ភ្នំពេញ៖ ជនសង្ស័យ២នាក់ប្តីប្រពន្ធ ត្រូវបានកម្លាំងព្រហ្មទណ្ឌខណ្ឌសែនសុខ ចាប់ឃាត់ខ្លួនដោយជាប់ពាក់ព័ន្ធជួញដូរ និងប្រើប្រាស់គ្រឿងញៀនខុសច្បាប់ ព្រមទាំងដកហូតថ្នាំញៀន10កូនថង់តូច ដាវសាម៉ូរ៉ៃ១ដើម ថង់វេចខ្ចប់ និងសម្ភារៈមួយចំនួនផង។ ការឃាត់ជនសង្ស័យខាងលើកាលពីម៉ោង០៩និង៣០នាទីព្រឹក ថ្ងៃទី១០ ខែមិថុនា ឆ្នាំ២០១៧ នៅបន្ទប់លេខ៣១៣ ជាន់ទី៣ ក្រុម៤ ភូមិសេប៉េសេ សង្កាត់ទឹកថ្លា ខណ្ឌសែនសុខ។
ក្នុងប្រតិបត្តិការណ៍នេះ ដឹកនាំដោយលោកវរសេនីយត្រី គួក សុខហួរ អធិការរងខណ្ឌ និងលោកអនុសេនីយឯក យឹម ដាវុធ នាយផ្នែកព្រហ្មទណ្ឌខណ្ឌ និងកម្លាំងមួយចំនួនទៀតចូលរួមផង។
ជនសង្ស័យជាប្តីឈ្មោះ ហេង ប៊ុនលាង អាយុ៣៦ឆ្នាំ មុខរបរមិនពិតប្រាកដ ស្នាក់នៅ បន្ទប់លេខ៣១៣ ជាន់ទី៣ ក្រុម៤ ភូមិសេប៉េសេ សង្កាត់ទឹកថ្លា ខណ្ឌសែនសុខ មានស្រុកកំណើតភូមិអញ្ជែងលើ ឃុំពុកឫស្សី ស្រុកខ្សាច់កណ្តាល ខេត្តកណ្តាល ប្រពន្ធឈ្មោះញ៉ែម យ៉ារីណា អាយុ១៧ឆ្នាំ មុខរបរមិនពិតប្រាកដ ស្នាក់នៅបន្ទប់លេខ៣១៣ ជាន់ទី៣ ក្រុម៤ ភូមិសេប៉េសេ សង្កាត់ទឹកថ្លា ខណ្ឌសែនសុខ មានស្រុកកំណើតភូមិព្រៃសាលា សង្កាត់កាកាប ខណ្ឌដង្កោ។
សមត្ថកិច្ចបានប្រាប់ថា មុនឈានទៅឃាត់ខ្លួនជនសង្ស័យជាប្តីប្រពន្ធខាងលើ ខណៈដែលសមត្ថកិច្ចប្រើប្រាស់ជំនាញដើរតួជាអ្នកប្រើប្រាស់គ្រឿងញៀន ដើម្បើទៅរកទិញថ្នាំញៀនពីប្តីប្រពន្ធខាងលើ ក្រោយពីទិញបានថ្នាំញៀនហើយ ក៏ឈានទៅឃាត់ខ្លួនបាន២នាក់ប្តីប្រពន្ធ ដល់បន្ទប់ជួល ក្នុងនោះសមត្ថកិច្ចធ្វើការឆែកឆេរបានរកឃើញថ្នាំញៀនប្រភេទក្រាមសថ្លាចំនួន10កូនថង់តូច ដាវសាម៉ូរ៉ៃ១ដើម ថង់វេចខ្ចប់គ្រឿងញៀន និងសម្ភារៈពាក់ព័ន្ធមួយចំនួនផង។
បច្ចុប្បន្នប្តីប្រពន្ធខាងលើកំពុងត្រូវបានឃាត់ខ្លួនធ្វើការសាកសួរបណ្តោះអាសន្ន នៅអធិការដ្ឋាននគរបាលខណ្ឌសែនសុខ រងចាំកសាងសុំណុំរឿងទៅតុលាការពេលក្រោយ៕