កំពូលតារាចម្រៀងប៉ុប កូរ៉េខាងត្បូង លោក Rain ដែលខ្មែរយើងតែងហៅថា ”លីយ៉ុងចេ” នោះ បានធ្វើឲ្យកក្រើកឆាកត្រន្រ្ដី ”Smart Mega Concert” កាលពីរាត្រីថ្ងៃទី៣០ ខែមីនា ឆ្នាំ២០១៧ នៅមជ្ឈមណ្ឌលកោះពេជ្រ នោះ ពិតជាធ្វើឲ្យកក្រើកពេញទីលានកោះពេជ្រ តែម្ដង។
ក្រុមយុវ័យជាច្រើនបានទៅគាំទ្រតារាចម្រៀងលំដាប់ថ្នាក់ពិភពលោក ដ៍ល្បីល្បាញនេះ ពិសេសពេល លោក Rain ច្រៀងបទ ”La Song“ ដែលមានយុវ័យខ្មែរជាច្រើនបានច្រៀង និងរាំតាម នាំឲ្យតារាកូរ៉េរូបសង្ហារនោះសប្បាយចិត្តជាខ្លាំង។
លោក Rain បាននិយាយលើឆាកថា ”I Love Cambodia” ដែលបកប្រែជាខេមរភាសាថា ”ខ្ញុំស្រលាញ់ប្រទេសកម្ពុជា”។
លោក Rain ដែលមកច្រៀងសម្ដែងជាលើកទី១ នៅប្រទេសកម្ពុជានេះ បានច្រៀងបទល្បីៗរបស់ខ្លួន ៦បទ ហើយតាមប្រភពពីអ្នករៀបចំការប្រគំតន្ដ្រីនោះ បានបង្ហើបដោយសុំមិនបញ្ចេញឈ្មោះថា លោក Rain ទទួលបានតម្លៃខ្លួន១៨ម៉ឺនដុល្លារ ពីការច្រៀងមួយភ្លែតនោះ បានន័យថា ក្នុង១បទ ស៊ីថ្លៃ៣ម៉ឺនដុល្លារ។
លោកហាក់ ជាអ្នកតំណាងឲ្យក្រុមហ៊ុន Smart មិនឆ្លើយតបចំពោះព័ត៌មានដែលលេចឭថា លោក Rain បានតម្លៃខ្លួន១បទ ៣ម៉ឺនដុល្លារ ពីការច្រៀងប្រគំតន្ដ្រី Smart Mega Concert នោះឡើយ។ លោកហាក់ និយាយខ្លីថា ”អូបង! រឿងតម្លៃខ្លួនហ្នឹង ខ្ញុំមិនដឹងទេ ព្រោះគេជាអ្នករៀបចំតើ! បើសិនជាដឹង ក៍មិនអាចប្រាប់បានដែររឿងហ្នឹង”៕
