វៀតណាម៖ ការិយាល័យស្ថិតិទូទៅបានប្រកាសថាសន្ទស្សន៍តម្លៃទំនិញប្រើប្រាស់ក្នុងខែមេសានៅតែមិនប្រែប្រួលដដែលធៀបនឹងខែមុន ប៉ុន្តែកើនឡើង៤,៣%ពីអំឡុងពេលដូចគ្នាកាលពីឆ្នាំ២០១៦ ។
ប្រភពដដែលបានឲ្យដឹងថាសន្ទស្សន៍តម្លៃប្រចាំខែជាមធ្យមក្នុងអំឡុងខែមករាដល់ខែមេសាបានឡើងថ្លៃ៤,៨%ធៀបនឹងរយៈពេលដូចគ្នាកាលពីឆ្នាំទៅ។
តម្លៃទំនិញកើនឡើងត្រូវបានគេសង្កេតឃើញក្នុងមុខទំនិញ៧មុខក្នុងចំណោម១១មុខក្នុងតម្លៃគោលដែលឡើងថ្លៃច្រើនជាងគេបំផុតក្នុងសេវាថែទាំសុខភាពនិងឱសថគឺស្ថិតក្នុងកម្រិត៨,០៥% ។
ចំណែកក្រុមទំនិញ៤មុខដែលជួបនឹងការធ្លាក់ចុះនៃតម្លៃហាងឆេងគឺផ្នែកដឹកជញ្ជូនថយចុះ ១,៣៨% សេវាផ្គត់ផ្គង់ម្ហូបអាហារធ្លាក់ថ្លៃ០,៦៦% គ្រឿងសំណង់និងសម្ភារៈប្រើប្រាស់ក្នុងលំនៅឋានធ្លាក់ថ្លៃ០,២៤%ទូរគមនាគមន៍ធ្លាក់០,០៣% ។
យោងតាមអគ្គនាយករងនៃអគ្គនាយកដ្ឋានស្ថិតិតម្លៃទំនិញរបស់ការិយាល័យស្ថិតិទូទៅលោក Do Thi Ngoc ការកើនឡើង១០,៥៩%នៃតម្លៃសេវាឱសថដែលដាក់សម្រាប់អ្នកទិញធានារ៉ាប់រងសុខភាពបានធ្វើឲ្យសន្ទស្សន៍តម្លៃទំនិញកើនឡើងប្រមាណជា០,៤១%។
ក្នុងខែនេះដែរ តម្លៃមាសក្នុងស្រុកជាមធ្យមបានកើនឡើង១,០១%ធៀបនឹងខែមីនាដែលឡើងចុះក្នុងរង្វង់១៥៨៤ដុល្លារក្នុងតម្លឹង ។ ទន្ទឹមនិងនេះអត្រាប្តូរប្រាក់ស្ថិតក្នុងហាងឆេង២២.៦០០ទៅ២២.៧០០ដុងក្នុងមួយដុល្លារ ធ្លាក់ថ្លៃ០,៣៨%ធៀបនឹងខែមុន ។ ដោយឡែកអតិផរណាស្នូលក្នុងខែមេសាបានកើនឡើង០,០៩%ធៀបនឹងខែមុននិង១,៥%ធៀបនឹងអំឡុងពេលដូចគ្នាកាលពីឆ្នាំ២០១៦ ។
ប្រែសម្រួលដោយ៖ អុីវ វិចិត្រា