ភ្នំពេញ ៖ ប្រជាពលរដ្ឋភ័យផ្អើលទាំងព្រឹក បន្ទាប់ពីភាយធំុក្លិនអ្វីម្យ៉ាងចេញពីរោងចក្រផលិត ទឹកកកដើម មួយកន្លែង ស្ថិតនៅតាមផ្លូវបេតុង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោង៨និង១០នាទីព្រឹក ថ្ងៃទី៣១ ខែមិថុនា ឆ្នាំ២០១៧ តែត្រូវបាន មេការរោងចក្រអះអាងថា ផ្ទុះកង់រថយន្តទេ ។
តាមប្រជាពលរដ្ឋរស់នៅក្បែរទីតាំងរោងចក្រផលិតទឹកកកខាងលើ បានឲ្យដឹងថា នៅវេលាម៉ោងខាងលើ មានភាយសាយក្លិនអ្វីម្យ៉ាងចេញពីរោងចក្រ ទើបបង្កឲ្យពលរដ្ឋនាំគ្នាភ័យ ហើយងឿងឆ្ងល់ ខ្លាចបង្កឲ្យផ្ទុះ ឬបង្កហានិភ័យកើតឡើង ។
បាតុភាពភ្ញាក់ផ្អើលខាងលើ ត្រូវបាននគរបាលមូលដ្ឋានចុះទៅដល់ទីតាំងរោងចក្រទឹកកក តែពុំមានអ្វីកើតឡើងគួរឲ្យកត់សំគាស់ ។ តាមនគរបាលបានឲ្យដឹងថា រោងចក្រខាងលើធ្លាយទុយោហ្គាស តែមិនបង្កឲ្យអ្នកណារងរបួស ឬប៉ះពាល់ធ្ងន់ធ្ងរនោះទេ ភ្លាមៗត្រូវបានបិទពន្លត់ម៉ាសុីនភ្លាម ដើម្បីរងចាំជួសជុលឡើងវិញ ។
ក្រោយពីផ្ទះរឿងខាងលើ ត្រូវបានអ្នកសារពត៌មានចុះទៅដល់រោងចក្រទឹកកក តែខាងរោង ចក្រមិនអនុញាតឲ្យចូលមើលឡើយ គ្រាន់តែប្រាប់ថា អត់មានរឿងអ្វី ធ្លាយទុយោហ្គាស កើតឡើងនោះទេ ពិតជាផ្ទុះកង់រថយន្ត ។
ទោះជាមានការបំភ្លឺផ្សេងគ្នាយ៉ាងណាក៏ដោយ បាតុភាពដែលបង្កឲ្យពលរដ្ឋរស់នៅជុំវិញទីតាំងខាងលើ មិនដឹងច្បាស់មកពីអ្វីឲ្យពិតប្រាកដ ៕