ជនសង្ស័យ២នាក់ ឆក់ទូរសព្ទ័នារីម្នាក់មិនបានសម្រេច ត្រូវប្រជាពលរដ្ឋចាប់វាយ

ភ្នំពេញ៖ នរគបាលខណ្ឌទួលគោក ល្បាតឃាត់ខ្លួនជនសង្ស័យចំនួន២នាក់បានភ្លាមៗ ក្រោយពីធ្វើសកម្មភាពឆក់ទូរស័ព្ទពីនារីម្នាក់ ដាក់នៅក្នុងប្រអប់ម៉ូតូខាងមុខ មិនបានសម្រេចជិះទៅបុករថយន្តគេដួល។ ករណីឆក់ទូរស័ព្ទនេះកើតឡើងនៅខាងមុខផ្ទះលេខ១០អា ផ្លូវ៦៦៤ ក្រុម៦ ភូមិ៨ សង្កាត់បឹងសាឡាង ខណ្ឌទួលគោក រាជធានីភ្នំពេញ នៅម៉ោង៤និង៣០នាទីល្ងាច ថ្ងៃទី១៥ ខែមិថុនា ឆ្នាំ២០១៧ ។

នារីរងគ្រោះមានឈ្មោះ កែវ ពេជ្រម៉ូលីកា ភេទស្រី អាយុ២៦ឆ្នាំ មុខរបរបុគ្គលិកនៅណាហ្គាវើលដ៍ ស្នាក់នៅផ្ទះម្តុំសង្កាត់បឹងសាឡាង ជិះម៉ូតូហ្វីណូ ពណ៌ក្រហមលាយខ្មៅ ស្លាកលេខ ភ្នំពេញ1CH-0762 ដោយដាក់ទូរស័ព្ទ iphone 7plus ពណ៌ក្រហម នៅក្នុងប្រអប់ខាងមុខម៉ូតូផ្នែកខាងឆ្វេងដៃ ។

ជនសង្ស័យទាំងដែលសម្ថតកិច្ចឃាត់បាន មានឈ្មោះ ហេង ចាន់រ៉ា ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលម្តុំច្បារអំពៅ ជាអ្នកឌុប និងម្នាក់ទៀតឈ្មោះ ខេម វណ្ណឆន ភេទប្រុស អាយុ៣០ឆ្នាំ ស្នាក់នៅផ្ទះជួលម្តុំប៊ូឌីញ ជាអ្នកធ្វើសកម្មភាព ជិះម៉ូតូហ៊្វីណូ ពណ៌ស ស្លាកលេខ ភ្នំពេញ1O-5290 ។

តាមការរៀបរាប់ពីនារីរងគ្រោះបានប្ឲ្យដឹងថា មុនពេលកើតហេតុ នាងបានចាកចេញពីផ្ទះ ដោយធ្វើដំណើរទៅរកទិញអ្វីហូប ស្រាប់តែធ្វើដំណើរមកដល់កន្លែងកើតហេតុ ស្រាប់តែមានជនសង្ស័យ២នាក់ បានធ្វើសកម្មភាពលូកដៃឆក់យកទូរស័ព្ទ តែមិនសម្រេច ពេលនោះនាងបានស្រែកចោរៗផង ជនសង្ស័យមានអារម្មណ៍ភិតភ័យ ជិះម៉ូតូជ្រុលទៅបុករថយន្តមួយគ្រឿង បណ្តាលឲ្យដួល និងមានប្រជាពលរដ្ឋ ព្រមទាំងសមត្ថកិច្ចចាប់ក្របួចបានភ្លាមៗតែម្តង ហើយមានប្រជាពលរដ្ឋខ្លះបាននាំគ្នាវាយម្នាក់មួយដៃមួយជើង ទើបប្រគល់ឲ្យប៉ូលិស។

បច្ចុប្បន្នជនសង្ស័យទាំង២នាក់ រួមទាំងវត្ថុតាង ត្រូវបានកម្លាំនរគបាលនាំខ្លួនមកអធិការដ្ឋាននរគបាលខណ្ឌទួលគោក ឃុំខ្លួនបណ្តោះអាសន្ន ដើម្បីកសាងសំណុំរឿងចាត់ការតាមនីតិវិធី ៕