បំណុល៖ តាមរបាយការណ៍របស់គេហទំព័រ Vneconomy ឲ្យដឹងថាបំណុលពិបាកទាររបស់ប្រទេសវៀតណាមបានបង្ហាញឲ្យឃើញជាថ្មីម្តងនូវបញ្ហាមួយសម្រាប់ប្រព័ន្ធធនាគារស្របពេលដែលវាអាចនឹងមានកម្រិតខ្ពស់ជាងមុនដល់ទៅ៣ដងឯណោះ ។
ឥណទានក្រៅប្រតិបត្តិការត្រូវបានវាយតម្លៃឡើងវិញជាថ្មីម្តងទៀតដូចដែលបានបង្ហាញតាមរយៈឯកសារមួយដែលចេញផ្សាយកាលពីពេលថ្មីៗនេះដោយធនាគាររដ្ឋវៀតណាម ដែលជាផ្នែកមួយនៃគម្រោងមួយសម្រាប់សេចក្តីព្រាងច្បាប់គាំទ្រការធ្វើរចនាសម្ព័ន្ធធនាគារនិងការទូទាត់នូវបំណុលពិបាកទារជាដើម ។
យោងតាមធនាគាររដ្ឋវៀតណាម នៅក្នុងនីតិវិធីនៃការធ្វើរចនាសម្ព័ន្ធប្រព័ន្ធធនាគារ បណ្តាធនាគារនានាបានធ្វើឲ្យប្រសើរឡើងនូវគុណភាពនៃទុនសកម្មឥណទាន និងការគ្រប់គ្រងបំណុលពិបាកទាររបស់ពួកគេ ។
កាលពីដំណាច់ឆ្នាំ២០១៥ បំណុលពិបាកទាររបស់វៀតណាមមានចំនួន៤៩៣,០៩ទ្រីលានដុងបានទូទាត់សងរួចហើយនៅចុងឆ្នាំ២០១៦ ស្របពេលដែលអនុបាតនៃបំណុលពិបាកទារក្នុងប្រព័ន្ធធនាគារគឺស្ថិតក្នុងអត្រា២,៤៦%។
ទោះជាយ៉ាងណានិយតករនៃវិស័យធនាគាររបស់វៀតណាមបច្ចុប្បន្នបានប្រកាន់ជំហរការប្រុងប្រយ័ត្នចំពោះឥណទានក្រៅប្រតិបត្តិការដែលការសមាមាត្រនឹងបំណុលពិបាកទារគឺស្ថិតនៅក្រោម២,៤៦% ដែលរាយការណ៍ដោយបណ្តាគ្រឹះស្ថានឥណទាននានា។
ប្រែសម្រួលដោយ៖ អុីវ វិចិត្រា