ខេត្តកណ្តាល ៖ បុរសម្នាក់ បានទៅមើលល្ខោនបាសាក់ ក្នុងពិធីបុណ្យដារភូមិក្នុងភូមិ រហូតដល់វេលាយប់ជ្រៅ ទើបត្រឡប់មកផ្ទះ វិញ ហើយក៏ចូលដេកលង់លក់ទៅ លុះដល់ វេលាទៀបភ្លឺប្រពន្ធដាស់ឱ្យជូនទៅផ្សារទិញ អីវ៉ាន់ចាប់ហួយមកលក់ ទើបដឹងថា ប្តីស្លាប់រឹង ស្តូកបាត់ទៅហើយ បង្កឱ្យមានការភ្ញាក់ផ្អើល កាលពីវេលាម៉ោង៤និង៤០នាទី ថ្ងៃទី១៣ ខែ មីនា ឆ្នាំ២០១៧ នៅចំណុចលើផ្ទះជនរងគ្រោះនៅភូមិត្រពាំងខ្ទឹម ឃុំក្រាំងម្កាក់ ស្រុក អង្គស្នួល។
ជនរងគ្រោះដែលដេកស្លាប់រឹងស្តូកចោល ប្រពន្ធកូននេះ មានឈ្មោះមុំ ផាន់ផល្លា ភេទ ប្រុស អាយុ៣២ឆ្នាំ ជនជាតិខ្មែរ មុខរបរលក់ដូរ នៅភូមិកើតហេតុខាងលើ មានប្រពន្ធឈ្មោះសូ សារ៉ាន់ ភេទស្រី អាយុ២៤ឆ្នាំ មុខរបរលក់ដូរ។
តាមស្ត្រីជាប្រពន្ធរបស់ជនរងគ្រោះ បាន រៀបរាប់ឱ្យដឹងថា កាលពីល្ងាចថ្ងៃទី១២ ខែមីនា ឆ្នាំ២០១៧ នៅក្នុងភូមិរបស់នាងមានកម្មវិធី បុណ្យដារភូមិ ដោយមានជួលល្ខោនបាសាក់ មកសម្តែងទស្សនាទៀតផង ហើយនៅល្ងាច នោះ ប្តីនាងក៏បានទៅមើលល្ខោននឹងគេដែរ រហូត ដល់វេលាយប់ជ្រៅ ទើបត្រឡប់មកផ្ទះវិញ។ ពេលមក ប្តីនាងមិនបានចូលដេកភ្លាមៗទេ ដោយ បានបើកមើលទួរទស្សន៍មួយសន្ទុះធំ ទើបឡើង ដេកលើគ្រែ ហើយនាងក៏មិននឹកស្មានថា មាន រឿងអកុសលបែបនេះចំពោះប្តីដែរ។
ប្រភពដដែលបន្តថា លុះដល់វេលាម៉ោង ៤និង៤០នាទីទៀបភ្លឺ នៅថ្ងៃទី១៣ ខែមីនា ឆ្នាំ២០១៧ នាងបានភ្ញាក់មុនប្តី ហើយបាន ដើរចូលទៅដាស់ប្តីឱ្យជូនទៅផ្សារ បំណងទិញ អីវ៉ាន់លក់ចាប់ហួយដូចសព្វដង លុះពេលនាង យកដៃទៅអង្រួនដាស់ ទើបដឹងថា ប្តីនាងស្លាប់ រឹងឆ្កឺតបាត់ទៅហើយ បង្កឱ្យមានការភ្ញាក់ផ្អើល តែម្តង និងរាយការប្រាប់សមត្ថកិច្ចមួលដ្ឋានចុះ អន្តរាគមន៍តែម្តង។
តាមប្រភពពីសមត្ថកិច្ចបានឱ្យដឹងថា នៅ ពេលទទួលបានដំណឹងមានករណីមនុស្សដេក ស្លាប់ កម្លាំងសមត្ថកិច្ចជំនាញបានចុះទៅធ្វើ កំណត់ហេតុ និងកោសល្យវិច័យដល់ផ្ទះជន– រងគ្រោះដោយមានការចូលរួមពីផ្នែកជំនាញ នគរបាលបច្ចេកទេសស្រុក និងលោកប្រធាន ក្រុមប្រឹក្សាឃុំ លោកគ្រូពេទ្យឃុំ ដោយបញ្ជាក់ ថា ការស្លាប់របស់ជនរងគ្រោះមិនមានជាប់ ពាក់ព័ន្ធនឹងករណីឃាតកម្មទេ ពោលគឺជនរងគ្រោះស្លាប់ដោយសារជំងឺខ្យល់គរ។ បន្ទាប់មក សមត្ថកិច្ចបានប្រគល់សពជនរងគ្រោះជូនក្រុមគ្រួសារចាត់ចែងធ្វើបុណ្យ តាមប្រពៃណី៕