ទេសចរណ៍៖ រដ្ឋមន្ត្រីពាណិជ្ជកម្មអូស្ត្រាលីបានឲ្យដឹងថាភ្ញៀវទេសចរក្នុងស្រុកនិងបរទេសបានចំណាយប្រាក់ជាង៧៥ប៊ីលានដុល្លារក្នុងប្រទេសអូស្ត្រាលីជាលើកដំបូងក្នុងឆ្នាំ២០១៦នេះ ។
រដ្ឋមន្ត្រីពាណិជ្ជកម្មលោក Steven Ciobo បានបញ្ចេញរបាយការណ៍ស្តីពីការស្ទាបស្ទង់ភ្ញៀវទេសចរជាតិសម្រាប់ឆ្នាំ២០១៦កាលពីថ្ងៃពុធនេះថាផ្អែកតាមកំណើនទឹកប្រាក់៤,២៨ប៊ីលានដុល្លារ ការចំណាយរបស់ភ្ញៀវទេសចរគឺមានចំនួនលើស៧៦ប៊ីលានជាលើកដំបូង។
លោកបានបន្ថែមថាភ្ញៀវជាតិនៅតែជាអ្នកចំណាយច្រើនជាងគេបំផុតដដែល ខណៈភ្ញៀវអន្តរជាតិវិញដូចយ៉ាងអ្នកមកពីប្រទេសចិនបាននិងកំពុងជំរុញនូវកំណើនខ្លាំងក្លាក្នុងការចំណាយផ្នែកទេសចរណ៍អន្តរជាតិ។
ថ្មីៗនេះតួលេខពីទីភ្នាក់ងារស្ទាបស្ទង់អ្នកទេសចរអន្តរជាតិបង្ហាញថាភ្ញៀវអន្តរជាតិដែលមកទស្សនាអូស្ត្រាលីបានចំណាយប្រាក់អស់៣០ប៊ីលានដុល្លារក្នុងអំឡុងពេលដូចគ្នាកាលពីឆ្នាំចាស់ ។ លោកបញ្ជាក់ថារបាយការណ៍នៃខ្ទង់ចាយវាយនេះកំពុងតែបង្កើតការងារដល់ប្រជាជនអូស្ត្រាលីកាន់តែច្រើនថែមទៀតផង ។
ទោះជាយ៉ាងណាលោកបានបញ្ជាក់ថាវិស័យទេសចរណ៍ជាឧស្សាហកម្មដែលផលិតបានចំណូល៩២ប៊ីលានដុល្លារ ទន្ទឹមនិងនេះបរិមាណពលរដ្ឋអូស្ត្រាលីដែលធ្វើដំណើរកម្សាន្តនៅថ្ងៃបុណ្យឈប់សម្រាកកើនឡើង៦%ឬស្មើនឹង៣៧,១លាននាក់ ខណៈដំណើរកម្សាន្តពីកន្លែងមួយទៅទីតាំងមួយផ្សេងទៀតកើន១១%ឬស្មើនឹង៩២,៨លាននាក់។
ប្រែសម្រួលដោយ៖ អុីវ វិចិត្រា