ភ្នំពេញ៖ កាលពីយប់មិញ ថ្ងៃទី១៣ ខែមិថុនា ឆ្នាំ២០១៧ នៅពហុកីឡដ្ឋានជាតិអូឡាំពិក មានការប្រកួតបាល់ទាត់អន្តរជាតិ ដណ្តើមពានរង្វាន់ AFC Asian Cub 2019 វគ្គជម្រុះ រវាងក្រុមជម្រើសជាតិកម្ពុជា និងក្រុមជម្រើសជាតិអាហ្វហ្គានីស្ថាន ដោយមានការចូលរួមទស្សនាពីអ្នកគាំទ្រកីឡារាប់ម៉ឺននាក់ ស្របពេលដែលក្រុមជម្រើសជាតិកម្ពុជា បានយកឈ្នះទៅលើក្រុមជម្រើសជាតិអាហ្វហ្គានីស្ថាន ក្នុងលទ្ធផល ១ទល់០ សម្រែកហ៊ោកញ្ជៀវរបស់បងប្អូនអ្នកគាំទ្រ បានបំពងឡើងយ៉ាងសប្បាយរីករាយ។
តែជាការអាម៉ាស់ យុវជនឈាមរាវទំនើងមួយក្រុម បានធ្វើសកម្មភាពវាយតប់គ្នាយ៉ាងអនាធិបតេយ្យ ក្នុងអំឡុងពេលប្រកួត បង្កជាអសន្តិសុខចលាចលដល់បងប្អូនអ្នកគាំទ្រដ៏ទៃទៀត ហើយត្រូវអាវុធហត្ថរាជធានីភ្នំពេញ ឃាត់ខ្លួនបាន០៦នាក់ ភ្លាមៗតែម្តង រួមមាន៖ ទី១.ឈ្មោះ អឿន មុន្នី ហៅអាតាង ភេទប្រុស អាយុ ១៨ឆ្នាំ, ទី២.ឈ្មោះ ហ៊ុន កុសល់ ហៅសល់ ភេទប្រុស អាយុ១៨ឆ្នាំ, ទី៣. ឈ្មោះ សំអាត ផាខិន ភេទប្រុស អាយុ១៨ឆ្នាំ, ទី៤. ឈ្មោះ ណាត ចាន់ឡេង ភេទប្រុស អាយុ ១៤ឆ្នាំ, ទី៥. ឈ្មោះ មួន ឬទ្ធី ហៅធី ភេទប្រុស អាយុ១៧ឆ្នាំ , និងទី៦ ឈ្មោះ ឡុង រដ្ឋា ហៅអាសាន ភេទប្រុស អាយុ១៧ឆ្នាំ ។
បច្ចុប្បន្ន យុវជនទាំង០៦នាក់នោះ ត្រូវបានសមត្ថកិច្ចជំនាញនៃកងរាជអាវុធហត្ថរាជធានីភ្នំពេញ កំពុងបន្តការស៊ើបសួរ និងចាត់ការតាមនិតិវិធីច្បាប់៕
