ស្រ្តីកម្មការនីរោងចក្រកាត់ដេរសំលៀកបំពាក់សង្ស័យមានជំងឺលើសឈាមប្រចាំកាយកំពុងតែធ្វើការបានខ្យល់គដួលសន្លប់ពេលបញ្ជូនដល់មន្ទីរពេទ្យបានស្លាប់ កាលពីវេលាម៉ោង១និង៥០នាទីរសៀលថ្ងៃទី១៥ ខែ មីនា ឆ្នាំ ២០១៧នៅចំណុចក្នុងរោងចក្រអេសអ៊ិល (SL) ផ្លូវលេខ៣៧១ ភូមិ ឬស្សី សង្កាត់ ស្ទឹងមានជ័យ ខណ្ឌមានជ័យ ។
សពមានឈ្មោះ ប្រាក់ កល់ ភេទស្រី អាយុ៤៣ឆ្នាំ មុខរបរកម្មការិនីរោងចក្រអេសអ៊ិល
ស្នាក់នៅផ្ទះជួល ផ្លូវលំភូមិឬស្សី សង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅភូមិតាឡឹង ឃុំភ្នំដិន ស្រុកគីរីវង្ស ខេត្តតាកែវ ។
បើតាមសំដីប្អូនស្រីបង្កើតសពមានឈ្មោះ ប្រាក់ វុទ្ធី អាយុ២៤ឆ្នាំ មុខរបរធ្វើការនៅរោងចក្រជាមួយគ្នា បានប្រាប់ឲ្យដឹងថា គាត់ជាស្រ្តីមេម៉ាយមានកូនចំនួន៤នាក់ ស្រី៣នាក់និងប្រុសម្នាក់ ប្តីមានជំងឺស្លាប់ជិត១០ឆ្នាំមកហើយ ។ កន្លងមកសាច់ញាតិមិនបានដឹងថា ស្រ្តីខាងលើមានជំងឺលើសឈាមទេព្រោះមិនដែលទៅមន្ទីរពេទ្យពិនិត្យសុខភាពទេ ទាល់តែពេលស្លាប់ទើបគ្រូពេទ្យសង្ស័យថាមានជំងឺលើសឈាម ។
ប្រភពដដែលបានឲ្យដឹងទៀតថា មុនកើតហេតុបងស្រីរបស់គាត់កំពង់ធ្វើការស្រាប់តែដួលសន្លប់ហើយស្មានតែគាត់ខ្យល់គបានយកទៅអោយពេទ្យរោងចក្រពិនិត្យ តែពេទ្យប្រចាំការនៅរោងចក្រថាវាស់ឈាមគាត់ឡើងខ្ពស់ពេកបានប្រញាប់ដឹកតាមរថយន្តយកទៅមន្ទីរពេទ្យមិត្តភាពខ្មែរសូវៀត ពេលទៅដល់មន្ទីរពេទ្យគ្រូពេទ្យប្រាប់ថាស្លាប់ហើយ សឹងតែមិនចង់ជឿ ។
នគរបាលខណ្ឌមានជ័យបានប្រាប់ថា បន្ទាប់ពីជនរងគ្រោះបានប្ដឹងសមត្ថកិច្ចចុះមកត្រួតពិនិត្យកម្មការិនីរោងចក្រកាត់ដេរម្នាក់ស្លាប់ពេលដឹកមកដល់មន្ទីរពេទ្យមិត្តភាពខ្មែរសូវៀតហៅពេទ្យរុស្ស៊ី ទើបទាក់ទងទៅកម្លាំងការិយាល័យបច្ចេកទេសវិទ្យាសាស្រ្តរាជធានីភ្នំពេញ និងគ្រូពេទ្យកោសល្យវិច័្ឆយរាជធានីភ្នំពេញ បានចុះមកត្រួតពិនិត្យសាកសពរួចបញ្ជាក់ថា ពិតជាស្លាប់ដោយសារគាំងបេះដូង សង្ស័យមានជំងឺលើសឈាមប្រចាំកាយ ។ សពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើតនៅភូមិតាឡឹង ឃុំ ភ្នំឌិន ស្រុកគីរីវង្ស ខេត្តតាកែវ ៕
គួន ចំរើន