ភ្នំពេញ ៖ បុរសម្នាក់ស្រវឹងជោកជាំបើករថយន្តរេពេញផ្លូវជ្រុលទៅរទេះលក់គុយទាវ កំពុងតែឈប់លក់តាមចិញ្ចើមផ្លូវបណ្តាលឲ្យកំពប់ទឹកស៊ុបស្រោចស្រ្តីជាអ្នកលក់គុយទាវ រងរបួសធ្ងន់ និងខ្ទាតត្រូវបុរសម្នាក់ដែលឈរទិញរងរបួសស្រាល ចំនែករថយន្តបង្កព្យាយាមបើកទៅបុក ម៉ូតូមួយគ្រឿងទៀតរងរបួសធ្ងន់២នាក់ទើបឃាត់ បានទាំងរថយន្តនិងអ្នកបើកបរ គ្រោះថ្នាក់នេះបង្កអោយមានការភ្ញាក់ផ្អើលឡើងកាល ពីវេលាម៉ោង១០និង៤០នាទីយប់ ថ្ងៃទី៧ ខែមីនា ឆ្នាំ២០១៧ ត្រង់ចំនុចតាមបណ្តោយផ្លូវ៣៧១ ខាងមុខកន្លែងដំឡើងរឺម៉កនិងជួសជុល
រឺម៉កយីហោ គីន គីមឈ័ង ស្ថិតក្នុងភូមិក្បាលទំនប់ សង្កាត់បឹងទំពុនខណ្ឌមានជ័យ។
តាមប្រភពព័ត៌មានពីកន្លែងកើតហេតុបានអោយដឹងថានៅមុនពេលកើតហេតុគេឃើញ បុរសម្នាក់ស្រវឹងជោគជាំបើកបររថយន្តមួយគ្រឿងម៉ាក scion ពណ៌ស ពាក់ស្លាកលេខ
ភ្នំពញ ១AF២៨៧៧ ធ្វើដំណើរតាមបណ្តោយផ្លូវ៣៧១ក្នុងល្បឿនលឿននិងបើករេពេញផ្លូវ ទិសដៅពីកើតទៅលិច ។លុះមកដល់ចំនុចកើតហេតុខាងលើក៏បានរេចង្កូតទៅខាងស្តាំទៅបុករទេះលក់គុយទាវមួយគ្រឿង ដែលកំពុងតែឈប់លក់នៅតាមចិញ្ចើមផ្លូវត្រូវរថយន្តបុកចំពីក្រោយ ពេញទំហឹងបណ្តាលអោយស្ត្រីជាអ្នកលក់គុយទាវម្នាក់ខ្ទាតទឹកស៊ុបស្រោចពេញខ្លួនរង របួសធ្ងន់ និងបុរសម្នាក់ទៀតដែលឈរចាំទិញគុយទាវត្រូវបានខ្ទាតកញ្ចក់ត្រូវដៃខាងស្តាំ និងខ្ទាតទឹកស៊ុបស្រោចខ្លួនរងរបួសស្រាល រីឯរទេះលក់គុយទាវរងការខូចខាតវៀចដែក កាងខាងក្រោយនិងធ្លាក់ទូកញ្ចក់ទៅដី ចំណែកឯរថយន្តបង្កធ្លាក់កាងខាងមុខ
ហើយមិនបានឈប់ទេធ្វើការដោះស្រាយនោះទេ បែរជាបន្ថែមល្បឿនបើករត់ខ្លួន ទាំងសភាពភ័យស្លន់ស្លោបានចម្ងាយប្រមាណជា៥០០ម៉ែត្រ បានបើកវ៉ាជេងខាងឆ្វេង រថយន្តកុងទីន័រមួយគ្រឿងទៀតមិនចាំម៉ាក ដែលបើកបរស្របទិសគ្នាក៏ជ្រុលទៅបុកម៉ូតូ ដែលបើកបរច្រាសទិសគ្នាមួយគ្រឿងទៀតម៉ាកវ៉េវអស ពណ៌ខ្មៅ ពាក់ស្លាកលេខភ្នំពេញ ១BQ៦៣៦៧បើកបរដោយបុរសពីរនាក់ បានបុកចំពីមុខពេញទំហឹងបណ្តាលអោយអ្នក បើកបរហោះផ្លោងបោកទៅនិងកញ្ចក់ខាងមុខរថយន្តរងរបួសធ្ងន់ធ្ងរទាំងពីរនាក់ រីឯម៉ូតូរងការខូចខាតផ្នែកខាងមុខយ៉ាងដំណំ រីឯរថយន្តរងការខូចខាត់បែកកញ្ចក់ខាងមុខ និងក្រពឹតផ្នែកខាងមុខយ៉ាងដំណំ។
បន្ទាប់ពីរថយន្តបង្កបើកបុកម៉ូតូមួយគ្រឿងទៀតហើយនៅតែបន្តបើករត់គេចចេញពីកន្លែង កើតហេតុបានប្រមាណជា១០០ម៉ែត្រទើបរថយន្តបែកធុងទឹកទៅមុខលែងរួចរីឯអ្នកបើកបររថយន្តបង្កបានចុះពីលើរថយន្តហើយបំរុងរត់គេចខ្លួនតែត្រូវប្រជាពលរដ្ឋដែលជិះដេញតាមពីក្រោយចាប់ឃាត់ខ្លួនប្រគល់អោយសមត្ថកិច្ច។
បើតាមសម្តីអ្នកបើករថយន្តបង្កទាំងស្ថានភាពស្រវឹងជោគជាំបានរៀបរាប់អោយដឹងថា រថយន្តខាង លើនេះគឺជារបស់រូបគេ តែគេមិនមែនជាអ្នកបើករថយន្តនោះទេ គឺមានមិត្តភក្តិប្រុសពីរនាក់ទៀត ដែលជាអ្នកបើកបរ ដោយមិត្តភក្តិទាំងពីនាក់របស់រូបគេ បានឡើងជិះម៉ូតូឌុបចេញទៅអស់ហើយ បន្សល់ទុកតែរូបគេនៅនិងកន្លែងហេតុ។
ក្រោយពេលកើតហេតុជនរងគ្រោះពីរនាក់ដែលជាអ្នកជិះម៉ូតូត្រូវបានរថយន្តសង្គ្រោះដឹកយកទៅសង្គ្រោះនៅគ្លីនិក សុខលាភមេត្រី រីឯស្ត្រីដែលជាអ្នកលក់គុយទាវត្រូវបាន រថយន្តសាមុយដឹកយក ទៅសង្គ្រោះនៅឯមន្ទីពេទ្យបង្អែកច្បារអំពៅ។ ចំណែកឯម៉ូតូនិងរទេះលក់គុយទាវរួមទាំងរថយន្តបង្កត្រូវបានសមត្ថកិច្ចជំនាញចុះធ្វើការវាស់វែងនិងយកទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំធ្វើការដោះស្រាយនៅ ពេលក្រោយ៕
សោល វ៉ាន់ណាល់