ចំណូល៖ នាយកដ្ឋានទេសចរណ៍បានឲ្យដឹងថាប្រទេសថៃរកចំណូលបានជាង៩០០លានបាតក្នុងប្រាក់ចំណូលពីផលិតកម្មភាពយន្តអន្តរជាតិក្នុងប្រទេសអំឡុងត្រីមាសទី១នៃឆ្នាំ២០១៧នេះ នោះក៏ព្រោះតែការលើកទឹកចិត្តថ្មីដែលផ្តល់ឲ្យដល់បណ្តាលផលិតករខ្សែភាពយន្ត ។
អគ្គនាយកនៃអគ្គនាយកដ្ឋានទេសចរណ៍ថៃលោកស្រី Wansiri Morakul បានឲ្យដឹងថានាយកដ្ឋានបានវាយតម្លៃទុកថាថៃនឹងសម្រេចបានគោលដៅរបស់ខ្លួនក្នុងការបង្កើតចំណូល៣ទៅ៤ប៊ីលានបាតពីការផលិតភាពយន្តបរទេសក្នុងឆ្នាំនេះ។
តាមស្ថិតិបង្ហាញថាភាពយន្តបរទេសចំនួន២៣៩រឿងបានថតរួចរាល់ហើយក្នុងប្រទេសថៃគិតចាប់ពីខែមករាដល់ខែមីនាឆ្នាំនេះ ។ ភាពយន្តហូលីវូតគឺជាអតិថិជនធំជាងគេដែលបង្កើតបានចំណូល១៦១លានបាត ចំណែកអ្នកបន្ទាប់ពីគឺភាពយន្តអង់គ្លេសបាន១៦០លានបាត ។
ការលើកទឹកចិត្តថ្មីចូលជាធរមានចាប់តាំងពីខែមករាដែលជាការផ្តល់ឲ្យនូវសាច់ប្រាក់សងឬបង្វិលឲ្យវិញ១៥%សម្រាប់ផលិតករភាពយន្តជាមួយនិងការចំណាយក្នុងស្រុកជាង១០០លានបាត ។ Close ដែលជាភាពយន្តផលិតដោយផលិតករអង់គ្លេសទទួលបានប្រាក់បង្វិលឲ្យវិញ១៥%ជាមួយនិងការចំណាយក្នុងស្រុក១០០លានបាត ។
ផលិតកម្មភាពយន្តពីរដែលវិនិយោគក្នុងទំហំទឹកប្រាក់ជាង៦២០លានបាតនឹងទំនងជាត្រូវបានអនុម័តឲ្យមានការសងឬបង្វិលប្រាក់ឲ្យវិញក្នុងខែឧសភាហើយសាច់ប្រាក់ទាំងនោះអាចស្មើនឹង៩៣លានបាត ។
ទោះជាយ៉ាងណាលោកស្រីអគ្គនាយកបានថ្លែងថានាយកដ្ឋានរបស់លោកស្រីក៏បានចាប់ផ្តើមបើកយុទ្ធនាការផ្សព្វផ្សាយនិងធ្វើទីផ្សារដើម្បីទាក់ទាញបណ្តាក្រុមហ៊ុនផលិតកម្មបរទេសឲ្យប្រើប្រាស់ប្រទេសថៃជាកន្លែងថតភាពយន្ត ។
ប្រែសម្រួលដោយ៖ អុីវ វិចិត្រា