ភ្នំពេញ ៖ ការចេញ ២បទ «សៅអើយនាងសៅ» និង «ឆ្នាំហ្នឹងសៀមរាប សប្បាយខ្លាំង» សម្រាប់ពិធីបុណ្យចូលឆ្នាំថ្មី ប្រពៃណីជាតិ ឆ្នាំម្សាញ់ ២០២៥ នេះ មិនទាន់គ្រប់គ្រាន់ទេ សម្រាប់លោកខេមរៈ សិរីមន្ដ (ខែម ប៊ុនថៃ) ដោយថ្មីៗនេះ លោកប៊ុនថៃ បានចាប់ដៃជាមួយតារាចម្រៀង Tempo Tris ជាលើកដំបូង ច្រៀងចង្វាក់ «Khmer Vibe» ដែលមិនទាន់ទាំងចេញFull MV ផង លោកមានការំពឹងទុកជាមុនថា អាចនឹងផ្ទុះកក្រើកទៀត។ ចំណែកលោក Tempo Tris ថាឆ្នាំនេះ លោកមានបទក្ដៅជាមួយលោកខេមរៈ សិរីមន្ដ ។
អ្នកគាំទ្រ (Fan) របស់ខេមរៈ សិរីមន្ដ បានសាទរ និងជំរុញឲ្យលោកថៃ ចេញ Full MV បទជាមួយលោក Tempo Tris ឲ្យបានលឿន កាន់តែល្អ ព្រោះពួកគេចង់ស្ដាប់។ ប៉ុន្ដែមានអ្នកលេងបណ្ដាញសង្គមខ្លះ ផ្លែផ្កាឲ្យលោកសិរីមន្ដ ថាបទចម្រៀងមិនទាន់ចេញជាផ្លូវការផង ម៉េចអួតថានឹងផ្ទុះ?
ជាក់ស្តែង គណនីហ្វេសប៊ុក ឈ្មោះកំពូលទើស ខមិនថា «តារាចម្រៀងស្រុកខ្មែរ មានតែ Idol ទេ បទមិនទាន់ចេញ អួតថានឹងផ្ទុះខ្លាំងបាត់ទៅហើយ Boom»។ ភ្លាមៗនោះ លោកប៊ុនថៃ បានឆ្លើយតបថា «យើងត្រូវចេះផ្ដល់តម្លៃឲ្យខ្លួនឯង មុននឹងឲ្យតម្លៃអ្នកដទៃ ឲ្យរបស់យើង ផ្ទុះមិនផ្ទុះ រង់ចាំមើលទាំងអស់គ្នាណាប្អូនសម្លាញ់» ។
ចំណែគណនីហ្វេសប៊ុក ផ្សេងៗទៀត ខមិនផ្សេងគ្នាថា «ប៉ុន្មានរ៉ិចទ័រទៅអាយដល?», «កុំផ្ទុះពេកពូ ខ្ញុំរកកន្លែងពួនសិន», «ដឹងតែផ្ទុះមេឃ រញ្ជួយដីហើយ», «ស្អុយយូរហើយ», «ប្រជាជនខ្មែរ មានសំណាងណាស់ ពីព្រោះមានបងៗឧកញ៉ា ច្រៀងឲ្យស្ដាប់», «ដឹងតែអេមជាងសិរីមាស ហើយឪ», «ផ្ទុះកម្រិតនុយក្លេអ៊ែរមែន Idol ?» … ។
ខេមរៈ សិរីមន្ដ មិនត្រឹមរំពឹងទុកជាមុនថា ខ្លួននឹងទទួលបានការគាំទ្រច្រើន ពេលចាប់ដៃជាមួយលោក Tempo Tris នោះទេ ប៉ុន្ដែមុននេះ លោកថា បទចម្រៀងលោក បានជាប់លេខ១ នៅលើ You Tube ដល់ទៅ ៥បទទៀតផង។ ការវាយលុកទាំងបទប្រពៃណីខ្មែរ, បទសម័យ និងរ៉េប របស់លោកប៊ុនថៃ នាពេលនេះ ធ្វើឲ្យមានការលើកឡើងថា តើតារាវ័យ៤០ឆ្នាំ រូបនេះចង់បានលេខ១ នៅ Galaxy ឆ្នាំ២០២៥ ឬ? ប្រសិនបើលោកសិរីមន្ដ ក្លាយជាតារានាំមុខគេនៅGalaxy មែននោះ មានន័យថា លោកព្រាប សុវត្ថិ ដែលមានងារឧកញ៉ាដូចគ្នា អាចនឹងមានបញ្ហាធំ ព្រោះលោកមិនសូវចេញបទចម្រៀងដូចលោកថៃ ឡើយ ។ បញ្ហានេះហើយដែល Fan ទាំងសងខាង មានការបារម្ភថា តារាទាំងពីរអាចនឹងផ្ទុះសង្រ្គាមប្រជែងតំណែងគ្នា ជាលើកទី២ ប្រសិនបើមានម្នាក់ផ្ទុះ ម្នាក់ទៀតស្ងាត់ ដែលពេលនោះ គេខ្លាចតែមានតារាម្នាក់ ដើរចេញទាំងជាប់កុងត្រាទៀតផង ព្រោះភ្នំមួយ មិនអាចមានខ្លា២។
ទោះបីជាយ៉ាងណា ជុំវិញបញ្ហានេះ លោកនូ ស៊ឹប ធ្លាប់អះអាងថា ព្រាប សុវត្ថិ -ខេមរៈ សិរីមន្ដ អាចច្រៀងនៅផលិតកម្មជាមួយគ្នាបាន ឬអត់ គឺអាស្រ័យនៅលើអ្នកគ្រប់គ្រងផលិតកម្ម។
សូមបញ្ជាក់ថា ខេមរៈ សិរីមន្ដ ចាប់ផ្ដើមចេញបទចម្រៀងបុកទីផ្សារឡើងវិញ នៅរយៈពេលចុងក្រោយនេះ ហើយលោកបានសម្របខ្លួនទៅតាមហ្វេនមួយចំនួន ដែលព្រមានធ្វើពហិកា លើបទចម្រៀងរបស់ខ្លួនទៀតផង តាមរយៈការចេញបទបែបស្រុកស្រែ វិញ មានដូចជាបទ «ដាច់ឆ្នាំថ្មី សល់អ្វីខ្លះ?» និងបទ «គេងលើភ្លើង» ជាដើម ដែលនាំឲ្យអ្នកមិនចូលចិត្តសិរីមន្ដ ដោយចោទលោកថា តែងតែសកម្មចេញមុខការពារថៅកែ ជាងរាំច្រៀងនោះ ចាប់ផ្ដើមងាកមកស្ដាប់ចម្រៀងលោកវិញ។ ប៉ុន្ដែអ្នកជំនាញសិល្បៈ ព្រមានថា ទោះជាសិរីមន្ដ ចង់ផ្ទុះយ៉ាងណា ក៏ថៅកែមិនឲ្យវ៉ាព្រាប សុវត្ថិ ឡើយ ៕
