១៩៩៣ រហូតដល់យើងមានសហនាយករដ្ឋមន្រ្តីទាំងពីរ គឺសហនាយករដ្ឋមន្រ្តីទី១ សម្ដេចក្រុមព្រះ នរោត្ដម រណឫទ្ធិ សហនាយករដ្ឋមន្រ្តីទី២ អតីតនាយករដ្ឋមន្រ្តី លោកហ៊ុន សែន ហើយក្រោយពីមានវិបត្តិនៃការដោះស្រាយ ដែលការបោះឆ្នោតរៀបចំឡើងដោយអង្គការសហប្រជាជាតិ មានការឡាំប៉ាមិនទទួលយកដោយគណបក្សប្រជាជន រហូតចង់មានការធ្វើតំបន់អបគមន៍ ដោយសម្ដេចនរោត្ដម ចក្រពង្ស់ ក៏ដូចស៊ិន សុង ស៊ិន សេន អីជាដើមហ្នឹង ។ អ៊ីចឹងយើងឃើញពេលនោះ គឺថា រូបមន្តនៃការបង្កើតរដ្ឋាភិបាល ចេញពី២/៣ ដើម្បីឲ្យមានសំឡេង៨៤រូបទៅបង្កើតរដ្ឋាភិបាលបាន ឬក៏សម្រេចអនុម័តច្បាប់ កែប្រែវិសោធនកម្មអីហ្នឹង គឺទាល់តែមានកូរ៉ុមជាអ្នកតំណាងរាស្រ្ត២/៣ ចំនួន៨៤រូបឡើងលើ ។ អ៊ីចឹងហើយអ្វីដែលខ្ញុំចង់ឲ្យមានការកែប្រែវិសោធនកម្មពី៥០+១ មក២/៣ វិញហ្នឹង គឺវាមានប្រយោជន៍ច្រើន នៅពេលដែលគណបក្សជំនាន់ថ្មី ឈ្នះឆ្នោត ។ ប្រយោជន៍ច្រើនទៅលើអី? ទី១ គឺថា យើងមានលទ្ធភាពឲ្យគណបក្សនយោបាយ មកដល់ឥឡូវគឺថា គណបក្សនយោបាយ អ្នកជំនាន់ថ្មី អ្នកបន្តវេន មិនថាបក្សកាន់អំណាច មិនថានិស្សិតបញ្ញវន្តជំនាន់ក្រោយ ដែលគាត់មានសិទ្ធិពេញលេញ ដែលធានានិងការពារ រុញច្រានទៅដោយជំពូកទី៣ មាត្រា៣៥ នៃរដ្ឋធម្មនុញ្ញ គឺថា ពលរដ្ឋទាំងពីរភេទ រួមទាំងភេទខ្ទើយ នប៉័ងស្កលិង្គទៅទៀត អាចមានសិទ្ធិចូលរួមនយោបាយយ៉ាងសកម្ម គ្មានការគំរាមកំហែង បំភិតបំភ័យ គ្មានការគាបសង្កត់និន្នាការបក្សនយោបាយ ហើយមានសិទ្ធិឈរឈ្មោះជាបេក្ខជននាយករដ្ឋមន្រ្តី មានសិទ្ធិបើកគណបក្ស មានសិទ្ធិឈរឈ្មោះឲ្យក្រុមប្រឹក្សាឃុំសង្កាត់ ឬក៏ព្រឹទ្ធសភា អីហ្នឹង គឺថា ចាប់ពីអាយុ២៥ឆ្នាំឡើងទៅ “។
