ភ្នំពេញ ៖ នាយកដ្ឋានប្រឆាំងបទល្មើសបច្ចេកវិទ្យា កាលពីថ្ងៃទី១ ខែកក្កដា ឆ្នាំ២០២៥ បានស្រាវជ្រាវឃាត់ខ្លួនជនសង្ស័យ ចំនួន ២នាក់ ដែលពាក់ព័ន្ធនឹងករណីឆបោកប្រាក់ តាមរូបភាពផ្សព្វផ្សាយលក់ផ្លែទុរេន អនឡាញ តាមបណ្តាញសង្គម។
ការចាប់ខ្លួននេះ ធ្វើឡើងក្រោមការដឹកនាំរបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងការ ណែនាំពីលោកឧត្តមសេនីយ៍ឯក អគ្គស្នងការរងនគរបាលជាតិ។
ជនសង្ស័យដែលត្រូវបានឃាត់ខ្លួន ទី១-ឈ្មោះ ឈ.ឆ ភេទប្រុស និងទី២-ឈ្មោះ ហ.គ.ន ភេទស្រី។ ជនសង្ស័យទាំង២នាក់ ជាម្ចាស់គណនីធនាគារ ដែលត្រូវបានប្រើប្រាស់ដើម្បីទទួលប្រាក់ពីជនរងគ្រោះ។
តាមការស្រាវជ្រាវ បានបញ្ជាក់ថា ជុំវិញករណីនេះ ក៏មានជនសង្ស័យម្នាក់ទៀត ឈ្មោះ ឈ.ប (កំពុងរត់គេចខ្លួន) គឺជាអ្នកគ្រប់គ្រងគណនីធនាគារទាំងនេះ សម្រាប់ធ្វើសកម្មភាពឆបោកប្រាក់ពីជនរងគ្រោះ ជាច្រើននាក់។
ករណីនេះ ត្រូវបានសមត្ថកិច្ចកសាងសំណុំរឿង បញ្ជូនទៅអយ្យការអមសាលាដំបូងរាជធានីភ្នំពេញ ដើម្បីអនុវត្តតាមនិតីវិធី។
ជាមួយគ្នានេះ នាយកដ្ឋានប្រឆាំងបទល្មើសបច្ចេកវិទ្យា សូមរំលឹកដល់សាធារណជន ឱ្យប្រុងប្រយ័ត្នក្នុងការទិញទំនិញតាមអនឡាញ ជាពិសេសតាមបណ្តាញសង្គម សូមត្រួតពិនិត្យឱ្យបានច្បាស់លាស់ ពីភាពជឿជាក់របស់គណនី ឬទំព័រដែលធ្វើការលក់ ដើម្បីចៀសវាងការខាតបង់ទ្រព្យសម្បត្តិ និងបណ្តាលឱ្យប៉ះពាល់ដល់ជីវភាពផ្ទាល់ខ្លួន៕