ខេត្តបាត់ដំបង ៖ វត្ថុបុរាណ ចំនួន៣ ដែលពលរដ្ឋប្រទះឃើញនៅឃុំអន្លង់រុន ស្រុកថ្មគោល ត្រូវបានប្រគល់ជូនទៅមន្ទីរវប្បធម៌និងវិចិត្រសិល្បៈខេត្ត ដើម្បីយកទៅរក្សាទុកនៅសារមន្ទីរខេត្តបាត់ដំបង។
ពិធីប្រគល់និងទទួលវត្ថុបុរាណ ទាំង៣ដុំ បានធ្វើឡើងកាលពីរសៀលថ្ងៃទី០៣ ខែមេសា ឆ្នាំ២០២៥ ដោយមាន វត្តមានចូលរួមពីលោកឧត្តមសេនីយ៍ទោ ដាញ់ អេងប៊ុនចាន់ ស្នងការនគរបាលខេត្តបាត់ដំបង រួមជាមួយលោកស្នងការរងជំនួយការដឹកនាំការងារការិយាល័យ នគរបាលការពារបេតិកភណ្ឌ លោកនាយការិយាល័យនគរ បាលការពារបេតិកភណ្ឌ និងមន្ត្រីពាក់ព័ន្ធជាច្រើនទៀត ។
វត្ថុបុរាណ ចំនួន០៣ដុំ ធ្វើអំពីថ្មភក់ រួមមាន ១-សិវលិង្គ ទំហំ 44x11x11cm។ ២-ឧមាយោនី ទំហំ 64×43,5x7cm និង៣-បល្ល័ង្កទំហំ 58x57x43,5cm។
សូមបញ្ជាក់ថា វត្ថុបុរាណនេះ ត្រូវបានប្រជាពលរដ្ឋ ប្រទះឃើញនៅក្នុងអំឡុងពេលជីកកាយដីដំបូក ក្នុងស្រែ មួយកន្លែង កាលពីថ្ងៃទី២៩ ខែមីនា ឆ្នាំ២០២៥ នៅចំណុចទួលតាចាន់ ស្ថិតនៅក្រុមទី១ ភូមិសូភី ឃុំអន្លង់រុន ស្រុកថ្មគោល ខេត្តបាត់ដំបង និងបានរាយការណ៍មក សមត្ថកិច្ច មូលដ្ឋាន ហើយអង្គភាពនគរបាលការពារបេតិកភណ្ឌ យកមករក្សាទុក និងធ្វើពិធីប្រគល់ទទួលនៅថ្ងៃនេះ៕