លោកមាជ សុវណ្ណារ៉ា បានមានប្រសាសន៍បន្តថា “ អ៊ីចឹងហើយយើងចង់ឃើញគណបក្សនយោបាយជាច្រើនមានអាសនៈឈ្នះឆ្នោត ៥ឆ្នាំម្ដង នៃការបោះឆ្នោតសភា ហ្នឹង គឺថា មានបក្សច្រើន ជាសេរីពហុបក្ស ចាប់ពី២បក្សឡើងទៅ នៅក្នុងនីតិប្បញ្ញត្តិ នៃរដ្ឋសភា ។ អ៊ីចឹងវាអាចមានលើសពី២បក្សអ៊ីចឹងទៅ អ្នកមាន៥អាសនៈ ១០អាសនៈ ម្ភៃសាមសែហាអីអ៊ីចឹងទៅ គឺថា យើងមានអ្នកនយោបាយជំនាន់ក្រោយ ជំនាន់ថ្មី មានបញ្ញវន្ត យើងមានអ្នកប្រាជ្ញ មានចម្រុះគ្នា បង្កើតនូវពហុគំនិតក្នុងការកែច្នៃ តាក់តែងច្បាប់ អនុវត្តច្បាប់ និងបង្កើតនូវចលនានយោបាយនៃអ្នកតំណាងរាស្រ្តនៅក្នុងនីតិបញ្ញត្តិ ដើម្បីតុល្យភាពអំណាច ទៅនឹងនីតិប្រតិបត្តិ របស់រដ្ឋាភិបាលនៃបក្សឈ្នះឆ្នោតកាន់ប្រទេស ។ អ៊ីចឹងហើយយើងមើលឃើញថា កាលពីអាណត្តិ១៩៩៣ ១៩៩៨ ២០០៣ហ្នឹង គឺថា យើងនៅ២/៣ហ្នឹងហើយ ដែលមិនអាចឲ្យគណបក្សនយោបាយណាមួយជិះសេះលែងដៃ ដឹកនាំប្រទេសប្រើអំណាចហួសព្រំដែន រំលោភដល់នីតិរដ្ឋ គឺនីតិបញ្ញត្តិ នីតិប្រតិបត្តិ នីតិតុលាការ គ្មានតម្លាភាព មិនមានសុចរិតភាព អំពើពុករលួយ ភាពឈឺចាប់ អយុត្តិធម៌នៅក្នុងប្រព័ន្ធតុលាការ ។ អ៊ីចឹង៥០+១ មានន័យថា ប្រទេសកម្ពុជាយើងមិនទាន់ដូចប្រទេសថៃ ដូចប្រទេសអាមេរិក ឬក៏ប្រទេសអ្នកកាន់ប្រជាធិបតេយ្យសេរីពហុបក្ស មិនថានៅសហភាពអឺរ៉ុបអីទេ គឺថា គេគោរពច្បាប់ នីតិរដ្ឋ ។ អ៊ីចឹងរូបមន្តនៃ៥០+១ បង្កើតរដ្ឋាភិបាល គឺគេអាចធ្វើបាន ដោយមាននីតិរដ្ឋ តែសម្រាប់កម្ពុជា យើងហាក់បីនៅមានលំហូរទូលំទូលាយនៃលទ្ធិប្រជាធិបតេយ្យ និងការគោរពសិទ្ធិមនុស្សហ្នឹង វានៅមានកម្រិត ហើយនិងអំពើពុករលួយ ការជិះជាន់ ការរើសអើងគណបក្សនយោបាយ វាមិនទាន់បានបង្ហាញជាតម្លាភាព ជាយុត្តិធម៌ ជាសេរីភាព ។ អ៊ីចឹងហើយខ្ញុំមើលឃើញ៥០+១ សម្រាប់ប្រទេសកម្ពុជា គឺវាគ្រោះថ្នាក់ បើសិនបក្សកាន់អំណាច គាត់ចង់ធ្វើអីតាមតែអំពើចិត្ត ហើយអត់ស្ដាប់មតិភាគតិច អាងតែគាត់មាន៥០+១ ចាប់ពី៦៣អាសនៈ នៃអ្នកតំណាងរាស្រ្ត