ពិធីបូជាសពរបស់ពិធីករដ៏ល្បីឈ្មោះលោកអ៊ិត សេដ្ឋា បានបញ្ចប់ហើយនៅថ្ងៃទី៥ ខែមិថុនា ឆ្នាំ២០១៧ ដែលមានមិត្តភក្ដិក្នុងសិល្បៈ អ្នកគាំទ្រ សប្បុរសជន និងក្រុមការងារនៅCTN បានចូលរួមជូនដំណើរនៅវិនាទីចុងក្រោយរបស់លោកជាមួយក្ដីអាឡោះអាល័យសោកសង្រេងជាពន់ពេក ហើយខណៈដែលក្រុមការងារនៅCTN កំពុងតែប្រឹងប្រែងខ្នះខ្នែងស្វែងរកជំនួយដើម្បីបំពេញបំណងចុងក្រោយ របស់លោកអ៊ិត សេដ្ឋា នោះសម្ដេចតេជោហ៊ុន សែន ក៏បានប្រកាសចូលរួមចំណែកជួយចិញ្ចឹម បីបាច់កូនប្រុសស្រីកំព្រាទាំង៣នាក់ផងដែរ។
បន្ទាប់ពីលោកអ៊ិត សេដ្ឋា បានធ្វើមរណៈកាលទៅ ក្នុងជន្មាយុ៤៩ឆ្នាំ ដោយរោគាពាធ នាពេលថ្មីៗនេះ ហើយបានបន្សល់ទុកកូនកំព្រាតូចៗប្រុសស្រី៣នាក់គ្មានទីពឹង គ្មានផ្ទះសម្បែង និងគ្មានថវិកាទ្រទ្រង់ជីវភាពនោះមានសប្បុរសជនជាច្រើនបានចូលរួមចែករំលែកជួយជាបន្តបន្ទាប់។
តាមការបញ្ជាក់របស់លោក ហេង ឡុង បានឲ្យដឹងថា សរុបបច្ច័យដែលទទួលបាន តាមរយៈនាយពែកមី ដោយផ្ទាល់មានចំនួន ៤២៦០ដុល្លារ(ថ្ងៃដំបូង)។ ២០លានរៀលពី ឯកឧត្តម ហ៊ុន ម៉ាណែត និងការចូលបុណ្យពីបងប្អូនសាធារណជនដែលផ្ញើឲ្យតាមរយៈ Wing មានចំនួន ១០៥០ដុល្លារ និងសល់ជាង៦០០ដុល្លារ ទៀតដែលមិនទាន់បានដក។ នេះមិនទាន់គិតប្រាក់ដែលសប្បុរសជន ចូលរួមជាបច្ច័យ និងបរិច្ចាគនៅទីតាំងពិធីបុណ្យសពនៅថ្ងៃល្ងាចមិញនៅឡើយ។ក្នុងនោះ សម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ក៏បានផ្ដល់ថវិកាសរុប១៥លានរៀល ដល់ក្រុមគ្រួសារសពផងដែរ។ក្រៅពីនោះ ឧកញ៉ា ម៉ុង ឬទ្ធី បានសន្យាផ្ដល់ផ្ទះមួយល្វែងនៅខេត្តព្រះសីហនុ បើសមាជិកគ្រួសារព្រមទទួល និងប្រាក់ចំនួន៥០០ ដុល្លារបន្ថែមទៀត។ ឯអ្នកឧកញ៉ា គិត ម៉េង តាមរយៈលោកតា វ៉ិចទ័រ បានធានារ៉ាប់រងរាល់ការចំណាយលើពិធីបុណ្យសពទាំងមូលថែមទៀត។ចំណែកឯខាងការសិក្សារបស់ក្មេងកំព្រាទាំង៣វិញ ឯកឧត្ដម ខៀវ កញារីទ្ធ រដ្ឋមន្ត្រីក្រសួងព័ត៌មាន ក៏ដូចជាក្រុមហ៊ុន