ភ្នំពេញ ៖ រថយន្តហុីយ៉ាន់ដាយទ្រុងមួយគ្រឿង បើកបរវ៉ាជែងគេឯងចូលទៅគន្លងផ្លូវអថិភាពរបស់គេម្ខាងទៀត ជ្រុលទៅបុកម៉ូតូច្រាសទិស កល់កៀបជាប់ពីក្រោមរថយន្ត រងរបួសធ្ងន់ម្នាក់ កាលពីវេលាម៉ោង៧និង៣០នាទីព្រឹក ថ្ងៃទី១៥ ខែមិថុនា ឆ្នាំ២០១៧ ស្ថិតនៅលើកំណាត់ផ្លូវជាតិលេខ៤ ភូមិព្រៃស្វាយ សង្កាត់ចោមចៅ ខណ្ឌពោធិ៍សែនជ័យ ។
បុរសរងគ្រោះមិនស្គាល់ឈ្មោះ ក្រោយកើតហេតុភ្លាម រថយន្តគ្លីនិកឯកជនបែកចាន ដឹកបញ្ជូន ទៅខាងស្រុកអង្គស្នួល បាត់ ។ ជនរងគ្រោះជិះម៉ូតូមួយគ្រឿង ម៉ាកហុងដា គុបជ្រុង សេ៩០ ពណ៌ទឹកប្រាក់ ពាក់ស្លាកលេខ ភ្នំពេញ 1CH-3397 ។ ចំណែករថយន្តបង្ក ម៉ាកហុីយ៉ាន់ដាយទ្រុង ពណ៌ខៀវ ចំណុះ១តោន ពាក់ស្លាកលេខកណ្តាល 2A-0772 អ្នកបើកបរមិនស្គាល់ឈ្មោះ ក្រោយកើតហេតុបានគេចខ្លួនបាត់ ។
តាមប្រភពពលរដ្ឋឃើញហេតុការណ៍ បានឲ្យដឹងថា មុនកើតហេតុ រថយន្តបង្កបើកពីលិចទៅកើត វ៉ាជែងប្រជ្រៀតរុលគេឯង រហូតបើកបរលើគន្លងផ្លូវអថិភាព ស្តាំដៃរបស់គេ សង្ស័យអ្នកបើកបរអត់ដែលចូលសាលាផង ក៏មិនដឹង លុះបើកដល់ចំណុចខាងលើ ជ្រុលទៅបុកម៉ូតូជនរងគ្រោះ បើកពីកើតទៅលិចច្រាសទិសគ្នា បណ្តាលឲ្យរងរបួសធ្ងន់ ។
ក្រោយកើតហេតុ ជនរងគ្រោះត្រូវបានរថយន្តគ្លីនិកបែកចាន ដែលឈប់សំកុករងចាំដឹកអ្នកគ្រោះថ្នាក់ចរាចរណ៍ក្បែរនោះ ស្រាប់ដឹកបញ្ជូនទៅគ្លីនិកបែកចាន ខាងស្រុកអង្គស្នួល ចំណែកម៉ូតូនិងរថយន្ត ត្រូវបាននគរបាលមូលដ្ឋាន បាញ់ថ្នាំ រួចយកដាក់កៀនម្ខាង រង់ចាំនគរបាលជំនាញ យកទៅរក្សាទុកនៅអធិការដ្ឋានរង់ចាំដោះស្រាយពេលក្រោយ ៕