គាត់អាចកែប្រែវិសោធនកម្មរដ្ឋធម្មនុញ្ញតាមតែអំពើចិត្ត ដើម្បីតម្រូវបក្សកាន់អំណាច ដែលគាត់ឈ្នះឆ្នោត គាត់បង្កើតអ្វីគ្រប់សព្វបែបយ៉ាងនៃរដ្ឋាភិបាល របៀបជិះសេះលែងដៃអីហ្នឹង គឺថា យើងអត់មានទម្រង់បែបរដ្ឋាភិបាលសាធារណៈ និងអភិបាលកិច្ចល្អ ។ អ៊ីចឹងហើយយើងឃើញថា សិទ្ធិធ្វើនយោបាយដែលអត់ពេញលេញទៅទៀត អ៊ីចឹងយើងចង់ឃើញប្រទេសកម្ពុជាហ្នឹងអនុវត្តត្រលប់ទៅវិញ “ ។
លោកមាជ សុវណ្ណារ៉ា បានមានប្រសាសន៍បន្តទៀតថា “ មូលហេតុដែលអន្តរជាតិ ក៏ដូចជាអ្នកដែលតាក់តែងនូវធម្មនុញ្ញភាព ច្បាប់រដ្ឋធម្មនុញ្ញ កាលពីថ្ងៃទី២៤ ខែកញ្ញា ឆ្នាំ១៩៩៣ហ្នឹង គឺចង់ឃើញអ្នកនយោបាយចេះធ្វើការងារជាមួយគ្នា កុំឲ្យអ្នកនយោបាយដូចចាប់ក្ដាមដាក់ចង្អេរ ហើយពីមួយជំនាន់ទៅមួយជំនាន់ ឃើញថា អ្នកនយោបាយមិនទុកចិត្តគ្នា គំនុំបុគ្គលនយោបាយ យកប្រទេសជាតិ យកច្បាប់ នីតិរដ្ឋមកលេងសើច ។ អ៊ីចឹងហើយខ្ញុំមើលឃើញកាលពីការកែប្រែវិសោធនកម្មរដ្ឋធម្មនុញ្ញ ពី២/៣ មក៥០+១ នៅឆ្នាំ២០០៦ ដែលពេលនោះ សម្ដេចក្រុមព្រះ ជាប្រធានរដ្ឋសភា លោកឃើញថា នៅពេលដែលគណបក្សសម រង្ស៊ី មានសំឡេងបូកជាមួយនឹងគណបក្សប្រជាជនកម្ពុជា គាត់អាចធ្វើវិសោធនកម្មពី២/៣ មក៥០+១ ហាក់បីដូចជាយកគំនុំបុគ្គលនៃការខឹងសម្បាផ្នែកនយោបាយរវាងលោកសម រង្ស៊ី ជាមួយនឹងសម្ដេចក្រុមព្រះ នរោត្ដម រណឫទ្ធិ ។ អ៊ីចឹងហើយមួយចានទឹក មួយចានគោក គឺលោកសម រង្ស៊ី និងលោកហ៊ុន សែន សម្រេចយក៥០+១ វាមិនខុសពីមជ្ឈដ្ឋានជាតិ និងអន្តរជាតិ អ្នកវិភាគ អ្នកតាមដានស្ថានភាពនយោបាយនៅកម្ពុជា គឺហាក់បីដូចជាកាត់ក្បាលដាក់ជើងពានឲ្យទៅគណបក្សកាន់អំណាច ដែលគេនឹងអាចមានប្រៀបក្នុងការបង្កើតសភា បង្កើតរដ្ឋាភិបាល ហើយជាកញ្ចប់ទៅទៀត ដែលតាមពិតទៅ ប្រទេសប្រជាធិបតេយ្យ គេបង្កើតសភាមុន ដើម្បីរៀបចំសភាហើយ គេនឹងបោះឆ្នោតដើម្បីបង្កើតរដ្ឋាភិបាល