ភ្នំពេញ៖ ស្ត្រីម្នាក់ស្រវឹងជោកជាំជិះម៉ូតូមួយគ្រឿង ម៉ាកហុងដាគុបជ្រុង ដួលនៅលើស្ពានអាកាស៥មករា ៤ទៅ៥ត្រឡប់ បណ្តាលឲ្យរងរបួសស្រាល ។ ហេតុការណ៍នេះកើតឡើងនៅវេលាម៉ោង១១និង៣០នាទីយប់ ថ្ងៃទី០៩ ខែមិថុនា ឆ្នាំ២០១៧ ត្រង់ចំណុចលើស្ពានអាកាស៥មករា ចុងខាងលិច ស្ថិតក្នុងសង្កាត់ទឹកល្អក់១ ខណ្ឌទួលគោក ។
ជនរងគ្រោះមិនត្រូវគេស្គាល់ឈ្មោះនោះទេ ជិះម៉ូតូម៉ាកហុងដាគុបជ្រុង ពណ៍ទឹកប៊ិច ពាក់ស្លាកលេខ ភ្នំពេញ 1B-3503 ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញស្ត្រីរងគ្រោះខាងលើ ជិះម៉ូតូម៉ាកគុបជ្រុង ពណ៍ទឹកប៊ិច តាមបណ្តោយផ្លូវសហព័ន្ធរុស្ស៊ី ទិសដៅពីកើតទៅលិច លុះមកដល់ចំណុចកើតហេតុខាងលើ ដោយសារតែស្ត្រីរូបនោះ ស្រវឹងខ្លាំងពេក មិនអាចគ្រប់គ្រង់ដៃចង្កូតបាន បណ្តាលឲ្យដួលរងរបួសស្រាល ភ្លាមៗមានរថយន្តសាមុយគ្លីនិកឯកជន ហុង ហាក់ មកដឹកយកទៅព្យាបាល។
ក្រោយមកសមត្ថកិច្ចមូលដ្ឋាន បានចុះទៅយកម៉ូតូរបស់ជនរងគ្រោះទៅរក្សាទុកនៅប៉ុស្តិ៍នគរបាលទឹកល្អក់១ ដើម្បីរងចាំម្ចាស់យកឯកសារពាក់ព័ន្ធមកយកម៉ូតូទៅវិញ៕