ការងារ៖ ទិន្នន័យរដ្ឋាភិបាលបង្ហាញថាអត្រាអត់ការងារធ្វើរបស់ប្រទេសកូរ៉េខាងត្បូងបានថយចុះបន្តិចកាលពីខែមុនដោយសារតែកំណើននៃការងារក្នុងវិស័យសំណង់និងលក់រាយ។
យោងតាមតួលេខដែលចងក្រងដោយការិយាល័យស្ថិតិកូរ៉េបង្ហាញថា អត្រាអត់ការងារក្នុងប្រទេសសេដ្ឋកិច្ចធំជាងគេបំផុតទី៤នៅអាស៊ីមួយនេះស្ថិតក្នុងកម្រិត៤,២%កាលពីខែមុន ថយចុះប្រមាណជា០,១ពិន្ទុបើប្រៀបធៀបនឹងអំឡុងពេលដូចគ្នាកាលពីឆ្នាំទៅ ។
ចំណែកធៀបនឹងខែមុននេះមួយខែ អត្រាអត់ការងារបានថយចុះ០,៨ពិន្ទុពីកម្រិតខ្ពស់៥%ក្នុងរយៈពេល៧ឆ្នាំមកនេះ ។
បរិមាណប្រជាជនមានការងារធ្វើក្នុងប្រទេសកូរ៉េខាងត្បូងឈានដល់ចំនួន២៥,២៧លាននាក់ក្នុងខែមីនាកើនឡើង៤៦៦.០០០នាក់ធៀបនឹងឆ្នាំទៅ ដែលនេះជាកំណើនច្រើនជាងគេបំផុតគិតចាប់តាំងពីខែធ្នូឆ្នាំ២០១៥ ។
អត្រាអត់ការងារចំពោះប្រជាជនវ័យក្មេងដែលមានអាយុចន្លោះពី១៥ឆ្នាំនិង២៩ឆ្នាំមានកម្រិត១១,៣%កាលពីខែមុនថយចុះពីអត្រា១១,៨%នៃបរិមាណសរុបកាលពីឆ្នាំទៅនិងពីកម្រិត១២,៣%ដែលសម្រេចបានក្នុងខែកុម្ភះ ។
ទន្ទឹមនិងនេះអត្រាការងារសម្រាប់ខែមុនបានកើនឡើង៦០,២% ដែលជាកម្រិតខ្ពស់ក្នុងរយៈពេល២០ឆ្នាំសម្រាប់ខែមីនា។
ទោះជាយ៉ាងណាទីភ្នាក់ងារស្ថិតិកូរ៉េបានបញ្ជាក់ថាកំណើនយ៉ាងគំហុកនៅក្នុងបរិមាណការងារប្រចាំខែនាំមុខដោយវិស័យសំណង់និងលក់រាយក៏ដូចជាលក់បោះដុំដោយការផលិតការងារថ្មីបានចំនួន១៦៤.០០០នាក់និង១១៦.០០០នាក់កាលពីខែមុន ។
ប្រែសម្រួលដោយ៖ អុីវ វិចិត្រា