CBS បានសន្យាថា នឹងជួយឲ្យអស់ពីលទ្ធភាពដើម្បីរៀនបានចប់ចុងចប់ដើម។ មិនត្រឹមតែប៉ុណ្ណោះ ឯកឧត្ដម លី ឆេង អគ្គនាយកប៊ែលធី គ្រុប ក៏បានប្រកាសផ្ដល់អាហារូបករណ៍ ថ្នាក់ចំណេះទូទៅ និងភាសាអង់គ្លេសដល់ក្មេងកំព្រាទាំង៣រៀនរហូតដល់ថ្នាក់បញ្ចប់ផងដែរ។ចំណែកឯលោកអ៊ឹម ជីវ៉ា ក៏បាននាំយកថវិការលោកពេជ្រ កែវមុនី អភិបាលខណ្ឌមានជ័យចំនួន៤០,០០០០រៀលទៅចូលរួមក្នុងពិធីបុណ្យបូជាសពផងដែរ ហើយអ្វីដែលគួរឲ្យភ្ញាក់ផ្អើលទៀតនោះនៅថ្ងៃទី៦ ខែមិថុនានេះ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ក្រៅពីឧបត្ថម្ភប្រាក់១ម៉ឺនដុល្លារ ដល់កូនកំព្រាទាំង៣របស់សពលោក អ៊ិត សេដ្ឋា សម្ដេចបានបង្ហោះសំណេរលើទំព័រហ្វេសប៊ុកថានឹងចូលរួមចំណែកជួយចិញ្ចឹមបីបាច់កូនកំព្រាទាំង៣របស់សពលោកអ៊ិត សេដ្ឋា។
សម្ដេចបានបង្ហោះសំណេរថា“ក្មួយ អ៊ិត សេដ្ឋា ពេលនះរូបកាយក្មួយបានបាត់ពីភពផែនដីនេះរួចទៅហើយ បន្សល់ទុក តែការស្តាយ ស្រណោះពីមនុស្សជាច្រើនដែលបានរាប់អានក្មួយ។
ប្រមាណ២០ឆ្នាំកន្លងមកនេះ ទំនាក់ទំនងរវាងក្មួយជាមួយពូនិងមីងប្រៀបដូចឪពុក ម្តាយនិងកូន។ ពូនៅចាំបាននូវអ្វីៗដែលក្មួយបានរៀបរាប់តាមលិខិត តាមទូរសស័ព្វនិងការជួបក្មួយផ្ទាល់នៅផ្ទះពូនាឆ្នាំ២០១៥។ ពូនៅចាំបាននូវសំណូមពរដែលក្មួយបានសុំមកពូដើម្បីកសាងសាលារៀនដែលក្មួយធ្លាប់រៀន ម្តាយក្មួយធ្លាប់បង្រៀន និងកសាងទីអារ៉ាមនៅភូមិកំណើតរបស់ក្មួយ។
ក្មួយប្រុស ពេលក្មួយកំពុងត្រូវការសង្គ្រោះ និងរហូតពេលក្មួយចែកឋានពូកំពុងស្ថិតក្នុងពេលវេលារវល់ បំផុត គឺចំថ្ងៃបោះឆ្នោត។ តែទោះយ៉ាងណាមីងបានធ្វើទំនាក់ទំនងជាប្រចាំជាមួយ លោក ហ៊ុយ វណ្ណះ ដើម្បីបានដឹងពីស្ថានភាពរបស់ក្មួយ។
ការបាត់បង់ក្មួយប្រៀបដូចជាការបាត់បង់កូនប្រុសម្នាក់ដែលពុកនិងម៉ែនឹងរួមចំណែកជាមួយអ្នករាប់អានកូនជួយចិញ្ចឹមបីបាច់ចៅប្រុស ស្រីដែលនៅកំព្រានោះឡើយ។ លាគ្នាពីឋានខុសគ្នាដោយទឹកភ្នែកណាកូនប្រុសពុក”៕