និងគាំទ្រយកជាផ្លូវការនៃគណបក្សរដ្ឋមន្រ្តី ដែលមាននាយករដ្ឋមន្រ្តី ឧបនាយករដ្ឋមន្រ្តី ទេសរដ្ឋមន្រ្តី រដ្ឋមន្រ្តីតាមក្រសួងស្ថាប័នអ៊ីចឹងទៅ ហើយមូលហេតុដែលជំនាន់ថ្មីចង់បានហ្នឹង គឺថា ចង់កែប្រែត្រលប់ទៅមកវិញវិសោធនកម្មរដ្ឋធម្មនុញ្ញពី៥០+១ មក២/៣ គឺចង់ឲ្យអ្នកជំនាន់ក្រោយ អ្នកនយោបាយវ័យក្មេង និស្សិត បញ្ញវន្តចូលរួមប្រឡូកយ៉ាងសកម្មនៅក្នុងរឿងនយោបាយ “ ។
លោកមាជ សុវណ្ណារ៉ា បានមានប្រសាសន៍បន្ថែមថា “ អ៊ីចឹងហើយគាត់បង្កើតគណបក្សនយោបាយប្រកួតប្រជែងទៅ ធ្វើម៉េចឲ្យគោលនយោបាយ កម្មវិធីនយោបាយ យន្តការ លក្ខន្តិកៈរបស់បក្ស គាត់ទៅចាប់យកបេះដូងពលរដ្ឋនៅមូលដ្ឋាន កាលណាពលរដ្ឋពេញចិត្តហើយ គាត់បោះឆ្នោតឲ្យទៅ គឺថា គាត់បានអាសនៈនៅក្នុងសភា ។ យើងឃើញអ្នកនយោបាយជាច្រើនបក្ស ដូចប្រទេសថៃអ៊ីចឹង ៧-៨បក្សនៅក្នុងរដ្ឋសភា នៅពេលដែលបោះឆ្នោតអត់បាន២/៣ គឺថា គេរួមគ្នា ចងជាសម្ព័ន្ធនៃគណបក្សដែលមានអាសនៈនៅក្នុងសភាហ្នឹង ដើម្បីបង្កើតរដ្ឋាភិបាល ។ អ៊ីចឹងអាហ្នឹងហើយជាបំណងប្រាថ្នារបស់គណបក្សជំនាន់ថ្មី ដើម្បីឲ្យអ្នកនយោបាយវ័យក្មេង និស្សិត បញ្ញវន្តជំនាន់ក្រោយៗ ពីមួយអាណត្តិទៅមួយអាណត្តិបន្តទៅមុខទៀត នៅឆ្នាំ២០៣៣ ២០៣៨ បន្ទាប់ពី២០២៨ បើបក្សជំនាន់ថ្មីឈ្នះឆ្នោត គឺយើងដូរ សម្រាប់ឲ្យមានគណបក្សនយោបាយប្រកួតប្រជែងដោយសេរី យុត្តិធម៌ត្រឹមត្រូវ អាចទទួលយកបាន ហើយមានអាសនៈជាអ្នកតំណាងរាស្រ្ត តំណាងឲ្យពលរដ្ឋនៅក្នុងរដ្ឋសភា ឲ្យច្រើនលើសពី២បក្សឡើងលើទៅ ហើយយើងមានពហុគំនិត យើងមានចំណេះជំនាញប្រសប់ នៅក្នុងអ្វីដែលរដ្ឋសភាមាន១០គណបក្ស ១០គណៈកម្មការហ្នឹង គឺថា បណ្ដុំនៃពហុគំនិត ហើយបង្កើតនូវភាពសាមគ្គី អ្នកនយោបាយមិនរើសអើងនិន្នាការបក្ស ទោះបីទស្សនៈខុសគ្នា បក្សខុសគ្នា តែយើងយកបញ្ញា យកចំណេះដឹង តាក់តែងច្បាប់ អនុវត្តសហការរវាងនីតិបញ្ញត្តិ និងនីតិប្រតិបត្តិនៃតុល្យភាពអំណាច ហើយយើងកសាង តម្កល់ផលប្រយោជន៍ជាតិ និងប្រជារាស្រ្តជាធំ តាមរយៈអភិវឌ្ឍប្រទេស នីតិបញ្ញតិ្ត គឺថា បង្កើតនូវបណ្ដុំបញ្ញា ចំណេះដឹងផ្នែកច្បាប់ អនុវត្ត ហើយរុញច្រានឲ្យរដ្ឋាភិបាលកុំឲ្យរំលោភច្បាប់ហួសព្រំដែន ក្រៅតែពីគោរពនីតិរដ្ឋទៅ ហើយកសាងប្រទេសទៅ រុញច្រានគ្នាបង្កើតជាបណ្ដុំនៃកម្លាំងខឿនសេដ្ឋកិច្ច យើងសត្រូវតែគោលនយោបាយ តែយើងអត់សត្រូវខ្មែរគ្នាឯងទេ គឺថា យើងយកការតម្កល់ផលប្រយោជន៍ជាតិ និងប្រជារាស្រ្តជាធំ អាហ្នឹងហើយដែលគណបក្សជំនាន់ថ្មី ចង់មានការកែប្រែវិសោធនកម្មរដ្ឋធម្មនុញ្ញ ពី៥០+១ ត្រលប់មក២/៣វិញ ខណៈដែលកាលពីគំនុំនយោបាយបុគ្គលរវាងលោកសម រង្ស៊ី និងសម្ដេចក្រុមព្រះ នរោត្ដម រណឫទ្ធិ រវាងសម្ដេចក្រុមព្រះ នរោត្ដម រណឫទ្ធិ និងលោកហ៊ុន សែន ។ អ៊ីចឹងហើយពេលនោះហើយ ដែលឲ្យមានការកែប្រែវិសោធនកម្មពី២/៣ មក៥០+១ ដែលធ្វើឲ្យការរួមតូចចង្អៀតនៃលំហប្រជាធិបតេយ្យ និងសិទ្ធិមនុស្ស សេរីភាពពេញលេញក្នុងសិទ្ធិធ្វើនយោបាយហ្នឹង វាជួបការលំបាក រួមតូចទៅៗ ។ អ៊ីចឹងហើយសករាជថ្មី នៃអ្នកជំនាន់ថ្មី ឈាមថ្មី គំនិតថ្មី គិតថ្មី ធ្វើថ្មី ត្រូវតែធ្វើបែបណាដើម្បីតម្កល់ផលប្រយោជន៍ជាតិជាធំ ផលប្រយោជន៍ប្រជារាស្រ្ត ហើយឲ្យគុណតម្លៃអ្នកនយោបាយជំនាន់ក្រោយ ឲ្យគាត់មានសិទ្ធិពេញលេញ ឲ្យគាត់យល់ដឹង ឲ្យគាត់មានឱកាស មិនថាកូនអ្នកមាន អ្នកក្រ អ្នកធំ អ្នកតូច មានឱកាសចូលរួមសកម្មក្នុងផ្នែកនយោបាយ ដែលគាត់ខំរៀនសូត្រ ចង់ជួយជាតិ ចង់អីហ្នឹង មានលទ្ធភាពធ្វើសម្រាប់ផលប្រយោជន៍ជាតិ អាហ្នឹងហើយជាអ្វីដែលបក្សជំនាន់ថ្មី មានយុទ្ធសាស្រ្ត ផែនការ ដើម្បីដើរ ឲ្យប្រទេសជាតិមួយមានការរីកចម្រើន ផ្ដល់នូវសុភមង្គល និងសុខដុមរមនាសម្រាប់ប្រជារាស្រ្ត សម្រាប់ប្រទេសជាតិ “ ៕