សេដ្ឋកិច្ច៖ តាមរបាយការណ៍ចក្ខុវិស័យនៃការអភិវឌ្ឍអាស៊ីប្រចាំឆ្នាំ២០១៧របស់ធនាគារអភិវឌ្ឍន៍អាស៊ី (ADB) ឲ្យដឹងថាសេដ្ឋកិច្ចរបស់វៀតណាមនឹងកើនឡើង៦,៥%ក្នុងឆ្នាំនេះនិងពង្រីកបាន៦,៧%ក្នុងឆ្នាំ២០១៨ ។
តួលេខនេះត្រូវបានបញ្ចេញដោយអ្នកឯកទេសសេដ្ឋកិច្ចរបស់ ADB លោក Aaron Batten ក្នុងសន្និសិទកាសែតមួយស្តីការអភិវឌ្ឍសេដ្ឋកិច្ចក្នុងប្រទេសវៀតណាមនិងតំបន់អាស៊ីប្រចាំឆ្នាំ២០១៧ដែលត្រូវបានប្រារព្ធធ្វើឡើងក្នុងទីក្រុងហាណូយកាលពីថ្ងៃទី១០ខែមេសានេះ ។
ក្នុងរបាយការណ៍នោះក៏បានកត់សម្គាល់ផងដែរថាសេដ្ឋកិច្ចរបស់វៀតណាមនឹងត្រូវបានជំរុញឲ្យរីកធំធាត់តាមរយៈការអភិវឌ្ឍក្នុងផលិតកម្មក្នុងស្រុក សំណង់ ការលក់រាយនិងលក់ដុំ ធនាគារនិងទេសចរណ៍ ។
ចំណែកការវិនិយោគផ្ទាល់ពីបរទេសនឹងជួយជំរុញបង្កើនផលិតកម្មក្នុងស្រុកក៏ដូចជាការរកចំណូលពីការនាំចេញផងដែរ ។
ជាងនេះទៅទៀតបរិមាណនៃជនជាតិវៀតណាមដែលមានកម្រិតជីវភាពថ្នាក់កណ្តាលនឹងកើនឡើងទ្វីបដងឬមានចំនួន៣៣លាននាក់ក្នុងឆ្នាំ២០៣០ ដែលនាំមកនូវកំណើននៅក្នុងការចំណាយជាបុគ្គលនិងការលក់រាយផងដែរ ។
ទន្ទឹមនិងនេះផលិតកម្មក្នុងផ្នែកកសិកម្មត្រូវបានគេព្យាករថានឹងរើបឡើងបន្តិចបន្តួចក្នុងឆ្នាំ២០១៧ ដែលនាំមកនូវចក្ខុវិស័យនៃតម្រូវការអាហារនៅលើពិភពលលោកខ្ពស់ជាងមុន ។
ទោះជាយ៉ាងណាវិស័យកសិកម្មរបស់វៀតណាមនឹងបន្តកំណើនក្នុងកម្រិតយឺតរបស់ខ្លួនធៀបនឹងវិស័យដទៃដែលអូសទាញទម្លាក់ចុះនូវនិន្នាការសេដ្ឋកិច្ចជាតិ។
ប្រែសម្រួលដោយ៖ អុីវ វិចិត្រា